౩. సుఖానుప్పదానకథావణ్ణనా

౭౪౭-౭౪౮. ఇదాని సుఖానుప్పదానకథా నామ హోతి. తత్థ ‘‘బహూనం వత నో భగవా సుఖధమ్మానం ఉపహత్తా’’తి (మ. ని. ౨.౧౪౮) సుత్తం నిస్సాయ పరో పరస్స సుఖం అనుప్పదేతీతి యేసం లద్ధి, సేయ్యథాపి హేతువాదానం; తే సన్ధాయ పుచ్ఛా సకవాదిస్స, పటిఞ్ఞా ఇతరస్స. దుక్ఖం అనుప్పదేతీతి పుట్ఠో పన తాదిసం సుత్తపదం అపస్సన్తో పటిక్ఖిపతి. అత్తనో సుఖన్తిఆదిపఞ్హే యం అత్తనో పరస్స వా, తం అనుప్పదాతుం న సక్కా. యం తస్సేవ, కిం తత్థ అనుప్పదానం నామాతి పటిక్ఖిపతి. నేవత్తనోతిఆదిపఞ్హే పన యం ఏవరూపం, న తం అనుప్పదిన్నం నామ భవితుమరహతీతి లద్ధియాపటిజానాతి. నో చ వత రేతితాదిసస్స సుఖస్స అభావా వుత్తం. సుఖధమ్మానం ఉపహత్తాతివచనం భగవతో పరేసం సుఖుప్పత్తియా పచ్చయభావం దీపేతి, న అన్నాదీనం వియ సుఖస్స అనుప్పదానం, తస్మా అసాధకన్తి.

సుఖానుప్పదానకథావణ్ణనా.