౧౧. ఉజ్ఝానసఞ్ఞిత్థేరవత్థు

పరవజ్జానుపస్సిస్సాతి ఇమం ధమ్మదేసనం సత్థా జేతవనే విహరన్తో ఉజ్ఝానసఞ్ఞిం నామ ఏకం థేరం ఆరబ్భ కథేసి.

సో కిర ‘‘అయం ఏవం నివాసేతి, ఏవం పారుపతీ’’తి భిక్ఖూనం అన్తరమేవ గవేసన్తో విచరతి. భిక్ఖూ ‘‘అసుకో నామ, భన్తే, థేరో ఏవం కరోతీ’’తి సత్థు ఆరోచేసుం. సత్థా, ‘‘భిక్ఖవే, వత్తసీసే ఠత్వా ఏవం ఓవదన్తో అననుపవాదో. యో పన నిచ్చం ఉజ్ఝానసఞ్ఞితాయ పరేసం అన్తరం పరియేసమానో ఏవం వత్వా విచరతి, తస్స ఝానాదీసు ఏకోపి విసేసో నుప్పజ్జతి, కేవలం ఆసవాయేవ వడ్ఢన్తీ’’తి వత్వా ఇమం గాథమాహ –

౨౫౩. ‘‘పరవజ్జానుపస్సిస్స, నిచ్చం ఉజ్ఝానసఞ్ఞినో;

ఆసవా తస్స వడ్ఢన్తి, ఆరా సో ఆసవక్ఖయా’’తి.

తత్థ ఉజ్ఝానసఞ్ఞినోతి ఏవం నివాసేతబ్బం ఏవం పారుపితబ్బన్తి పరేసం అన్తరగవేసితాయ ఉజ్ఝానబహులస్స పుగ్గలస్స ఝానాదీసు ఏకధమ్మోపి న వడ్ఢతి, అథ ఖో ఆసవావ తస్స వడ్ఢన్తి. తేనేవ కారణేన సో అరహత్తమగ్గసఙ్ఖాతా ఆసవక్ఖయా ఆరా దూరం గతోవ హోతీతి.

దేసనావసానే బహూ సోతాపత్తిఫలాదీని పాపుణింసూతి.

ఉజ్ఝానసఞ్ఞిత్థేరవత్థు ఏకాదసమం.