౯. అలీనసత్తుచరియావణ్ణనా

౭౪. నవమే పఞ్చాలరట్ఠేతి ఏవంనామకే జనపదే. నగరవరే, కపిలాయన్తి ‘‘కపిలా’’తి ఏవంలద్ధనామే ఉత్తమనగరే. ‘‘నగరవరే’’తి వత్వా పున ‘‘పురుత్తమే’’తి వచనం తస్మిం కాలే జమ్బుదీపే సబ్బనగరానం తస్స నగరస్స అగ్గనగరభావదస్సనత్థం. జయద్దిసో నామాతి రఞ్ఞా అత్తనో పచ్చత్థికే జితే జాతో, అత్తనో వా పచ్చామిత్తభూతం యక్ఖినీసఙ్ఖాతం జయద్దిసం జితోతి ఏవంలద్ధనామో. సీలగుణముపాగతోతి ఆచారసీలఞ్చేవ ఉస్సాహసమ్పత్తియాదిరాజగుణఞ్చ ఉపాగతో, తేన సమన్నాగతోతి అత్థో.

౭౫. తస్స రఞ్ఞోతి జయద్దిసరాజస్స, అహం పుత్తో అహోసిన్తి వచనసేసో. సుతధమ్మోతి యావతా రాజపుత్తేన సోతబ్బధమ్మో నామ, తస్స సబ్బస్స సుతత్తా సుతధమ్మో, బహుస్సుతోతి అత్థో. అథ వా సుతధమ్మోతి విస్సుతధమ్మో, ధమ్మచరియాయ సమచరియాయ పకాసో పఞ్ఞాతో, లోకే పత్థటకిత్తిధమ్మోతి అత్థో. అలీనసత్తోతి ఏవంనామో. గుణవాతి ఉళారేహి మహాపురిసగుణేహి సమన్నాగతో. అనురక్ఖపరిజనో సదాతి సద్ధాదిగుణవిసేసయోగతో చతూహి సఙ్గహవత్థూహి సమ్మదేవ సఙ్గహణతో చ సబ్బకాలం సమ్భత్తపరివారజనో.

౭౬. పితా మే మిగవం గన్త్వా, పోరిసాదం ఉపాగమీతి మయ్హం పితా జయద్దిసరాజా మిగవం చరన్తో అరఞ్ఞమజ్ఝం గన్త్వా పోరిసాదం మనుస్సఖాదకం యక్ఖినిపుత్తం ఉపగఞ్ఛి, తేన సమాగమి.

జయద్దిసరాజా కిర ఏకదివసం ‘‘మిగవం గమిస్సామీ’’తి తదనురూపేన మహతా పరివారేన కపిలనగరతో నిక్ఖమి. తం నిక్ఖన్తమత్తమేవ తక్కసిలావాసీ నన్దో నామ బ్రాహ్మణో చతస్సో సతారహా గాథా నామ కథేతుం ఆదాయ ఉపసఙ్కమిత్వా అత్తనో ఆగమనకారణం రఞ్ఞో ఆరోచేసి. రాజా ‘‘నివత్తిత్వా సుణిస్సామీ’’తి తస్స వసనగేహం పరిబ్బయఞ్చ దాపేత్వా అరఞ్ఞం పవిట్ఠో ‘‘యస్స పస్సేన మిగో పలాయతి, తస్సేవ సో గీవా’’తి వత్వా మిగే పరియేసన్తో విచరతి. అథేకో పసదమిగో మహాజనస్స పదసద్దేన ఆసయతో నిక్ఖమిత్వా రఞ్ఞో అభిముఖో గన్త్వా పలాయి. అమచ్చా పరిహాసం కరింసు. రాజా తం అనుబన్ధిత్వా తియోజనమత్థకే తం పరిక్ఖీణజవం ఠితం విజ్ఝిత్వా పాతేసి. పతితం ఖగ్గేన ద్విధా కత్వా అనత్థికోపి ‘‘మంసేన మిగం గహేతుం నాసక్ఖీ’’తి వచనమోచనత్థం కాజే కత్వా ఆగచ్ఛన్తో ఏకస్స నిగ్రోధస్స మూలే దబ్బతిణేసు నిసీదిత్వా థోకం విస్సమిత్వా గన్తుం ఆరభి.

