౩. సిక్ఖానిసంససుత్తవణ్ణనా

౨౪౫. తతియే సిక్ఖా ఆనిసంసా ఏత్థాతి సిక్ఖానిసంసం. పఞ్ఞా ఉత్తరా ఏత్థాతి పఞ్ఞుత్తరం. విముత్తి సారో ఏత్థాతి విముత్తిసారం. సతి ఆధిపతేయ్యా ఏత్థాతి సతాధిపతేయ్యం. ఏతేసం హి సిక్ఖాదిసఙ్ఖాతానం ఆనిసంసాదీనం అత్థాయ వుస్సతీతి వుత్తం హోతి. ఆభిసమాచారికాతి ఉత్తమసమాచారికా. వత్తవసేన పఞ్ఞత్తసీలస్సేతం అధివచనం. తథా తథా సో తస్సా సిక్ఖాయాతి తథా తథా సో సిక్ఖాకామో భిక్ఖు తస్మిం సిక్ఖాపదే.

ఆదిబ్రహ్మచరియికాతి మగ్గబ్రహ్మచరియస్స ఆదిభూతానం చతున్నం మహాసీలానమేతం అధివచనం. సబ్బసోతి సబ్బాకారేన. ధమ్మాతి చతుసచ్చధమ్మా. పఞ్ఞాయ సమవేక్ఖితా హోన్తీతి సహవిపస్సనాయ మగ్గపఞ్ఞాయ సుదిట్ఠా హోన్తి. విముత్తియా ఫుసితా హోన్తీతి అరహత్తఫలవిముత్తియా ఞాణఫస్సేన ఫుట్ఠా హోన్తి. అజ్ఝత్తంయేవ సతి సూపట్ఠితా హోతీతి నియకజ్ఝత్తేయేవ సతి సుట్ఠు ఉపట్ఠితా హోతి. పఞ్ఞాయ అనుగ్గహేస్సామీతి విపస్సనాపఞ్ఞాయ అనుగ్గహేస్సామి. పఞ్ఞాయ సమవేక్ఖిస్సామీతి ఇధాపి విపస్సనాపఞ్ఞా అధిప్పేతా. ఫుసితం వా ధమ్మం తత్థ తత్థ పఞ్ఞాయ అనుగ్గహేస్సామీతి ఏత్థ పన మగ్గపఞ్ఞావ అధిప్పేతా.