(౯) ౪. సమణవగ్గో

౧. సమణసుత్తవణ్ణనా

౮౨. చతుత్థస్స పఠమే సమణియానీతి సమణసన్తకాని. సమణకరణీయానీతి సమణేన కత్తబ్బకిచ్చాని. అధిసీలసిక్ఖాసమాదానన్తిఆదీసు సమాదానం వుచ్చతి గహణం, అధిసీలసిక్ఖాయ సమాదానం గహణం పూరణం అధిసీలసిక్ఖాసమాదానం. సేసపదద్వయేపి ఏసేవ నయో. ఏత్థ చ సీలం అధిసీలం, చిత్తం అధిచిత్తం, పఞ్ఞా అధిపఞ్ఞాతి అయం విభాగో వేదితబ్బో. తత్థ పఞ్చసీలం సీలం నామ, తం ఉపాదాయ దససీలం అధిసీలం నామ, తమ్పి ఉపాదాయ చతుపారిసుద్ధిసీలం అధిసీలం నామ. అపిచ సబ్బమ్పి లోకియసీలం సీలం నామ, లోకుత్తరసీలం అధిసీలం, తదేవ సిక్ఖితబ్బతో సిక్ఖాతి వుచ్చతి. కామావచరచిత్తం పన చిత్తం నామ, తం ఉపాదాయ రూపావచరం అధిచిత్తం నామ, తమ్పి ఉపాదాయ అరూపావచరం అధిచిత్తం నామ. అపిచ సబ్బమ్పి లోకియచిత్తం చిత్తమేవ, లోకుత్తరం అధిచిత్తం. పఞ్ఞాయపి ఏసేవ నయో. తస్మాతి యస్మా ఇమాని తీణి సమణకరణీయాని, తస్మా. తిబ్బోతి బహలో. ఛన్దోతి కత్తుకమ్యతాకుసలచ్ఛన్దో. ఇతి ఇమస్మిం సుత్తన్తే తిస్సో సిక్ఖా లోకియలోకుత్తరా కథితాతి.

౨. గద్రభసుత్తవణ్ణనా

౮౩. దుతియే పిట్ఠితో పిట్ఠితోతి పచ్ఛతో పచ్ఛతో. అహమ్పి దమ్మో అహమ్పి దమ్మోతి అహమ్పి ‘‘దమ్మో దమ్మమానో’’తి వదమానో గావీతి. సేయ్యథాపి గున్నన్తి యథా గావీనం. గావో హి కాళాపి రత్తాపి సేతాదివణ్ణాపి హోన్తి, గద్రభస్స పన తాదిసో వణ్ణో నామ నత్థి. యథా చ వణ్ణో, ఏవం సరోపి పదమ్పి అఞ్ఞాదిసమేవ. సేసం ఉత్తానత్థమేవ. ఇమస్మిమ్పి సుత్తే తిస్సో సిక్ఖా మిస్సికావ కథితాతి.

౩. ఖేత్తసుత్తవణ్ణనా

౮౪. తతియే పటికచ్చేవాతి పఠమమేవ. సుకట్ఠం కరోతీతి నఙ్గలేన సుకట్ఠం కరోతి. సుమతికతన్తి మతియా సుట్ఠు సమీకతం. కాలేనాతి వపితబ్బయుత్తకాలేన. సేసం ఉత్తానమేవ. ఇధాపి తిస్సో సిక్ఖా మిస్సికావ కథితా.

