౧౫. ఆహారపచ్చయనిద్దేసవణ్ణనా

౧౫. ఆహారపచ్చయనిద్దేసే కబళీకారో ఆహారోతి చతుసన్తతిసముట్ఠానే రూపే ఓజా ఆహారో నామ. సో పన యస్మా కబళం కరిత్వా అజ్ఝోహరితోవ ఆహారకిచ్చం కరోతి, న బహి ఠితో, తస్మా ఆహారోతి అవత్వా ‘‘కబళీకారో ఆహారో’’తి వుత్తం. కబళం కరిత్వా అజ్ఝోహరితబ్బవత్థుకత్తా వా కబళీకారోతి నామమేతం తస్స. అరూపినో ఆహారాతి ఫస్సచేతనావిఞ్ఞాణాహారా. తంసముట్ఠానానన్తి ఇధాపి కమ్మసముట్ఠానాని గహితానేవ. వుత్తఞ్హేతం పఞ్హావారే – పటిసన్ధిక్ఖణే విపాకాబ్యాకతా ఆహారా సమ్పయుత్తకానం ఖన్ధానం కటత్తా చ రూపానం ఆహారపచ్చయేన పచ్చయోతి. అయం తావేత్థ పాళివణ్ణనా.

అయం పన ఆహారపచ్చయో సఙ్ఖేపతో కబళీకారో ఆహారో, ఫస్సో, చేతనా, విఞ్ఞాణన్తి చత్తారోవ ధమ్మా హోన్తి. తత్థ ఠపేత్వా కబళీకారాహారం సేసా తయో అరూపాహారా జాతివసేన కుసలాకుసలవిపాకకిరియభేదతో చతుధా భిజ్జన్తి. పున భూమిభేదేన కుసలో చతుధా, అకుసలో ఏకధా, విపాకో చతుధా, కిరియా తిధాతి ఏవం అనేకధా భిజ్జన్తి. కబళీకారాహారో పన జాతితో అబ్యాకతో, భూమితో కామావచరోవాతి ఏవమేత్థ నానప్పకారభేదతో విఞ్ఞాతబ్బో వినిచ్ఛయో.

ఏవం భిన్నే పనేత్థ చతుభూమకాపి తయో కుసలాహారా పఞ్చవోకారే అత్తనా సమ్పయుత్తధమ్మానఞ్చేవ చిత్తసముట్ఠానరూపస్స చ ఆహారపచ్చయేన పచ్చయో, ఠపేత్వా పన రూపావచరం అవసేసా ఆరుప్పే సమ్పయుత్తధమ్మానఞ్ఞేవ ఆహారపచ్చయేన పచ్చయో. అకుసలాహారేసుపి ఏసేవ నయో. చతుభూమకవిపాకాహారా పన సబ్బత్థ సమ్పయుత్తకానం ఆహారపచ్చయా హోన్తి. కామావచరరూపావచరవిపాకా పనేత్థ పఞ్చవోకారే ఉప్పజ్జమానా పవత్తే చిత్తసముట్ఠానరూపస్స పటిసన్ధియం కటత్తారూపస్సాపి ఆహారపచ్చయా హోన్తి. లోకుత్తరా పన చిత్తసముట్ఠానరూపస్సేవ, ఆరుప్పే ఉప్పన్నా రూపస్స పచ్చయా న హోన్తి. తేభూమకాపి తయో కిరియాహారా పఞ్చవోకారే సమ్పయుత్తధమ్మానఞ్చేవ చిత్తసముట్ఠానరూపస్స చ, కామావచరారూపావచరా పన ఆరుప్పే సమ్పయుత్తధమ్మానఞ్ఞేవ ఆహారపచ్చయేన పచ్చయో. చతుసన్తతిసముట్ఠానో కబళీకారాహారో కిఞ్చాపి ‘‘ఇమస్స కాయస్సా’’తి అవిసేసతో వుత్తో, విసేసతో పనాయమేత్థ ఆహారసముట్ఠానరూపస్స జనకో చేవ అనుపాలకో చ హుత్వా ఆహారపచ్చయేన పచ్చయో హోతి, సేసతిసన్తతిసముట్ఠానస్స అనుపాలకోవ హుత్వా ఆహారపచ్చయేన పచ్చయో హోతీతి ఏవమేత్థ పచ్చయుప్పన్నతోపి విఞ్ఞాతబ్బో వినిచ్ఛయోతి.

ఆహారపచ్చయనిద్దేసవణ్ణనా.