తేన చ సమయేన తస్సేవ రఞ్ఞో జేట్ఠభాతా జాతదివసే ఏవ ఏకాయ యక్ఖినియా ఖాదితుం గహితో ఆరక్ఖమనుస్సేహి అనుబద్ధాయ తాయ నిద్ధమనమగ్గేన గచ్ఛన్తియా ఉరే ఠపితో మాతుసఞ్ఞాయ ముఖేన థనగ్గహణేన పుత్తసినేహం ఉప్పాదేత్వా సంవడ్ఢియమానో తదాహారోపయోగితాయ మనుస్సమంసం ఖాదన్తో అనుక్కమేన వుద్ధిప్పత్తో అత్తానం అన్తరధాపనత్థం యక్ఖినియా దిన్నఓసధమూలానుభావేన అన్తరహితో హుత్వా మనుస్సమంసం ఖాదిత్వా జీవన్తో తాయ యక్ఖినియా మతాయ తం ఓసధమూలం అత్తనో పమాదేన నాసేత్వా దిస్సమానరూపోవ మనుస్సమంసం ఖాదన్తో నగ్గో ఉబ్బిగ్గవిరూపదస్సనో రాజపురిసేహి పస్సిత్వా అనుబద్ధో పలాయిత్వా అరఞ్ఞం పవిసిత్వా తస్స నిగ్రోధస్స మూలే వాసం కప్పేన్తో రాజానం దిస్వా ‘‘భక్ఖోసి మే’’తి హత్థే అగ్గహేసి. తేన వుత్తం ‘‘సో మే పితుమగ్గహేసి, భక్ఖోసి మమ మా చలీ’’తిఆది.

తత్థ సో మే పితుమగ్గహేసీతి సో పోరిసాదో మమ పితరం జయద్దిసరాజానం అత్తనో నిసిన్నరుక్ఖసమీపమాగతం ‘‘మమ భక్ఖో త్వం ఆగతోసి, హత్థపరిప్ఫన్దనాదివసేన మా చలి, చలన్తమ్పి అహం తం ఖాదిస్సామీ’’తి హత్థే అగ్గహేసి.

౭౭. తస్సాతి తస్స యక్ఖినిపుత్తస్స. తసితవేధితోతి చిత్తుత్రాసేన తసితో సరీరపరికమ్పేన వేధితో. ఊరుక్ఖమ్భోతి ఉభిన్నం ఊరూనం థద్ధభావో, యేన సో తతో పలాయితుం నాసక్ఖి.

మిగవం గహేత్వా ముఞ్చస్సూతి ఏత్థ మిగవన్తి మిగవవసేన లద్ధత్తా తం మిగమంసం ‘‘మిగవ’’న్తి ఆహ, ఇమం మిగమంసం గహేత్వా మం ముఞ్చస్సూతి అత్థో. సో హి రాజా నం యక్ఖినిపుత్తం దిస్వా భీతో ఊరుక్ఖమ్భం పత్వా ఖాణుకో వియ అట్ఠాసి. సో వేగేన గన్త్వా తం హత్థే గహేత్వా ‘‘భక్ఖోసి మే ఆగతోసీ’’తి ఆహ. అథ నం రాజా సతిం పచ్చుపట్ఠపేత్వా ‘‘సచే ఆహారత్థికో, ఇమం తే మంసం దదామి, తం గహేత్వా ఖాద, మం ముఞ్చాహీ’’తి ఆహ. తం సుత్వా పోరిసాదో ‘‘కిమిదం మయ్హమేవ సన్తకం దత్వా మయా వోహారం కరోసి, నను ఇమం మంసఞ్చ త్వఞ్చ మమ హత్థగతకాలతో పట్ఠాయ మయ్హమేవ సన్తకం, తస్మా తం పఠమం ఖాదిత్వా పచ్ఛా మంసం ఖాదిస్సామీ’’తి ఆహ.

