౧౦. దుచ్చరితవిపాకసుత్తవణ్ణనా

౪౦. దసమే పాణాతిపాతోతి పాణాతిపాతచేతనా. సబ్బలహుసోతి సబ్బలహుకో. అప్పాయుకసంవత్తనికోతి తేన పరిత్తకేన కమ్మవిపాకేన అప్పాయుకో హోతి, దిన్నమత్తాయ వా పటిసన్ధియా విలీయతి మాతుకుచ్ఛితో నిక్ఖన్తమత్తే వా. ఏవరూపో హి న అఞ్ఞస్స కస్సచి నిస్సన్దో, పాణాతిపాతస్సేవ గతమగ్గో ఏసోతి. భోగబ్యసనసంవత్తనికోతి యథా కాకణికామత్తమ్పి హత్థే న తిట్ఠతి, ఏవం భోగబ్యసనం సంవత్తేతి. సపత్తవేరసంవత్తనికో హోతీతి సహ సపత్తేహి వేరం సంవత్తేతి. తస్స హి సపత్తా చ బహుకా హోన్తి. యో చ నం పస్సతి, తస్మిం వేరమేవ ఉప్పాదేతి న నిబ్బాయతి. ఏవరూపో హి పరస్స రక్ఖితగోపితభణ్డే అపరాధస్స నిస్సన్దో.

అభూతబ్భక్ఖానసంవత్తనికో హోతీతి అభూతేన అబ్భక్ఖానం సంవత్తేతి, యేన కేనచి కతం తస్సేవ ఉపరి పతతి. మిత్తేహి భేదనసంవత్తనికోతి మిత్తేహి భేదం సంవత్తేతి. యం యం మిత్తం కరోతి, సో సో భిజ్జతియేవ. అమనాపసద్దసంవత్తనికోతి అమనాపసద్దం సంవత్తేతి. యా సా వాచా కణ్టకా కక్కసా కటుకా అభిసజ్జనీ మమ్మచ్ఛేదికా, గతగతట్ఠానే తమేవ సుణాతి, మనాపసద్దసవనం నామ న లభతి. ఏవరూపో ఫరుసవాచాయ గతమగ్గో నామ. అనాదేయ్యవాచాసంవత్తనికోతి అగ్గహేతబ్బవచనతం సంవత్తేతి, ‘‘త్వం కస్మా కథేసి, కో హి తవ వచనం గహేస్సతీ’’తి వత్తబ్బతం ఆపజ్జతి. అయం సమ్ఫప్పలాపస్స గతమగ్గో. ఉమ్మత్తకసంవత్తనికో హోతీతి ఉమ్మత్తకభావం సంవత్తేతి. తేన హి మనుస్సో ఉమ్మత్తో వా ఖిత్తచిత్తో వా ఏళమూగో వా హోతి. అయం సురాపానస్స నిస్సన్దో. ఇమస్మిం సుత్తే వట్టమేవ కథితన్తి.

దానవగ్గో చతుత్థో.