౪. వజ్జిపుత్తసుత్తవణ్ణనా

౮౫. చతుత్థే వజ్జిపుత్తకోతి వజ్జిరాజకులస్స పుత్తో. దియడ్ఢసిక్ఖాపదసతన్తి పణ్ణాసాధికం సిక్ఖాపదసతం. తస్మిం సమయే పఞ్ఞత్తాని సిక్ఖాపదానేవ సన్ధాయేతం వుత్తం. సో కిర భిక్ఖు అజ్జవసమ్పన్నో ఉజుజాతికో అవఙ్కో అకుటిలో, తస్మా ‘‘అహం ఏత్తకాని సిక్ఖాపదాని రక్ఖితుం సక్కుణేయ్యం వా న వా’’తి చిన్తేత్వా సత్థు ఆరోచేసి. సక్కోమహన్తి సక్కోమి అహం. సో కిర ‘‘ఏత్తకేసు సిక్ఖాపదేసు సిక్ఖన్తస్స అగరు తీసు సిక్ఖాసు సిక్ఖితు’’న్తి మఞ్ఞమానో ఏవమాహ. అథ భగవా యథా నామ పఞ్ఞాస తిణకలాపియో ఉక్ఖిపితుం అసక్కోన్తస్స కలాపియసతం బన్ధిత్వా సీసే ఠపేయ్య, ఏవమేవ ఏకిస్సాపి సిక్ఖాయ సిక్ఖితుం అసక్కోన్తస్స అపరా ద్వేపి సిక్ఖా ఉపరి పక్ఖిపన్తో తస్మాతిహ త్వం భిక్ఖూతిఆదిమాహ. సుఖుమాలో కిర ఉత్తరో నామ జానపదమనుస్సో లోహపాసాదవిహారే వసతి. అథ నం దహరభిక్ఖూ ఆహంసు – ‘‘ఉత్తర, అగ్గిసాలా ఓవస్సతి, తిణం కప్పియం కత్వా దేహీ’’తి. తం ఆదాయ అటవిం గన్త్వా తేన లాయితం తిణంయేవ కరళే బన్ధిత్వా ‘‘పఞ్ఞాస కరళే గహేతుం సక్ఖిస్ససి ఉత్తరా’’తి ఆహంసు. సో ‘‘న సక్ఖిస్సామీ’’తి ఆహ. అసీతిం పన సక్ఖిస్ససీతి? న సక్ఖిస్సామి, భన్తేతి. ఏకం కరళసతం సక్ఖిస్ససీతి? ఆమ, భన్తే, గణ్హిస్సామీతి. దహరభిక్ఖూ కరళసతం బన్ధిత్వా తస్స సీసే ఠపయింసు. సో ఉక్ఖిపిత్వా నిత్థునన్తో గన్త్వా అగ్గిసాలాయ సమీపే పాతేసి. అథ నం భిక్ఖూ ‘‘కిలన్తరూపోసి ఉత్తరా’’తి ఆహంసు. ఆమ, భన్తే, దహరా భిక్ఖూ మం వఞ్చేసుం, ఇమం ఏకమ్పి కరళసతం ఉక్ఖిపితుం అసక్కోన్తం మం ‘‘పణ్ణాస కరళే ఉక్ఖిపాహీ’’తి వదింసు. ఆమ, ఉత్తర, వఞ్చయింసు తన్తి. ఏవం సమ్పదమిదం వేదితబ్బం. ఇధాపి తిస్సో సిక్ఖా మిస్సికావ కథితా.

౫. సేక్ఖసుత్తవణ్ణనా

౮౬. పఞ్చమే ఉజుమగ్గానుసారినోతి ఉజుమగ్గో వుచ్చతి అరియమగ్గో, తం అనుస్సరన్తస్స పటిపన్నకస్సాతి అత్థో. ఖయస్మిం పఠమం ఞాణన్తి పఠమమేవ మగ్గఞాణం ఉప్పజ్జతి. మగ్గో హి కిలేసానం ఖేపనతో ఖయో నామ, తంసమ్పయుత్తం ఞాణం ఖయస్మిం ఞాణం నామ. తతో అఞ్ఞా అనన్తరాతి తతో చతుత్థమగ్గఞాణతో అనన్తరా అఞ్ఞా ఉప్పజ్జతి, అరహత్తఫలం ఉప్పజ్జతీతి అత్థో. అఞ్ఞావిముత్తస్సాతి అరహత్తఫలవిముత్తియా విముత్తస్స. ఞాణం వే హోతీతి పచ్చవేక్ఖణఞాణం హోతి. ఇతి సుత్తేపి గాథాసుపి సత్త సేఖా కథితా. అవసానే పన ఖీణాసవో దస్సితోతి.