అథ రాజా ‘‘మంసనిక్కయేనాయం న మం ముఞ్చతి, మయా చ మిగవం ఆగచ్ఛన్తేన తస్స బ్రాహ్మణస్స ‘ఆగన్త్వా తే ధనం దస్సామీ’తి పటిఞ్ఞా కతా. సచాయం యక్ఖో అనుజానిస్సతి, సచ్చం అనురక్ఖన్తో గేహం గన్త్వా తం పటిఞ్ఞం మోచేత్వా పున ఇమస్స యక్ఖస్స భత్తత్థం ఆగచ్ఛేయ్య’’న్తి చిన్తేత్వా తస్స తమత్థం ఆరోచేసి. తం సుత్వా పోరిసాదో ‘‘సచే త్వం సచ్చం అనురక్ఖన్తో గన్తుకామోసి, గన్త్వా తస్స బ్రాహ్మణస్స దాతబ్బం ధనం దత్వా సచ్చం అనురక్ఖన్తో సీఘం పున ఆగచ్ఛేయ్యాసీ’’తి వత్వా రాజానం విస్సజ్జేసి. సో తేన విస్సట్ఠో ‘‘త్వం మా చిన్తయి, అహం పాతోవ ఆగమిస్సామీ’’తి వత్వా మగ్గనిమిత్తాని సల్లక్ఖేన్తో అత్తనో బలకాయం ఉపగన్త్వా తేన పరివుతో నగరం పవిసిత్వా నన్దబ్రాహ్మణం పక్కోసాపేత్వా మహారహే ఆసనే నిసీదాపేత్వా తా గాథా సుత్వా చత్తారి సహస్సాని దత్వా యానం ఆరోపేత్వా ‘‘ఇమం తక్కసిలమేవ నేథా’’తి మనుస్సే దత్వా బ్రాహ్మణం ఉయ్యోజేత్వా దుతియదివసే పోరిసాదస్స సన్తికం గన్తుకామో పుత్తం రజ్జే పతిట్ఠపేతుం అనుసాసనిఞ్చ దేన్తో తమత్థం ఆరోచేసి. తేన వుత్తం –

౭౮. ‘‘మిగవం గహేత్వా ముఞ్చస్సు, కత్వా ఆగమనం పున;

బ్రాహ్మణస్స ధనం దత్వా, పితా ఆమన్తయీ మమం.

౭౯. ‘‘రజ్జం పుత్త పటిపజ్జ, మా పమజ్జి పురం ఇదం;

కతం మే పోరిసాదేన, మమ ఆగమనం పునా’’తి.

తత్థ ఆగమనం పునాతి పున ఆగమనం పటిఞ్ఞాతస్స పోరిసాదస్స సఙ్గరం కత్వా. బ్రాహ్మణస్స ధనం దత్వాతి తక్కసిలతో ఆగతస్స నన్దనామస్స బ్రాహ్మణస్స తా గాథా సుత్వా చతుసహస్సపరిమాణం ధనం దత్వా. పితా ఆమన్తయీ మమన్తి మమ పితా జయద్దిసరాజా మం ఆమన్తేసి.

కథం ఆమన్తేసీతి చే? ఆహ ‘‘రజ్జ’’న్తిఆది. తస్సత్థో – పుత్త, త్వం ఇమం కులసన్తకం రజ్జం పటిపజ్జ, యథాహం ధమ్మేన సమేన రజ్జం కారేమి, ఏవం త్వమ్పి ఛత్తం ఉస్సాపేత్వా రజ్జం కారేహి. త్వం ఇదం పురం రక్ఖన్తో రజ్జఞ్చ కారేన్తో మా పమాదమాపజ్జి, అసుకస్మిం ఠానే నిగ్రోధరుక్ఖమూలే పోరిసాదేన యక్ఖేన కతమేతం మయా సఙ్గరం మమ పున తస్స సన్తికం ఆగమనం ఉద్దిస్స, కేవలం తస్స బ్రాహ్మణస్స ధనదానత్థం ఇధాగతో సచ్చం అనురక్ఖన్తో, తస్మా తత్థాహం గమిస్సామీతి.

తం సుత్వా మహాసత్తో ‘‘మా ఖో త్వం, మహారాజ, తత్థ అగమాసి, అహం తత్థ గమిస్సామి. సచే పన త్వం, తాత, గమిస్ససియేవ, అహమ్పి తయా సద్ధిం గమిస్సామియేవా’’తి. ‘‘ఏవం సన్తే మయం ఉభోపి న భవిస్సామ, తస్మా అహమేవ తత్థ గమిస్సామీ’’తి నానప్పకారేన వారేన్తం రాజానం సఞ్ఞాపేత్వా మాతాపితరో వన్దిత్వా పితు అత్థాయ అత్తానం పరిచ్చజిత్వా సోత్థిభావాయ పితరి సాసితవాదం పయుఞ్జమానే మాతుభగినిభరియాసు చ సచ్చకిరియం కరోన్తీసు ఆవుధం గహేత్వా నగరతో నిక్ఖమిత్వా అస్సుపుణ్ణముఖం మహాజనం అనుబన్ధన్తం ఆపుచ్ఛిత్వా పితరా అక్ఖాతనయేన యక్ఖవాసమగ్గం పటిపజ్జి. యక్ఖినిపుత్తోపి ‘‘ఖత్తియా నామ బహుమాయా, కో జానాతి కిం భవిస్సతీ’’తి రుక్ఖం అభిరుహిత్వా రఞ్ఞో ఆగమనం ఓలోకేన్తో నిసిన్నో కుమారం ఆగచ్ఛన్తం దిస్వా ‘‘పితరం నివత్తేత్వా పుత్తో ఆగతో భవిస్సతి, నత్థి మే భయ’’న్తి ఓతరిత్వా తస్స పిట్ఠిం దస్సేత్వావ నిసీది. మహాసత్తో ఆగన్త్వా తస్స పురతో అట్ఠాసి. తేన వుత్తం –

