౮. కమ్మకథావణ్ణనా

౮౮౯-౮౯౧. ఇదాని కమ్మకథా నామ హోతి. తత్థ ‘‘యస్మా దిట్ఠధమ్మవేదనీయాదీని దిట్ఠధమ్మవేదనీయట్ఠాదీహి నియతాని, తస్మా సబ్బే కమ్మా నియతా’’తి యేసం లద్ధి, సేయ్యథాపి తేసఞ్ఞేవ; తే సన్ధాయ పుచ్ఛా సకవాదిస్స, పటిఞ్ఞా ఇతరస్స. దిట్ఠధమ్మవేదనీయట్ఠేన నియతన్తి ఏత్థ దిట్ఠధమ్మవేదనీయం దిట్ఠధమ్మవేదనీయట్ఠమేవ. సచే దిట్ఠేవ ధమ్మే విపాకం దాతుం సక్కోతి దేతి, నో చే అహోసికమ్మం నామ హోతీతి ఇమమత్థం సన్ధాయ పటిఞ్ఞా సకవాదిస్స. మిచ్ఛత్తసమ్మత్తనియామవసేన పనేతం అనియతమేవాతి సబ్బం హేట్ఠా వుత్తనయేనేవ వేదితబ్బన్తి.

కమ్మకథావణ్ణనా.

ఏకవీసతిమో వగ్గో.