౩. మూలకసుత్తవణ్ణనా

౮౩. తతియే సబ్బే ధమ్మాతి పఞ్చక్ఖన్ధా. ఛన్దమూలకాతి అజ్ఝాసయచ్ఛన్దో కత్తుకమ్యతాఛన్దో తం మూలం ఏతేసన్తి ఛన్దమూలకా. మనసికారతో సమ్భవన్తీతి మనసికారసమ్భవా. ఫస్సతో సముదేన్తి రాసీ భవన్తీతి ఫస్ససముదయా. వేదనాయ సమోసరన్తీతి వేదనాసమోసరణా. సమాధి ఏతేసం పముఖోతి సమాధిప్పముఖా. జేట్ఠకట్ఠేన సతి అధిపతి ఏతేసన్తి సతాధిపతేయ్యా, సతిజేట్ఠకాతి అత్థో. పఞ్ఞా ఉత్తరా ఏతేసన్తి పఞ్ఞుత్తరా. విముత్తి ఏవ సారో ఏతేసన్తి విముత్తిసారా. ఏత్థ చ ఛన్దమూలకాదయో చత్తారోపి లోకియా కథితా, సేసా లోకియలోకుత్తరమిస్సకాతి.