౮౦. ‘‘మాతాపితూ చ వన్దిత్వా, నిమ్మినిత్వాన అత్తనా;

నిక్ఖిపిత్వా ధనుం ఖగ్గం, పోరిసాదం ఉపాగమి’’న్తి.

౮౧. ససత్థహత్థూపగతన్తి ససత్థహత్థం ఉపగతం ఆవుధపాణిం మం అత్తనో సన్తికం ఉపగతం దిస్వా. కదాచి సో తసిస్సతీతి సో యక్ఖో అపి తసేయ్య. తేన భిజ్జిస్సతి సీలన్తి తేన తస్స తాసుప్పాదనేన మయ్హం సీలం వినస్సతి సంకిలిస్సతి. పరితాసం కతే మయీతి మయి తస్స పరితాసం కతే సతి.

౮౨. సీలఖణ్డభయా మయ్హం, తస్స దేస్సం న బ్యాహరిన్తి యథా చ సీలభేదభయేన నిహితసత్థో తస్స సన్తికం అగమాసి, ఏవం మయ్హం సీలఖణ్డభయా ఏవ తస్స పోరిసాదస్స దేస్సం అనిట్ఠమ్పి న బ్యాహరిం, కేవలం పన మేత్తచిత్తేన హితవాదీ ఇదం ఇదాని వక్ఖమానం వచనం అభాసిం.

మహాసత్తో చ గన్త్వా పురతో ఠితో. యక్ఖినిపుత్తో తం వీమంసితుకామో ‘‘కోసి త్వం, కుతో ఆగతో, కిం మం న జానాసి ‘లుద్దో మనుస్సమంసఖాదకో’తి, కస్మా చ ఇధాగతోసీ’’తి పుచ్ఛి. కుమారో ‘‘అహం జయద్దిసరఞ్ఞో పుత్తో, త్వం పోరిసాదకోతి జానామి, పితు జీవితం రక్ఖితుం ఇధాగతో, తస్మా తం ముఞ్చ, మం ఖాదా’’తి ఆహ. పున యక్ఖినిపుత్తో ముఖాకారేనేవ ‘‘తం తస్స పుత్తోతి అహం జానామి, దుక్కరం పన తయా కతం ఏవం ఆగచ్ఛన్తేనా’’తి ఆహ. కుమారో ‘‘న ఇదం దుక్కరం, యం పితు అత్థే జీవితపరిచ్చజనం, మాతాపితుహేతు హి ఏవరూపం పుఞ్ఞం కత్వా ఏకన్తేనేవ సగ్గే పమోదతి, అహఞ్చ ‘అమరణధమ్మో నామ కోచి సత్తో నత్థీ’తి జానామి, అత్తనా చ కిఞ్చి కతం పాపం నామ న సరామి, తస్మా మరణతోపి మే భయం నత్థి, ఇదం సరీరం మయా తే నిస్సట్ఠం, అగ్గిం జాలేత్వా ఖాదా’’తి ఆహ. తేన వుత్తం –

౮౩. ‘‘ఉజ్జాలేహి మహాఅగ్గిం, పపతిస్సామి రుక్ఖతో;

త్వం పక్కకాలమఞ్ఞాయ, భక్ఖయ మం పితామహా’’తి.

