౧౦. దుతియమరణస్సతిసుత్తవణ్ణనా

౨౦. దసమే పతిగతాయాతి పటిపన్నాయ. ఇతి పటిసఞ్చిక్ఖతీతి ఏవం పచ్చవేక్ఖతి. సో మమస్స అన్తరాయోతి ఏత్థ తివిధో అన్తరాయో జీవితన్తరాయో, సమణధమ్మన్తరాయో, పుథుజ్జనకాలకిరియం కరోన్తస్స సగ్గన్తరాయో చేవ మగ్గన్తరాయో చాతి. తం సబ్బమ్పి సన్ధాయేవమాహ. బ్యాపజ్జేయ్యాతి అజిణ్ణకాదివసేన విపజ్జేయ్య. అధిమత్తోతి బలవా. ఛన్దోతి కత్తుకమ్యతాఛన్దో. వాయామోతి పయోగవీరియం. ఉస్సాహోతి ఉస్సాపనవీరియం. ఉస్సోళ్హీతి సమ్పాదనవీరియం. అప్పటివానీతి అనుక్కణ్ఠనా అప్పటిసఙ్ఘరణా. సేసం సబ్బత్థ ఉత్తానత్థమేవాతి.

సారణీయవగ్గో దుతియో.