౬. కప్పసుత్తవణ్ణనా

౧౫౬. ఛట్ఠే సంవట్టతీతి ఏత్థ తయో సంవట్టా ఆపోసంవట్టో, తేజోసంవట్టో, వాయోసంవట్టోతి. తిస్సో సంవట్టసీమా ఆభస్సరా, సుభకిణ్హా, వేహప్ఫలాతి. యదా కప్పో తేజేన సంవట్టతి, ఆభస్సరతో హేట్ఠా అగ్గినా డయ్హతి. యదా ఆపేన సంవట్టతి, సుభకిణ్హతో హేట్ఠా ఉదకేన విలీయతి. యదా వాతేన సంవట్టతి, వేహప్ఫలతో హేట్ఠా వాతేన విద్ధంసతి. విత్థారతో పన సదాపి ఏకం బుద్ధక్ఖేత్తం వినస్సతి. అయమేత్థ సఙ్ఖేపో, విత్థారకథా పన విసుద్ధిమగ్గే (విసుద్ధి. ౨.౪౦౩-౪౦౪ ఆదయో) వుత్తనయేనేవ వేదితబ్బా.