౧౧. దక్ఖిణావిసుద్ధికథావణ్ణనా

౮౦౦-౮౦౧. ఇదాని దక్ఖిణావిసుద్ధికథా నామ హోతి. తత్థ ‘‘యది పటిగ్గాహకతో దక్ఖిణా విసుజ్ఝేయ్య, మహప్ఫలా భవేయ్య. దాయకేన దానం దిన్నం, పటిగ్గాహకేన విపాకో నిబ్బత్తితోతి అఞ్ఞో అఞ్ఞస్స కారకో భవేయ్య, పరంకతం సుఖదుక్ఖం ఆపజ్జేయ్య, అఞ్ఞో కరేయ్య, అఞ్ఞో పటిసంవేదేయ్య. తస్మా దాయకతోవ దానం విసుజ్ఝతి, నో పటిగ్గాహకతో, దాయకస్సేవ చిత్తవిసుద్ధి విపాకదాయికా హోతీ’’తి యేసం లద్ధి, సేయ్యథాపి ఉత్తరాపథకానం; తే సన్ధాయ పుచ్ఛా సకవాదిస్స, పటిఞ్ఞా ఇతరస్స. ఆహునేయ్యాతిఆది ‘‘యది పటిగ్గాహకతో దానం న విసుజ్ఝేయ్య, కిమస్స ఆహునేయ్యాదిభావో కరేయ్యా’’తి దస్సనత్థం వుత్తం. అఞ్ఞో అఞ్ఞస్స కారకోతి యది దాయకస్స దానచేతనా పటిగ్గాహకేన కతా భవేయ్య, యుత్తరూపం సియా. తస్స పన దానచేతనా పరిసుద్ధా పటిగ్గాహకసఙ్ఖాతం వత్థుం పటిచ్చ మహావిపాకట్ఠేన విసుజ్ఝతి, తస్మా అచోదనా ఏసా ‘‘పటిగ్గాహకతో దానం విసుజ్ఝతీ’’తి.

దక్ఖిణావిసుద్ధికథావణ్ణనా.

సత్తరసమో వగ్గో.