తం సుత్వా యక్ఖినిపుత్తో ‘‘న సక్కా ఇమస్స మంసం ఖాదితుం, ఉపాయేన ఇమం పలాపేస్సామీ’’తి చిన్తేత్వా ‘‘తేన హి అరఞ్ఞం పవిసిత్వా సారదారూని ఆహరిత్వా నిద్ధూమే అఙ్గారే కరోహి, తత్థ తే మంసం పచిత్వా ఖాదిస్సామీ’’తి ఆహ. మహాసత్తో తథా కత్వా తస్స ఆరోచేసి. సో తం ఓలోకేన్తో ‘‘అయం పురిససీహో మరణతోపి భయం నత్థి, ఏవం నిబ్భయో నామ న మయా దిట్ఠపుబ్బో’’తి లోమహంసజాతో కుమారం ఓలోకేసి. కుమారో కిస్స మం ఓలోకేసి, న యథావుత్తం కరోసీతి. యక్ఖినిపుత్తో మహాసత్తం ‘‘సత్తధా తస్స ముద్ధా ఫలేయ్య, యో తం ఖాదేయ్యా’’తి ఆహ. ‘‘సచే మం న ఖాదితుకామోసి, అథ కస్మా అగ్గిం కారేసీ’’తి? ‘‘తవ పరిగ్గణ్హనత్థ’’న్తి. ‘‘త్వం ఇదాని మం కథం పరిగ్గణ్హిస్ససి, స్వాహం తిరచ్ఛానయోనియం నిబ్బత్తోపి సక్కస్స దేవరఞ్ఞో అత్తానం పరిగ్గణ్హితుం న అదాసి’’న్తి ఇమమత్థం దస్సేన్తో –

‘‘ఇదఞ్హి సో బ్రాహ్మణం మఞ్ఞమానో, ససో అవాసేసి సకే సరీరే;

తేనేవ సో చన్దిమా దేవపుత్తో, ససత్థుతో కామదుహజ్జ యక్ఖా’’తి.(జా. ౧.౧౬.౯౩) –

గాథమాహ.

తత్థ ససో అవాసేసి సకే సరీరేతి అత్తనో సరీరహేతు ఇమం సరీరం ఖాదిత్వా ఇధ వసాతి ఏవం సకే సరీరే అత్తనో సరీరం దేన్తో తం బ్రాహ్మణరూపం సక్కం తత్థ వాసేసి. ససత్థుతోతి ‘‘ససీ’’తి ఏవం సససద్దేన థుతో. కామదుహోతి కామవడ్ఢనో. యక్ఖాతి దేవ.

ఏవం మహాసత్తో చన్దే ససలక్ఖణం కప్పట్ఠియం పాటిహారియం సక్ఖిం కత్వా అత్తనో సక్కేనపి పరిగ్గణ్హితుం అసక్కుణేయ్యతం అభాసి. తం సుత్వా పోరిసాదో అచ్ఛరియబ్భుతచిత్తజాతో –

‘‘చన్దో యథా రాహుముఖా పముత్తో, విరోచతే పన్నరసేవ భాణుమా;

ఏవం తువం పోరిసాదా పముత్తో, విరోచ కపిలే మహానుభావ;

ఆమోదయం పితరం మాతరఞ్చ, సబ్బో చ తే నన్దతు ఞాతిపక్ఖో’’తి. (జా. ౧.౧౬.౯౪) –

గాథం వత్వా ‘‘గచ్ఛ మహావీరా’’తి కుమారం విస్సజ్జేసి. సోపి తం నిబ్బిసేవనం కత్వా పఞ్చ సీలాని దత్వా ‘‘యక్ఖో ను ఖో ఏస, నో’’తి వీమంసన్తో ‘‘యక్ఖానం అక్ఖీని రత్తాని హోన్తి అనిమిసాని చ, ఛాయా చ న పఞ్ఞాయతి, అసమ్భీతో హోతి, న ఇమస్స తథా. తస్మా నాయం యక్ఖో మనుస్సో ఏసో, మయ్హం కిర పితు తయో భాతరో యక్ఖినియా గహితా, తేసు తాయ ద్వే ఖాదితా భవిస్సన్తి, ఏకో పుత్తసినేహేన పటిజగ్గితో భవిస్సతి. ఇమినా తేన భవితబ్బ’’న్తి నయగ్గాహేన అనుమానేన సబ్బఞ్ఞుతఞ్ఞాణేన వియ అవిపరీతతో నిట్ఠం గన్త్వా ‘‘మయ్హం పితు ఆచిక్ఖిత్వా రజ్జే పతిట్ఠాపేస్సామీ’’తి చిన్తేత్వా ‘‘న త్వం యక్ఖో, పితు మే జేట్ఠభాతికోసి, ఏహి మయా సద్ధిం గన్త్వా కులసన్తకం రజ్జం పటిపజ్జాహీ’’తి ఆహ. తేన వుత్తం ‘‘త్వం పితామహా’’తి, త్వం మమ మహాపితాతి అత్థో. ఇతరేన ‘‘నాహం మనుస్సో’’తి వుత్తే తేన సద్ధాతబ్బస్స దిబ్బచక్ఖుకతాపసస్స సన్తికం నేసి. తాపసేన ‘‘కిం కరోన్తా పితా పుత్తా అరఞ్ఞే విచరథా’’తి పితుభావే కథితే పోరిసాదో సద్దహిత్వా ‘‘గచ్ఛ, తాత, త్వం, న మే రజ్జేన అత్థో, పబ్బజిస్సామహ’’న్తి తాపసస్స సన్తికే ఇసిపబ్బజ్జం పబ్బజి. తేన వుత్తం –

