౮. సీలబ్బతసుత్తవణ్ణనా

౭౯. అట్ఠమే సీలబ్బతన్తి సీలఞ్చేవ వతఞ్చ. జీవితన్తి దుక్కరకారికానుయోగో. బ్రహ్మచరియన్తి బ్రహ్మచరియవాసో. ఉపట్ఠానసారన్తి ఉపట్ఠానేన సారం, ‘‘ఇదం వరం ఇదం నిట్ఠా’’తి ఏవం ఉపట్ఠితన్తి అత్థో. సఫలన్తి సఉద్రయం సవడ్ఢికం హోతీతి పుచ్ఛతి. న ఖ్వేత్థ, భన్తే, ఏకంసేనాతి, భన్తే, న ఖో ఏత్థ ఏకంసేన బ్యాకాతబ్బన్తి అత్థో. ఉపట్ఠానసారం సేవతోతి ఇదం సారం వరం నిట్ఠాతి ఏవం ఉపట్ఠితం సేవమానస్స. అఫలన్తి ఇట్ఠఫలేన అఫలం. ఏత్తావతా కమ్మవాదికిరియవాదీనం పబ్బజ్జం ఠపేత్వా సేసో సబ్బోపి బాహిరకసమయో గహితో హోతి. సఫలన్తి ఇట్ఠఫలేన సఫలం సఉద్రయం. ఏత్తావతా ఇమం సాసనం ఆదిం కత్వా సబ్బాపి కమ్మవాదికిరియవాదీనం పబ్బజ్జా గహితా. న చ పనస్స సులభరూపో సమసమో పఞ్ఞాయాతి ఏవం సేక్ఖభూమియం ఠత్వా పఞ్హం కథేన్తో అస్స ఆనన్దస్స పఞ్ఞాయ సమసమో న సులభోతి దస్సేతి. ఇమస్మిం సుత్తే సేక్ఖభూమి నామ కథితాతి.