౩. ఆనేఞ్జకథావణ్ణనా

౮౯౬. ఇదాని ఆనేఞ్జకథా నామ హోతి. తత్థ భగవా చతుత్థజ్ఝానే ఠితో పరినిబ్బాయీతి సల్లక్ఖేత్వా ‘‘అరహా ఆనేఞ్జే ఠితో పరినిబ్బాయతీ’’తి యేసం లద్ధి, సేయ్యథాపి ఏకచ్చానం ఉత్తరాపథకానం, తే సన్ధాయ పుచ్ఛా సకవాదిస్స, పటిఞ్ఞా ఇతరస్స. పకతిచిత్తేతి భవఙ్గచిత్తే. సబ్బే హి సఞ్ఞినో సత్తా భవఙ్గచిత్తే ఠత్వా భవఙ్గపరియోసానేన చుతిచిత్తేన కాలం కరోన్తి. ఇతి నం ఇమినా అత్థేన చోదేతుం ఏవమాహ. తత్థ కిఞ్చాపి చతువోకారభవే అరహతో పకతిచిత్తమ్పి ఆనేఞ్జం హోతి, అయం పన పఞ్హో పఞ్చవోకారభవవసేన ఉద్ధటో. తస్మా నో చ వత రే వత్తబ్బేతి ఆహ. సేసమేత్థ ఉత్తానత్థమేవాతి.

ఆనేఞ్జకథావణ్ణనా.