౩. సఙ్గారవసుత్తవణ్ణనా

౧౯౩. తతియే పగేవాతి పఠమఞ్ఞేవ. కామరాగపరియుట్ఠితేనాతి కామరాగగ్గహితేన. కామరాగపరేతేనాతి కామరాగానుగతేన. నిస్సరణన్తి తివిధం కామరాగస్స నిస్సరణం విక్ఖమ్భననిస్సరణం, తదఙ్గనిస్సరణం, సముచ్ఛేదనిస్సరణన్తి. తత్థ అసుభే పఠమజ్ఝానం విక్ఖమ్భననిస్సరణం నామ, విపస్సనా తదఙ్గనిస్సరణం నామ, అరహత్తమగ్గో సముచ్ఛేదనిస్సరణం నామ. తం తివిధమ్పి నప్పజానాతీతి అత్థో. అత్తత్థమ్పీతిఆదీసు అరహత్తసఙ్ఖాతో అత్తనో అత్థో అత్తత్థో నామ, పచ్చయదాయకానం అత్థో పరత్థో నామ, స్వేవ దువిధో ఉభయత్థో నామ. ఇమినా నయేన సబ్బవారేసు అత్థో వేదితబ్బో.

అయం పన విసేసో – బ్యాపాదస్స నిస్సరణన్తిఆదీసు హి ద్వేవ నిస్సరణాని విక్ఖమ్భననిస్సరణఞ్చ సముచ్ఛేదనిస్సరణఞ్చ. తత్థ బ్యాపాదస్స తావ మేత్తాయ పఠమజ్ఝానం విక్ఖమ్భననిస్సరణం నామ, అనాగామిమగ్గో సముచ్ఛేదనిస్సరణం, థినమిద్ధస్స ఆలోకసఞ్ఞా విక్ఖమ్భననిస్సరణం, అరహత్తమగ్గో సముచ్ఛేదనిస్సరణం. ఉద్ధచ్చకుక్కుచ్చస్స యో కోచి సమథో విక్ఖమ్భననిస్సరణం, ఉద్ధచ్చస్స పనేత్థ అరహత్తమగ్గో, కుక్కుచ్చస్స అనాగామిమగ్గో సముచ్ఛేదనిస్సరణం. విచికిచ్ఛాయ ధమ్మవవత్థానం విక్ఖమ్భననిస్సరణం, పఠమమగ్గో సముచ్ఛేదనిస్సరణం.

యా పనేత్థ సేయ్యథాపి, బ్రాహ్మణ, ఉదపత్తో సంసట్ఠో లాఖాయ వాతిఆదికా ఉపమా వుత్తా, తాసు ఉదపత్తోతి ఉదకభరితా పాతి. సంసట్ఠోతి వణ్ణభేదకరణవసేన సంసట్ఠో. ఉక్కుధితోతి కుధితో. ఉస్సదకజాతోతి ఉసుమకజాతో. సేవాలపణకపరియోనద్ధోతి తిలబీజకాదిభేదేన సేవాలేన వా నీలమణ్డూకపిట్ఠివణ్ణేన వా ఉదకపిట్ఠిం ఛాదేత్వా నిబ్బత్తేన పణకేన పరియోనద్ధో. వాతేరితోతి వాతేన ఏరితో కమ్పితో. ఆవిలోతి అప్పసన్నో. లుళితోతి అసన్నిసిన్నో. కలలీభూతోతి కద్దమీభూతో. అన్ధకారే నిక్ఖిత్తోతి కోట్ఠకన్తరాదిభేదే అనాలోకట్ఠానే ఠపితో. ఇమస్మిం సుత్తే భగవా తీహి భవేహి దేసనం నివట్టేత్వా అరహత్తనికూటేన నిట్ఠపేసి, బ్రాహ్మణో పన సరణమత్తే పతిట్ఠితోతి.