౬. కుసలకథావణ్ణనా

౮౪౪-౮౪౬. ఇదాని కుసలకథా నామ హోతి. తత్థ అనవజ్జమ్పి కుసలం ఇట్ఠపాకమ్పి. అనవజ్జం నామ కిలేసవిప్పయుత్తం. అయం నయో ఠపేత్వా అకుసలం సబ్బధమ్మే భజతి. ఇట్ఠవిపాకం నామ ఆయతిం ఉపపత్తిపవత్తేసు ఇట్ఠఫలనిప్ఫాదకం పుఞ్ఞం. అయం నయో కుసలత్తికే ఆదిపదమేవ భజతి. యేసం పన ఇమం విభాగం అగ్గహేత్వా అనవజ్జభావమత్తేనేవ నిబ్బానం కుసలన్తి లద్ధి, సేయ్యథాపి అన్ధకానం, తేసం ఇట్ఠవిపాకట్ఠేన నిబ్బానస్స కుసలతాభావం దీపేతుం పుచ్ఛా సకవాదిస్స, అత్తనో లద్ధివసేన పటిఞ్ఞా ఇతరస్స. సేసమిధాపి హేట్ఠా వుత్తనయత్తా ఉత్తానత్థమేవాతి.

కుసలకథావణ్ణనా.