౪. చోరసుత్తవణ్ణనా

౮౪. చతుత్థే మహాచోరోతి రజ్జన్తరే దుబ్భితుం సమత్థో మహాచోరో. పరియాపజ్జతీతి పరియాదానం గచ్ఛతి. న చిరట్ఠితికో హోతీతి అద్ధానం పాలేన్తో ఠాతుం న సక్కోతి. అప్పహరన్తస్స పహరతీతి అత్తనో అవేరినే అప్పహరన్తే గుణసమ్పన్నే చ మహల్లకే చ తరుణదారకే చ అప్పహరితబ్బయుత్తకే పహరతి. అనవసేసం ఆదియతీతి నిస్సేసం గణ్హాతి. బ్యత్తచోరానఞ్హి ఇదం వత్తం – పరస్స ద్వీసు సాటకేసు ఏకో గహేతబ్బో, ఏకస్మిం సన్తే దుబ్బలం దత్వా థిరో గహేతబ్బో. పుటభత్తతణ్డులాదీసు ఏకం కోట్ఠాసం దత్వా ఏకో గహేతబ్బోతి. అచ్చాసన్నే కమ్మం కరోతీతి గామనిగమరాజధానీనం ఆసన్నట్ఠానే చోరికకమ్మం కరోతి. న చ నిధానకుసలో హోతీతి యం లద్ధం, తం దక్ఖిణేయ్యే నిదహితుం ఛేకో న హోతి, పరలోకమగ్గం న సోధేతి.