౯. గన్ధజాతసుత్తవణ్ణనా

౮౦. నవమే ఏతదవోచాతి పచ్ఛాభత్తం పిణ్డపాతపటిక్కన్తో దసబలస్స వత్తం దస్సేత్వా అత్తనో దివావిహారట్ఠానం గన్త్వా ‘‘ఇమస్మిం లోకే మూలగన్ధో నామ అత్థి, సారగన్ధో నామ అత్థి, పుప్ఫగన్ధో నామ అత్థి. ఇమే పన తయోపి గన్ధా అనువాతంయేవ గచ్ఛన్తి, న పటివాతం. అత్థి ను ఖో కిఞ్చి, యస్స పటివాతమ్పి గన్ధో గచ్ఛతీ’’తి చిన్తేత్వా అట్ఠన్నం వరానం గహణకాలేయేవ కఙ్ఖుప్పత్తిసమయే ఉపసఙ్కమనవరస్స గహితత్తా తక్ఖణంయేవ దివాట్ఠానతో వుట్ఠాయ సత్థు సన్తికం గన్త్వా వన్దిత్వా ఏకమన్తం నిసిన్నో ఉప్పన్నాయ కఙ్ఖాయ వినోదనత్థం ఏతం ‘‘తీణిమాని, భన్తే’’తిఆదివచనం అవోచ. తత్థ గన్ధజాతానీతి గన్ధజాతియో. మూలగన్ధోతి మూలవత్థుకో గన్ధో, గన్ధసమ్పన్నం వా మూలమేవ మూలగన్ధో. తస్స హి గన్ధో అనువాతం గచ్ఛతి. గన్ధస్స పన గన్ధో నామ నత్థి. సారగన్ధపుప్ఫగన్ధేసుపి ఏసేవ నయో. అత్థానన్ద, కిఞ్చి గన్ధజాతన్తి ఏత్థ సరణగమనాదయో గుణవణ్ణభాసనవసేన దిసాగామితాయ గన్ధసదిసత్తా గన్ధా, తేసం వత్థుభూతో పుగ్గలో గన్ధజాతం నామ. గన్ధో గచ్ఛతీతి వణ్ణభాసనవసేన గచ్ఛతి. సీలవాతి పఞ్చసీలేన వా దససీలేన వా సీలవా. కల్యాణధమ్మోతి తేనేవ సీలధమ్మేన కల్యాణధమ్మో సున్దరధమ్మో. విగతమలమచ్ఛేరేనాతిఆదీనం అత్థో విసుద్ధిమగ్గే (విసుద్ధి. ౧.౧౬౦) విత్థారితోవ. దిసాసూతి చతూసు దిసాసు చతూసు అనుదిసాసు. సమణబ్రాహ్మణాతి సమితపాపబాహితపాపా సమణబ్రాహ్మణా.

న పుప్ఫగన్ధో పటివాతమేతీతి వస్సికపుప్ఫాదీనం గన్ధో పటివాతం న గచ్ఛతి. న చన్దనం తగరమల్లికా వాతి చన్దనతగరమల్లికానమ్పి గన్ధో పటివాతం న గచ్ఛతీతి అత్థో. దేవలోకేపి ఫుటసుమనా నామ హోతి, తస్సా పుప్ఫితదివసే గన్ధో యోజనసతం అజ్ఝోత్థరతి. సోపి పటివాతం విదత్థిమత్తమ్పి రతనమత్తమ్పి గన్తుం న సక్కోతీతి వదన్తి. సతఞ్చ గన్ధో పటివాతమేతీతి సతఞ్చ పణ్డితానం బుద్ధపచ్చేకబుద్ధబుద్ధపుత్తానం సీలాదిగుణగన్ధో పటివాతం గచ్ఛతి. సబ్బా దిసా సప్పురిసో పవాయతీతి సప్పురిసో పణ్డితో సీలాదిగుణగన్ధేన సబ్బా దిసా పవాయతి, సబ్బా దిసా గన్ధేన అవత్థరతీతి అత్థో.