౫. ఉపోసథవగ్గో

౪. వాసేట్ఠసుత్తవణ్ణనా

౪౪. పఞ్చమస్స చతుత్థే ఇమే చేపి, వాసేట్ఠ, మహాసాలాతి పురతో ఠితే ద్వే సాలరుక్ఖే దస్సేన్తో పరికప్పోపమం ఆహ. ఇదం వుత్తం హోతి – ఇమే తావ మహాసాలా అచేతనా. సచే ఏతేపి సచేతనా హుత్వా అట్ఠఙ్గసమన్నాగతం ఉపోసథం ఉపవసేయ్యుం, ఏతేసమ్పి సో ఉపోసథవాసో దీఘరత్తం హితాయ సుఖాయ అస్స. భూతే పన వత్తబ్బమేవ నత్థీతి.

౬. అనురుద్ధసుత్తవణ్ణనా

౪౬. ఛట్ఠే యేనాయస్మా అనురుద్ధోతి తా కిర దేవతా అత్తనో సమ్పత్తిం ఓలోకేత్వా ‘‘కిం ను ఖో నిస్సాయ అయం సమ్పత్తి అమ్హేహి లద్ధా’’తి ఆవజ్జమానా థేరం దిస్వా ‘‘మయం అమ్హాకం అయ్యస్స పుబ్బే చక్కవత్తిరజ్జం కరోన్తస్స పాదపరిచారికా హుత్వా తేన దిన్నోవాదే ఠత్వా ఇమం సమ్పత్తిం లభిమ్హ, గచ్ఛామ థేరం ఆనేత్వా ఇమం సమ్పత్తిం అనుభవిస్సామా’’తి దివా యేనాయస్మా అనురుద్ధో తేనుపసఙ్కమింసు. తీసు ఠానేసూతి తీసు కారణేసు. ఠానసో పటిలభామాతి ఖణేనేవ లభామ. సరన్తి వచనసద్దం వా గీతసద్దం వా ఆభరణసద్దం వా. పీతా అస్సూతిఆదీని నీలా తావ జాతా, పీతా భవితుం న సక్ఖిస్సన్తీతిఆదినా నయేన చిన్తేత్వా వితక్కేతి. తాపి ‘‘ఇదాని అయ్యో అమ్హాకం పీతభావం ఇచ్ఛతి, ఇదాని లోహితభావ’’న్తి తాదిసావ అహేసుం.

అచ్ఛరం వాదేసీతి పాణితలం వాదేసి. పఞ్చఙ్గికస్సాతి ఆతతం, వితతం, ఆతతవితతం, ఘనం, సుసిరన్తి ఇమేహి పఞ్చహి అఙ్గేహి సమన్నాగతస్స. తత్థ ఆతతం నామ చమ్మపరియోనద్ధేసు భేరిఆదీసు ఏకతలతూరియం, వితతం నామ ఉభయతలం, ఆతతవితతం నామ సబ్బసో పరియోనద్ధం, సుసిరం వంసాది, ఘనం సమ్మాది. సువినీతస్సాతి ఆకడ్ఢనసిథిలకరణాదీహి సముచ్ఛితస్స. సుప్పటిపతాళితస్సాతి పమాణే ఠితభావజాననత్థం సుట్ఠు పటిపతాళితస్స. కుసలేహి సుసమన్నాహతస్సాతి యే వాదేతుం కుసలా ఛేకా, తేహి వాదితస్స. వగ్గూతి ఛేకో సున్దరో. రజనీయోతి రఞ్జేతుం సమత్థో. కమనీయోతి కామేతబ్బయుత్తో. ఖమనీయోతి వా పాఠో, దివసమ్పి సుయ్యమానో ఖమతేవ, న నిబ్బిన్దతీతి అత్థో. మదనీయోతి మానమదపురిసమదజననో. ఇన్ద్రియాని ఓక్ఖిపీతి ‘‘అసారుప్పం ఇమా దేవతా కరోన్తీ’’తి ఇన్ద్రియాని హేట్ఠా ఖిపి, న అక్ఖీని ఉమ్మీలేత్వా ఓలోకేసి. న ఖ్వయ్యో అనురుద్ధో సాదియతీతి ‘‘మయం నచ్చామ గాయామ, అయ్యో పన అనురుద్ధో న ఖో సాదియతి, అక్ఖీని ఉమ్మీలేత్వా న ఓలోకేతి, కిం మయం నచ్చిత్వా వా గాయిత్వా వా కరిస్సామా’’తి తత్థేవ అన్తరధాయింసు. యేన భగవా తేనుపసఙ్కమీతి తాసం దేవతానం ఆనుభావం దిస్వా ‘‘కతిహి ను ఖో ధమ్మేహి సమన్నాగతో మాతుగామో మనాపకాయికే దేవలోకే నిబ్బత్తతీ’’తి ఇమమత్థం పుచ్ఛితుం ఉపసఙ్కమి.

౯-౧౦. ఇధలోకికసుత్తద్వయవణ్ణనా

౪౯-౫౦. నవమే అయం’స లోకో ఆరద్ధో హోతీతి అయమస్స లోకో ఇధలోకే కరణమత్తాయ ఆరద్ధత్తా పరిపుణ్ణత్తా ఆరద్ధో హోతి పరిపుణ్ణో. సోళసాకారసమ్పన్నాతి సుత్తే వుత్తేహి అట్ఠహి, గాథాసు అట్ఠహీతి సోళసహి ఆకారేహి సమన్నాగతా, యాని వా అట్ఠఙ్గాని పరమ్పి తేసు సమాదపేతీతి ఏవమ్పి సోళసాకారసమ్పన్నాతి ఏకే. సద్ధాసీలపఞ్ఞా పనేత్థ మిస్సికా కథితా. దసమం భిక్ఖుసఙ్ఘస్స కథితం. సబ్బసుత్తేసు పన యం న వుత్తం, తం హేట్ఠా ఆగతనయత్తా ఉత్తానత్థమేవాతి.

ఉపోసథవగ్గో పఞ్చమో.