౨. కుసలచిత్తకథావణ్ణనా

౮౯౪-౮౯౫. ఇదాని కుసలచిత్తకథా నామ హోతి. తత్థ యస్మా అరహా సతివేపుల్లప్పత్తో పరినిబ్బాయన్తోపి సతో సమ్పజానోవ పరినిబ్బాతి, తస్మా కుసలచిత్తో పరినిబ్బాయతీతి యేసం లద్ధి, సేయ్యథాపి అన్ధకానం; తే సన్ధాయ పుచ్ఛా సకవాదిస్స, పటిఞ్ఞా ఇతరస్స. అథ నం యస్మా కుసలచిత్తో నామ పుఞ్ఞాభిసఙ్ఖారాభిసఙ్ఖరణాదివసేన హోతి, తస్మా తేనత్థేన చోదేతుం అరహా పుఞ్ఞాభిసఙ్ఖారన్తిఆదిమాహ. సేసమేత్థ యథాపాళిమేవ నియ్యాతి. సతో సమ్పజానోతి ఇదం జవనక్ఖణే కిరియసతిసమ్పజఞ్ఞానం వసేన అసమ్మోహమరణదీపనత్థం వుత్తం, న కుసలచిత్తదీపనత్థం. తస్మా అసాధకన్తి.

కుసలచిత్తకథావణ్ణనా.