౮. నిస్సయపచ్చయనిద్దేసవణ్ణనా

౮. నిస్సయపచ్చయనిద్దేసే సహజాతపచ్చయనిద్దేసస్స పురిమానం పఞ్చన్నం కోట్ఠాసానం వసేన సహజాతనిస్సయనయం దస్సేత్వా పున ఛట్ఠేన కోట్ఠాసేన పురేజాతనిస్సయనయం దస్సేతుం చక్ఖాయతనం చక్ఖువిఞ్ఞాణధాతుయాతిఆది ఆరద్ధం. తత్థ యం రూపం నిస్సాయాతి వత్థురూపం సన్ధాయ వుత్తం. తఞ్హి నిస్సాయ తివిధా మనోధాతు, ఠపేత్వా అరూపవిపాకం ద్వాసత్తతివిధా మనోవిఞ్ఞాణధాతూతి ఇమాని పఞ్చసత్తతి చిత్తాని వత్తన్తీతి అయం తావేత్థ పాళివణ్ణనా. అయమ్పి నిస్సయపచ్చయో జాతివసేన కుసలాదిభేదతో పఞ్చధావ భిజ్జతి. తత్థ కుసలో భూమితో చతుబ్బిధోవ అకుసలో ఏకవిధో విపాకో చతుబ్బిధో, కిరియసఙ్ఖాతో తివిధో, రూపం ఏకవిధమేవాతి ఏవమేత్థ నానప్పకారభేదతో విఞ్ఞాతబ్బో వినిచ్ఛయో.

ఏవం భిన్నే పనేత్థ చతుభూమకమ్పి కుసలం పఞ్చవోకారే సమ్పయుత్తక్ఖన్ధానఞ్చేవ చిత్తసముట్ఠానరూపస్స చ నిస్సయపచ్చయేన పచ్చయో హోతి. తథా అకుసలం. యం పనేత్థ ఆరుప్పే ఉప్పజ్జతి, తం అరూపధమ్మానఞ్ఞేవ నిస్సయపచ్చయో హోతి. కామావచరరూపావచరవిపాకం పవత్తే సమ్పయుత్తధమ్మానఞ్చేవ చిత్తసముట్ఠానరూపస్స చ, పటిసన్ధియం కటత్తారూపస్సాపి నిస్సయపచ్చయో హోతి. అరూపావచరవిపాకం సమ్పయుత్తక్ఖన్ధానంయేవ హోతి. లోకుత్తరవిపాకం పఞ్చవోకారే; సమ్పయుత్తకానఞ్చేవ చిత్తసముట్ఠానరూపస్స చ, చతువోకారే అరూపస్సేవ నిస్సయపచ్చయో హోతి. కామావచరఅరూపావచరకిరియా పఞ్చవోకారే సమ్పయుత్తకానఞ్చేవ చిత్తసముట్ఠానరూపస్స చ నిస్సయపచ్చయో హోతి, చతువోకారే అరూపానఞ్ఞేవ. రూపావచరకిరియా సమ్పయుత్తకానఞ్చేవ చిత్తసముట్ఠానరూపస్స చ ఏకన్తేన నిస్సయపచ్చయో హోతి.

చతుసముట్ఠానికరూపస్స చ కమ్మసముట్ఠానరూపే ఏకం మహాభూతం తిణ్ణం, తీణి ఏకస్స, ద్వే ద్విన్నం మహాభూతానం, మహాభూతా ఉపాదారూపానం, వత్థురూపం పఞ్చవోకారభవే చతుభూమకకుసలస్స, అకుసలస్స, ఠపేత్వా ఆరుప్పవిపాకఞ్చేవ ద్వే పఞ్చవిఞ్ఞాణాని చ సేసతేభూమకవిపాకస్స, తేభూమకకిరియస్సాతి ఇమేసం చతున్నం ధమ్మరాసీనం నిస్సయపచ్చయో హోతి. చక్ఖాయతనాదీని పఞ్చ ససమ్పయుత్తానం చక్ఖువిఞ్ఞాణాదీనం నిస్సయపచ్చయో హోతి. ఉతుచిత్తాహారసముట్ఠానేసు పన మహాభూతా మహాభూతానఞ్చేవ ఉపాదారూపస్స చ నిస్సయపచ్చయేన పచ్చయోతి ఏవమేత్థ పచ్చయుప్పన్నతోపి విఞ్ఞాతబ్బో వినిచ్ఛయోతి.

నిస్సయపచ్చయనిద్దేసవణ్ణనా.