౬. పఠమసిక్ఖాసుత్తవణ్ణనా

౮౭. ఛట్ఠే అత్తకామాతి అత్తనో హితకామా. యత్థేతం సబ్బం సమోధానం గచ్ఛతీతి యాసు సిక్ఖాసు సబ్బమేతం దియడ్ఢసిక్ఖాపదసతం సఙ్గహం గచ్ఛతి. పరిపూరకారీ హోతీతి సమత్తకారీ హోతి. మత్తసో కారీతి పమాణేన కారకో, సబ్బేన సబ్బం కాతుం న సక్కోతీతి అత్థో. ఖుద్దానుఖుద్దకానీతి చత్తారి పారాజికాని ఠపేత్వా సేససిక్ఖాపదాని. తత్రాపి సఙ్ఘాదిసేసం ఖుద్దకం, థుల్లచ్చయం అనుఖుద్దకం నామ. థుల్లచ్చయఞ్చ ఖుద్దకం, పాచిత్తియం అనుఖుద్దకం నామ, పాచిత్తియఞ్చ ఖుద్దకం, పాటిదేసనియదుక్కటదుబ్భాసితాని అనుఖుద్దకాని నామ. ఇమే పన అఙ్గుత్తరమహానికాయవళఞ్జనకఆచరియా ‘‘చత్తారి పారాజికాని ఠపేత్వా సేసాని సబ్బానిపి ఖుద్దానుఖుద్దకానీ’’తి వదన్తి. తాని ఆపజ్జతిపి వుట్ఠాతిపీతి ఏత్థ పన ఖీణాసవో తావ లోకవజ్జం నాపజ్జతి, పణ్ణత్తివజ్జమేవ ఆపజ్జతి. ఆపజ్జన్తో చ కాయేనపి వాచాయపి చిత్తేనపి ఆపజ్జతి. కాయేన ఆపజ్జన్తో కుటికారసహసేయ్యాదీని ఆపజ్జతి, వాచాయ ఆపజ్జన్తో సఞ్చరిత్తపదసోధమ్మాదీని, చిత్తేన ఆపజ్జన్తో రూపియపటిగ్గహణం ఆపజ్జతి. సేక్ఖేసుపి ఏసేవ నయో. న హి మేత్థ, భిక్ఖవే, అభబ్బతా వుత్తాతి, భిక్ఖవే, న హి మయా ఏత్థ ఏవరూపం ఆపత్తిం ఆపజ్జనే చ వుట్ఠానే చ అరియపుగ్గలస్స అభబ్బతా కథితా. ఆదిబ్రహ్మచరియకానీతి మగ్గబ్రహ్మచరియస్స ఆదిభూతాని చత్తారి మహాసీలసిక్ఖాపదాని. బ్రహ్మచరియసారుప్పానీతి తానియేవ చతుమగ్గబ్రహ్మచరియస్స సారుప్పాని అనుచ్ఛవికాని. తత్థాతి తేసు సిక్ఖాపదేసు. ధువసీలోతి నిబద్ధసీలో. ఠితసీలోతి పతిట్ఠితసీలో. సోతాపన్నోతి సోతసఙ్ఖాతేన మగ్గేన ఫలం ఆపన్నో. అవినిపాతధమ్మోతి చతూసు అపాయేసు అపతనసభావో. నియతోతి సోతాపత్తిమగ్గనియామేన నియతో. సమ్బోధిపరాయణోతి ఉపరిమగ్గత్తయసమ్బోధిపరాయణో.

తనుత్తాతి తనుభావో. సకదాగామినో హి రాగాదయో అబ్భపటలం వియ మచ్ఛికాపత్తం వియ చ తనుకా హోన్తి, న బహలా. ఓరమ్భాగియానన్తి హేట్ఠాభాగియానం. సంయోజనానన్తి బన్ధనానం. పరిక్ఖయాతి పరిక్ఖయేన. ఓపపాతికో హోతీతి ఉప్పన్నకో హోతి. తత్థ పరినిబ్బాయీతి హేట్ఠా అనోతరిత్వా ఉపరియేవ పరినిబ్బానధమ్మో. అనావత్తిధమ్మోతి యోనిగతివసేన అనాగమనధమ్మో.

పదేసం పదేసకారీతిఆదీసు పదేసకారీ పుగ్గలో నామ సోతాపన్నో చ సకదాగామీ చ అనాగామీ చ, సో పదేసమేవ సమ్పాదేతి. పరిపూరకారీ నామ అరహా, సో పరిపూరమేవ సమ్పాదేతి. అవఞ్ఝానీతి అతుచ్ఛాని సఫలాని సఉద్రయానీతి అత్థో. ఇధాపి తిస్సో సిక్ఖా మిస్సకావ కథితా.

