౧౦. సుగతవినయసుత్తవణ్ణనా

౧౬౦. దసమే దుగ్గహితన్తి ఉప్పటిపాటియా గహితం. పరియాపుణన్తీతి వళఞ్జేన్తి కథేన్తి. పదబ్యఞ్జనేహీతి ఏత్థ పదమేవ అత్థస్స బ్యఞ్జనతో బ్యఞ్జనన్తి వుత్తం. దున్నిక్ఖిత్తస్సాతి దుట్ఠు నిక్ఖిత్తస్స ఉప్పటిపాటియా ఠపితస్స. అత్థోపి దున్నయో హోతీతి అట్ఠకథా నీహరిత్వా కథేతుం న సక్కా హోతి. ఛిన్నమూలకోతి మూలభూతానం భిక్ఖూనం ఉపచ్ఛిన్నత్తా ఛిన్నమూలకో. అప్పటిసరణోతి అప్పతిట్ఠో. బాహులికాతి పచ్చయబాహుల్లాయ పటిపన్నా. సాథలికాతి తిస్సో సిక్ఖా సిథిలగ్గహణేన గణ్హనకా. ఓక్కమనే పుబ్బఙ్గమాతి పఞ్చ నీవరణాని అవగమనతో ఓక్కమనన్తి వుచ్చన్తి, తత్థ పుబ్బఙ్గమాతి అత్థో. పవివేకేతి తివిధే వివేకే. నిక్ఖిత్తధురాతి నిబ్బీరియా. ఇమినా నయేన పన సబ్బత్థ అత్థో వేదితబ్బో.

ఇన్ద్రియవగ్గో పఠమో.