౩. సఞ్ఞోజనకథావణ్ణనా

౮౮౧-౮౮౨. ఇదాని సఞ్ఞోజనకథా నామ హోతి. తత్థ యస్మా అరహా సబ్బం బుద్ధవిసయం న జానాతి, తస్మా తస్స తత్థ అవిజ్జావిచికిచ్ఛాహి అప్పహీనాహి భవితబ్బన్తి సఞ్ఞాయ ‘‘అత్థి కిఞ్చి సఞ్ఞోజనం అప్పహాయ అరహత్తప్పత్తీ’’తి యేసం లద్ధి, సేయ్యథాపి మహాసఙ్ఘికానం, తే సన్ధాయ పుచ్ఛా సకవాదిస్స, పటిఞ్ఞా ఇతరస్స. అత్థి కిఞ్చి సక్కాయదిట్ఠీతిఆది అరహతో సబ్బసంయోజనప్పహానదస్సనత్థం వుత్తం. సబ్బం బుద్ధవిసయన్తి పఞ్హద్వయే అరహతో సబ్బఞ్ఞుతఞ్ఞాణాభావేన పటిసేధో కతో, న అవిజ్జావిచికిచ్ఛానం అప్పహానేన. ఇతరో పన తేసం అప్పహీనతం సన్ధాయ తేన హీతి లద్ధిం పతిట్ఠపేతి. సా అయోనిసో పతిట్ఠాపితత్తా అప్పతిట్ఠితావ హోతీతి.

సఞ్ఞోజనకథావణ్ణనా.