౨. ధమ్మదేసనాకథావణ్ణనా

౮౦౪-౮౦౬. ఇదాని ధమ్మదేసనాకథా నామ హోతి. తత్థ ‘‘తుసితపురే ఠితో భగవా ధమ్మదేసనత్థాయ అభినిమ్మితం పేసేసి, తేన చేవ తస్స చ దేసనం సమ్పటిచ్ఛిత్వా ఆయస్మతా ఆనన్దేన ధమ్మో దేసితో, న బుద్ధేన భగవతా’’తి యేసం లద్ధి, సేయ్యథాపి వేతుల్లకానఞ్ఞేవ; తే సన్ధాయ పుచ్ఛా సకవాదిస్స, పటిఞ్ఞా ఇతరస్స. అథ నం ‘‘యది తేన ధమ్మో దేసితో, స్వేవ సత్థా భవేయ్యా’’తి చోదేతుం అభినిమ్మితో జినోతిఆదిమాహ. ఇతరో తథా అసమ్పటిచ్ఛన్తో పటిక్ఖిపతి. సేసమేత్థ ఉత్తానత్థమేవాతి.

ధమ్మదేసనాకథావణ్ణనా.