౮. పతిరూపకథావణ్ణనా

౯౧౫-౯౧౬. ఇదాని రాగపతిరూపకథా నామ హోతి. తత్థ మేత్తాకరుణాముదితాయో సన్ధాయ ‘‘న రాగో రాగపతిరూపకో’’తి చ ఇస్సామచ్ఛరియకుక్కుచ్చాని సన్ధాయ ‘‘న దోసో దోసపతిరూపకో’’తి చ హసితుప్పాదం సన్ధాయ ‘‘న మోహో మోహపతిరూపకో’’తి చ దుమ్మఙ్కూనం పుగ్గలానం నిగ్గహం పేసలానం భిక్ఖూనం అనుగ్గహం పాపగరహితం కల్యాణపసంసం ఆయస్మతో పిలిన్దవచ్ఛస్స వసలవాదం భగవతో ఖేళాసకవాదం మోఘపురిసవాదఞ్చ సన్ధాయ ‘‘న కిలేసో కిలేసపతిరూపకో’’తి చ యేసం లద్ధి, సేయ్యథాపి అన్ధకానం; తే సన్ధాయ సబ్బకథాసు పుచ్ఛా సకవాదిస్స, పటిఞ్ఞా ఇతరస్స. అథ నం యస్మా ఫస్సాదిపతిరూపకా నఫస్సాదయో నామ నత్థి, తస్మా రాగాదిపతిరూపకా నరాగాదయోపి నత్థీతి చోదేతుం అత్థి న ఫస్సోతిఆదిమాహ. ఇతరో తేసం అభావా పటిక్ఖిపతి. సేసం సబ్బత్థ ఉత్తానత్థమేవాతి.

పతిరూపకథావణ్ణనా.