౪. పరిసాసుత్తవణ్ణనా

౯౬. చతుత్థే న బాహులికా హోన్తీతి పచ్చయబాహుల్లికా న హోన్తి. న సాథలికాతి తిస్సో సిక్ఖా సిథిలం కత్వా న గణ్హన్తి. ఓక్కమనే నిక్ఖిత్తధురాతి ఓక్కమనం వుచ్చతి అవగమనట్ఠేన పఞ్చ నీవరణాని, తేసు నిక్ఖిత్తధురా. పవివేకే పుబ్బఙ్గమాతి కాయచిత్తఉపధివివేకసఙ్ఖాతే తివిధేపి వివేకే పుబ్బఙ్గమా. వీరియం ఆరభన్తీతి దువిధమ్పి వీరియం పగ్గణ్హన్తి. అప్పత్తస్సాతి ఝానవిపస్సనామగ్గఫలసఙ్ఖాతస్స అప్పత్తవిసేసస్స. సేసపదద్వయేపి ఏసేవ నయో. పచ్ఛిమా జనతాతి సద్ధివిహారికఅన్తేవాసికాదయో. దిట్ఠానుగతిం ఆపజ్జతీతి ఆచరియుపజ్ఝాయేహి కతం అనుకరోతి. యం తాయ జనతాయ ఆచరియుపజ్ఝాయేసు దిట్ఠం, తస్స అనుగతిం ఆపజ్జతి నామ. అయం వుచ్చతి, భిక్ఖవే, అగ్గవతీ పరిసాతి, భిక్ఖవే, అయం పరిసా అగ్గపుగ్గలవతీ నామ వుచ్చతి.

భణ్డనజాతాతి జాతభణ్డనా. కలహజాతాతి జాతకలహా. భణ్డనన్తి చేత్థ కలహస్స పుబ్బభాగో, హత్థపరామాసాదివసేన వీతిక్కమో కలహో నామ. వివాదాపన్నాతి విరుద్ధవాదం ఆపన్నా. ముఖసత్తీహీతి గుణవిజ్ఝనట్ఠేన ఫరుసా వాచా ‘‘ముఖసత్తియో’’తి వుచ్చన్తి, తాహి ముఖసత్తీహి. వితుదన్తా విహరన్తీతి విజ్ఝన్తా విచరన్తి.

సమగ్గాతి సహితా. సమ్మోదమానాతి సమప్పవత్తమోదా. ఖీరోదకీభూతాతి ఖీరోదకం వియ భూతా. పియచక్ఖూహీతి ఉపసన్తేహి మేత్తచక్ఖూహి. పీతి జాయతీతి పఞ్చవణ్ణా పీతి ఉప్పజ్జతి. కాయో పస్సమ్భతీతి నామకాయోపి రూపకాయోపి విగతదరథో హోతి. పస్సద్ధకాయోతి అసారద్ధకాయో. సుఖం వేదియతీతి కాయికచేతసికసుఖం వేదియతి. సమాధియతీతి ఆరమ్మణే సమ్మా ఠపీయతి.

థుల్లఫుసితకేతి మహాఫుసితకే. పబ్బతకన్దరపదరసాఖాతి ఏత్థ కన్దరో నామ ‘‘క’’న్తి లద్ధనామేన ఉదకేన దారితో ఉదకభిన్నో పబ్బతప్పదేసో, యో ‘‘నితమ్భో’’తిపి ‘‘నదికుఞ్జో’’తిపి వుచ్చతి. పదరం నామ అట్ఠ మాసే దేవే అవస్సన్తే ఫలితో భూమిప్పదేసో. సాఖాతి కుసోబ్భగామినియో ఖుద్దకమాతికాయో. కుసోబ్భాతి ఖుద్దకఆవాటా. మహాసోబ్భాతి మహాఆవాటా. కున్నదియోతి ఖుద్దకనదియో. మహానదియోతి గఙ్గాయమునాదికా మహాసరితా.