౭. దుతియసిక్ఖాసుత్తవణ్ణనా

౮౮. సత్తమే కోలంకోలోతి కులా కులం గమనకో. కులన్తి చేత్థ భవో అధిప్పేతో, తస్మా ‘‘ద్వే వా తీణి వా కులానీ’’తి ఏత్థపి ద్వే వా తయో వా భవేతి అత్థో వేదితబ్బో. అయఞ్హి ద్వే వా భవే సన్ధావతి తయో వా, ఉత్తమకోటియా ఛ వా. తస్మా ద్వే వా తీణి వా చత్తారి వా పఞ్చ వా ఛ వాతి ఏవమేత్థ వికప్పో దట్ఠబ్బో. ఏకబీజీతి ఏకస్సేవ భవస్స బీజం ఏతస్స అత్థీతి ఏకబీజీ. ఉద్ధంసోతోతిఆదీసు అత్థి ఉద్ధంసోతో అకనిట్ఠగామీ, అత్థి ఉద్ధంసోతో న అకనిట్ఠగామీ, అత్థి న ఉద్ధంసోతో అకనిట్ఠగామీ, అత్థి న ఉద్ధంసోతో న అకనిట్ఠగామీ. తత్థ యో ఇధ అనాగామిఫలం పత్వా అవిహాదీసు నిబ్బత్తో తత్థ యావతాయుకం ఠత్వా ఉపరూపరి నిబ్బత్తిత్వా అకనిట్ఠం పాపుణాతి, అయం ఉద్ధంసోతో అకనిట్ఠగామీ నామ. యో పన అవిహాదీసు నిబ్బత్తో తత్థేవ అపరినిబ్బాయిత్వా అకనిట్ఠమ్పి అప్పత్వా ఉపరిమబ్రహ్మలోకే పరినిబ్బాయతి, అయం ఉద్ధంసోతో న అకనిట్ఠగామీ నామ. యో ఇతో చవిత్వా అకనిట్ఠేయేవ నిబ్బత్తతి, అయం న ఉద్ధంసోతో అకనిట్ఠగామీ నామ. యో పన అవిహాదీసు చతూసు అఞ్ఞతరస్మిం నిబ్బత్తిత్వా తత్థేవ పరినిబ్బాయతి, అయం న ఉద్ధంసోతో న అకనిట్ఠగామీ నామ.

యత్థ కత్థచి ఉప్పన్నో పన ససఙ్ఖారేన సప్పయోగేన అరహత్తం పత్తో ససఙ్ఖారపరినిబ్బాయీ నామ. అసఙ్ఖారేన అప్పయోగేన పత్తో అసఙ్ఖారపరినిబ్బాయీ నామ. యో పన కప్పసహస్సాయుకేసు అవిహేసు నిబ్బత్తిత్వా పఞ్చమం కప్పసతం అతిక్కమిత్వా అరహత్తం పత్తో, అయం ఉపహచ్చపరినిబ్బాయీ నామ. అతప్పాదీసుపి ఏసేవ నయో. అన్తరాపరినిబ్బాయీతి యో ఆయువేమజ్ఝం అనతిక్కమిత్వా పరినిబ్బాయతి, సో తివిధో హోతి. కప్పసహస్సాయుకేసు తావ అవిహేసు నిబ్బత్తిత్వా ఏకో నిబ్బత్తదివసేయేవ అరహత్తం పాపుణాతి. నో చే నిబ్బత్తదివసే పాపుణాతి, పఠమస్స పన కప్పసతస్స మత్థకే పాపుణాతి, అయం పఠమో అన్తరాపరినిబ్బాయీ. అపరో ఏవం అసక్కోన్తో ద్విన్నం కప్పసతానం మత్థకే పాపుణాతి, అయం దుతియో. అపరో ఏవమ్పి అసక్కోన్తో చతున్నం కప్పసతానం మత్థకే పాపుణాతి, అయం తతియో అన్తరాపరినిబ్బాయీ. సేసం వుత్తనయమేవ.