౮౪. ‘‘ఇతి సీలవతం హేతు, నారక్ఖిం మమ జీవితం;

పబ్బాజేసిం చహం తస్స, సదా పాణాతిపాతిక’’న్తి.

తత్థ సీలవతం హేతూతి సీలవన్తానం మమ పితూనం హేతు. అథ వా సీలవతం హేతూతి సీలవతహేతు, మయ్హం సీలవతసమాదాననిమిత్తం తస్స అభిజ్జనత్థం. తస్సాతి తం పోరిసాదం.

అథ మహాసత్తో అత్తనో మహాపితరం పబ్బజితం వన్దిత్వా నగరస్స సమీపం గన్త్వా ‘‘కుమారో కిర ఆగతో’’తి సుత్వా హట్ఠతుట్ఠేన రఞ్ఞా నాగరేహి నేగమజానపదేహి చ పచ్చుగ్గతో రాజానం వన్దిత్వా సబ్బం పవత్తిం ఆరోచేసి. తం సుత్వా రాజా తఙ్ఖణఞ్ఞేవ భేరిం చరాపేత్వా మహన్తేన పరివారేన తస్స సన్తికం గన్త్వా ‘‘ఏహి, భాతిక, రజ్జం పటిపజ్జాహీ’’తి ఆహ. ‘‘అలం, మహారాజా’’తి. ‘‘తేన హి మయ్హం ఉయ్యానే వసా’’తి. ‘‘న ఆగచ్ఛామీ’’తి. రాజా తస్స అస్సమస్స అవిదూరే గామం నివేసేత్వా భిక్ఖం పట్ఠపేసి. సో చూళకమ్మాసదమ్మనిగమో నామ జాతో.

తదా మాతాపితరో మహారాజకులాని అహేసుం, తాపసో సారిపుత్తో, పోరిసాదో అఙ్గులిమాలో, కనిట్ఠా ఉప్పలవణ్ణా, అగ్గమహేసీ రాహులమాతా, అలీనసత్తుకుమారో లోకనాథో.

తస్స ఇధాపి హేట్ఠా వుత్తనయేనేవ యథారహం సేసపారమియో నిద్ధారేతబ్బా. తథా పితరా నివారియమానో అత్తనో జీవితం పరిచ్చజిత్వా పితు జీవితరక్ఖణత్థం ‘‘పోరిసాదస్స సన్తికం గమిస్సామీ’’తి నిచ్ఛయో, తస్స చ సన్తాసపరిహరణత్థం నిహితసత్థస్స గమనం, ‘‘అత్తనో సీలఖణ్డనం మా హోతూ’’తి తేన పియవాచాయ సముదాచారో, తేన చ నానానయేహి పరిగ్గణ్హియమానస్స మరణసన్తాసాభావో, పితు అత్థే మయ్హం సరీరం సఫలం కరిస్సామీతి హట్ఠతుట్ఠభావో, సక్కేనాపి పరిగ్గణ్హితుం అసక్కుణేయ్యస్స ససజాతియమ్పి పరిచ్చాగత్థం అత్తనో జీవితనిరపేక్ఖభావస్స జాననం, తేన సమాగమేపి ఓస్సట్ఠేపి చిత్తస్స వికారాభావో, తస్స చ మనుస్సభావమహాపితుభావానం అవిపరీతతో జాననం, ఞాతమత్తే చ తం కులసన్తకే రజ్జే పతిట్ఠాపేతుకామతా, ధమ్మదేసనాయ సంవేజేత్వా సీలేసు పతిట్ఠాపనన్తి. ఏవమాదయో ఇధ బోధిసత్తస్స గుణానుభావా విభావేతబ్బాతి.

అలీనసత్తుచరియావణ్ణనా నిట్ఠితా.