౨. పవివేకసుత్తవణ్ణనా

౯౪. దుతియే చీవరపవివేకన్తి చీవరం నిస్సాయ ఉప్పజ్జనకకిలేసేహి వివిత్తభావం. సేసద్వయేపి ఏసేవ నయో. సాణానీతి సాణవాకచేలాని. మసాణానీతి మిస్సకచేలాని. ఛవదుస్సానీతి మతసరీరతో ఛడ్డితవత్థాని, ఏరకతిణాదీని వా గన్థేత్వా కతనివాసనాని. పంసుకూలానీతి పథవియం ఛడ్డితనన్తకాని. తిరీటానీతి రుక్ఖతచవత్థాని. అజినానీతి అజినమిగచమ్మాని. అజినక్ఖిపన్తి తదేవ మజ్ఝే ఫాలితం, సహఖురకన్తిపి వదన్తి. కుసచీరన్తి కుసతిణాని గన్థేత్వా కతచీరం. వాకచీరఫలకచీరేసుపి ఏసేవ నయో. కేసకమ్బలన్తి మనుస్సకేసేహి కతకమ్బలం. వాలకమ్బలన్తి అస్సవాలాదీహి కతకమ్బలం. ఉలూకపక్ఖికన్తి ఉలూకపత్తాని గన్థేత్వా కతనివాసనం.

సాకభక్ఖాతి అల్లసాకభక్ఖా. సామాకభక్ఖాతి సామాకతణ్డులభక్ఖా. నీవారాదీసు నీవారా నామ అరఞ్ఞే సయం జాతవీహిజాతి. దద్దులన్తి చమ్మకారేహి చమ్మం లిఖిత్వా ఛడ్డితకసటం. హటం వుచ్చతి సిలేసోపి సేవాలోపి కణికారాదిరుక్ఖనియ్యాసోపి. కణన్తి కుణ్డకం. ఆచామోతి భత్తఉక్ఖలికాయ లగ్గో ఝామఓదనో. తం ఛడ్డితట్ఠానే గహేత్వా ఖాదన్తి, ఓదనకఞ్జియన్తిపి వదన్తి. పిఞ్ఞాకాదయో పాకటావ. పవత్తఫలభోజీతి పతితఫలభోజీ. భుసాగారన్తి ఖలసాలం.

సీలవాతి చతుపారిసుద్ధిసీలేన సమన్నాగతో. దుస్సీల్యఞ్చస్స పహీనం హోతీతి పఞ్చ దుస్సీల్యాని పహీనాని హోన్తి. సమ్మాదిట్ఠికోతి యాథావదిట్ఠికో. మిచ్ఛాదిట్ఠీతి అయాథావదిట్ఠి. ఆసవాతి చత్తారో ఆసవా. అగ్గప్పత్తోతి సీలగ్గప్పత్తో. సారప్పత్తోతి సీలసారం పత్తో. సుద్ధోతి పరిసుద్ధో. సారే పతిట్ఠితోతి సీలసమాధిపఞ్ఞాసారే పతిట్ఠితో.

సేయ్యథాపీతి యథా నామ. సమ్పన్నన్తి పరిపుణ్ణం పరిపక్కసాలిభరితం. సఙ్ఘరాపేయ్యాతి సఙ్కడ్ఢాపేయ్య. ఉబ్బహాపేయ్యాతి ఖలట్ఠానం ఆహరాపేయ్య. భుసికన్తి భుసం. కోట్టాపేయ్యాతి ఉదుక్ఖలే పక్ఖిపాపేత్వా ముసలేహి పహరాపేయ్య. అగ్గప్పత్తానీతి తణ్డులగ్గం పత్తాని. సారప్పత్తాదీసుపి ఏసేవ నయో. సేసం ఉత్తానమేవ. యం పనేత్థ ‘‘దుస్సీల్యఞ్చస్స పహీనం మిచ్ఛాదిట్ఠి చస్స పహీనా’’తి వుత్తం, తం సోతాపత్తిమగ్గేన పహీనభావం సన్ధాయ వుత్తన్తి వేదితబ్బం.