ఇమస్మిం పన ఠానే ఠత్వా చతువీసతి సోతాపన్నా, ద్వాదస సకదాగామినో, అట్ఠచత్తాలీస అనాగామినో, ద్వాదస చ అరహన్తో కథేతబ్బా. ఇమస్మిం హి సాసనే సద్ధాధురం పఞ్ఞాధురన్తి ద్వే ధురాని, దుక్ఖపటిపదాదన్ధాభిఞ్ఞాదయో చతస్సో పటిపదా. తత్థేకో సద్ధాధురేన అభినివిసిత్వా సోతాపత్తిఫలం పత్వా ఏకమేవ భవం నిబ్బత్తిత్వా దుక్ఖస్సన్తం కరోతి, అయమేకో ఏకబీజీ. సో పటిపదావసేన చతుబ్బిధో హోతి. యథా చేస, ఏవం పఞ్ఞాధురేన అభినివిట్ఠోపీతి అట్ఠ ఏకబీజినో. తథా కోలంకోలా సత్తక్ఖత్తుపరమా చాతి ఇమే చతువీసతి సోతాపన్నా నామ. తీసు పన విమోక్ఖేసు సుఞ్ఞతవిమోక్ఖేన సకదాగామిభూమిం పత్తా చతున్నం పటిపదానం వసేన చత్తారో సకదాగామినో, తథా అనిమిత్తవిమోక్ఖేన పత్తా చత్తారో, అప్పణిహితవిమోక్ఖేన పత్తా చత్తారోతి ఇమే ద్వాదస సకదాగామినో. అవిహేసు పన తయో అన్తరాపరినిబ్బాయినో, ఏకో ఉపహచ్చపరినిబ్బాయీ, ఏకో ఉద్ధంసోతో అకనిట్ఠగామీతి పఞ్చ అనాగామినో, తే అసఙ్ఖారపరినిబ్బాయినో పఞ్చ, ససఙ్ఖారపరినిబ్బాయినో పఞ్చాతి దస హోన్తి, తథా అతప్పాదీసు. అకనిట్ఠేసు పన ఉద్ధంసోతో నత్థి, తస్మా తత్థ చత్తారో ససఙ్ఖారపరినిబ్బాయీ, చత్తారో అసఙ్ఖారపరినిబ్బాయీతి అట్ఠ, ఇమే అట్ఠచత్తాలీస అనాగామినో. యథా పన సకదాగామినో, తథేవ అరహన్తోపి ద్వాదస వేదితబ్బా. ఇధాపి తిస్సో సిక్ఖా మిస్సికావ కథితా.

౮. తతియసిక్ఖాసుత్తవణ్ణనా

౮౯. అట్ఠమే తం వా పన అనభిసమ్భవం అప్పటివిజ్ఝన్తి తం అరహత్తం అపాపుణన్తో అప్పటివిజ్ఝన్తో. ఇమినా నయేన సబ్బట్ఠానేసు అత్థో వేదితబ్బో. ఇధాపి తిస్సో సిక్ఖా మిస్సికావ కథితా. నవమం ఉత్తానత్థమేవ. ఇధాపి తిస్సో సిక్ఖా మిస్సికావ కథితా.

౧౦. దుతియసిక్ఖత్తయసుత్తవణ్ణనా

౯౧. దసమే ఆసవానం ఖయాతి ఏత్థ అరహత్తమగ్గో అధిపఞ్ఞాసిక్ఖా నామ. ఫలం పన సిక్ఖితసిక్ఖస్స ఉప్పజ్జనతో సిక్ఖాతి న వత్తబ్బం.

యథా పురే తథా పచ్ఛాతి యథా పఠమం తీసు సిక్ఖాసు సిక్ఖతి, పచ్ఛా తథేవ సిక్ఖతీతి అత్థో. దుతియపదేపి ఏసేవ నయో. యథా అధో తథా ఉద్ధన్తి యథా హేట్ఠిమకాయం అసుభవసేన పస్సతి, ఉపరిమకాయమ్పి తథేవ ఫరతి. దుతియపదేపి ఏసేవ నయో. యథా దివా తథా రత్తిన్తి యథా దివా తిస్సో సిక్ఖా సిక్ఖతి, రత్తిమ్పి తథేవ సిక్ఖతీతి అత్థో. అభిభుయ్య దిసా సబ్బాతి సబ్బా దిసా ఆరమ్మణవసేన అభిభవిత్వా. అప్పమాణసమాధినాతి అరహత్తమగ్గసమాధినా.

