౧౮. మగ్గపచ్చయనిద్దేసవణ్ణనా

౧౮. మగ్గపచ్చయనిద్దేసే మగ్గఙ్గానీతి అహేతుకచిత్తుప్పాదవజ్జేసు సేసచిత్తేసు ఉప్పన్నాని పఞ్ఞా, వితక్కో, సమ్మావాచాకమ్మన్తాజీవా, వీరియం, సతి, సమాధి, మిచ్ఛాదిట్ఠి, మిచ్ఛావాచాకమ్మన్తాజీవాతి ఇమాని ద్వాదసఙ్గాని. మగ్గస్స పన హేతుపచ్ఛిమకత్తా అహేతుకచిత్తేసు మగ్గఙ్గాని న ఉద్ధటాని. తంసముట్ఠానానన్తి ఇధాపి కటత్తారూపం సఙ్గహితమేవ. వుత్తఞ్హేతం పఞ్హావారే – ‘‘పటిసన్ధిక్ఖణే విపాకాబ్యాకతాని మగ్గఙ్గాని సమ్పయుత్తకానం ఖన్ధానం కటత్తా చ రూపానం మగ్గపచ్చయేన పచ్చయో’’తి. అయం తావేత్థ పాళివణ్ణనా.

అయం పన మగ్గపచ్చయో ద్వాదసన్నం మగ్గఙ్గానం వసేన ఠితోపి జాతిభేదతో కుసలాదివసేన చతుధా, కుసలాదీనఞ్చ కామావచరాదిభూమిభేదతో ద్వాదసధా భిజ్జతీతి ఏవమేత్థ నానప్పకారభేదతో విఞ్ఞాతబ్బో వినిచ్ఛయో. ఏవం భిన్నే పనేత్థ చతుభూమకమ్పి కుసలమగ్గఙ్గం పఞ్చవోకారే సమ్పయుత్తధమ్మానఞ్చేవ చిత్తసముట్ఠానరూపస్స చ, ఠపేత్వా రూపావచరం అవసేసం ఆరుప్పే సమ్పయుత్తధమ్మానఞ్ఞేవ మగ్గపచ్చయేన పచ్చయోతి సబ్బం ఝానపచ్చయే వియ విత్థారేతబ్బన్తి ఏవమేత్థ పచ్చయుప్పన్నతోపి విఞ్ఞాతబ్బో వినిచ్ఛయోతి.

మగ్గపచ్చయనిద్దేసవణ్ణనా.