సేక్ఖన్తి సిక్ఖమానం సకరణీయం. పటిపదన్తి పటిపన్నకం. సంసుద్ధచారియన్తి సంసుద్ధచరణం పరిసుద్ధసీలం. సమ్బుద్ధన్తి చతుసచ్చబుద్ధం. ధీరం పటిపదన్తగున్తి ఖన్ధధీరఆయతనధీరవసేన ధీరం ధితిసమ్పన్నం పటిపత్తియా అన్తం గతం. విఞ్ఞాణస్సాతి చరిమకవిఞ్ఞాణస్స. తణ్హాక్ఖయవిముత్తినోతి తణ్హాక్ఖయవిముత్తిసఙ్ఖాతాయ అరహత్తఫలవిముత్తియా సమన్నాగతస్స. పజ్జోతస్సేవ నిబ్బానన్తి పదీపనిబ్బానం వియ. విమోక్ఖో హోతి చేతసోతి చిత్తస్స విముత్తి విముచ్చనా అప్పవత్తిభావో హోతి. తణ్హాక్ఖయవిముత్తినో హి ఖీణాసవస్స చరిమకవిఞ్ఞాణనిరోధేన పరినిబ్బానం వియ చేతసో విమోక్ఖో హోతి, న గతట్ఠానం పఞ్ఞాయతి, అపణ్ణత్తికభావూపగమోయేవ హోతీతి అత్థో.

౧౧. సఙ్కవాసుత్తవణ్ణనా

౯౨. ఏకాదసమే సఙ్కవా నామ కోసలానం నిగమోతి సఙ్కవాతి ఏవంనామకో కోసలరట్ఠే నిగమో. ఆవాసికోతి భారహారో నవే ఆవాసే సముట్ఠాపేతి, పురాణే పటిజగ్గతి. సిక్ఖాపదపటిసంయుత్తాయాతి సిక్ఖాసఙ్ఖాతేహి పదేహి పటిసంయుత్తాయ, తీహి సిక్ఖాహి సమన్నాగతాయాతి అత్థో. సన్దస్సేతీతి సమ్ముఖే వియ కత్వా దస్సేతి. సమాదపేతీతి గణ్హాపేతి. సముత్తేజేతీతి సముస్సాహేతి. సమ్పహంసేతీతి పటిలద్ధగుణేహి వణ్ణం కథేన్తో వోదాపేతి. అధిసల్లిఖతేతి అతివియ సల్లిఖతి, అతివియ సల్లిఖితం కత్వా సణ్హం సణ్హం కథేతీతి అత్థో.

అచ్చయోతి అపరాధో. మం అచ్చగమాతి మం అతిక్కమ్మ అధిభవిత్వా పవత్తో. అహుదేవ అక్ఖన్తీతి అహోసియేవ అనధివాసనా. అహు అప్పచ్చయోతి అహోసి అతుట్ఠాకారో. పటిగ్గణ్హాతూతి ఖమతు. ఆయతిం సంవరాయాతి అనాగతే సంవరత్థాయ, పున ఏవరూపస్స అపరాధస్స దోసస్స ఖలితస్స వా అకరణత్థాయాతి అత్థో. తగ్ఘాతి ఏకంసేన. యథాధమ్మం పటికరోసీతి యథా ధమ్మో ఠితో, తథా కరోసి, ఖమాపేసీతి వుత్తం హోతి. తం తే మయం పటిగ్గణ్హామాతి తం తవ అపరాధం మయం ఖమామ. వుద్ధిహేసా, కస్సప, అరియస్స వినయేతి ఏసా కస్సప బుద్ధస్స భగవతో సాసనే వుద్ధి నామ. కతమా? యాయం అచ్చయం అచ్చయతో దిస్వా యథాధమ్మం పటికరిత్వా ఆయతిం సంవరాపజ్జనా. దేసనం పన పుగ్గలాధిట్ఠానం కరోన్తో ‘‘యో అచ్చయం అచ్చయతో దిస్వా యథాధమ్మం పటికరోతి, ఆయతిం సంవరం ఆపజ్జతీ’’తి ఆహ. న సిక్ఖాకామోతి తిస్సో సిక్ఖా న కామేతి న పత్థేతి న పిహేతి. సిక్ఖాసమాదానస్సాతి సిక్ఖాపరిపూరణస్స. న వణ్ణవాదీతి గుణం న కథేతి. కాలేనాతి యుత్తప్పయుత్తకాలేన. సేసమేత్థ ఉత్తానత్థమేవాతి.

సమణవగ్గో చతుత్థో.