(౨) లోకియదుకం

౧౦౪౪. పఞ్చన్నం ఖన్ధానం కతి లోకియా, కతి లోకుత్తరా? ద్వాదసన్నం ఆయతనానం కతి లోకియా, కతి లోకుత్తరా? అట్ఠారసన్నం ధాతూనం కతి లోకియా, కతి లోకుత్తరా? చతున్నం సచ్చానం కతి లోకియా, కతి లోకుత్తరా…పే… సత్తన్నం చిత్తానం కతి లోకియా, కతి లోకుత్తరా?

రూపక్ఖన్ధో లోకియో. చత్తారో ఖన్ధా సియా లోకియా, సియా లోకుత్తరా. దసాయతనా లోకియా. ద్వే ఆయతనా సియా లోకియా, సియా లోకుత్తరా. సోళస ధాతుయో లోకియా. ద్వే ధాతుయో సియా లోకియా, సియా లోకుత్తరా. ద్వే సచ్చా లోకియా. ద్వే సచ్చా లోకుత్తరా.

దసిన్ద్రియా లోకియా. తీణిన్ద్రియా లోకుత్తరా. నవిన్ద్రియా సియా లోకియా, సియా లోకుత్తరా. తయో అకుసలహేతూ లోకియా. ఛ హేతూ సియా లోకియా, సియా లోకుత్తరా. కబళీకారో ఆహారో లోకియో. తయో ఆహారా సియా లోకియా, సియా లోకుత్తరా. ఛ ఫస్సా లోకియా. మనోవిఞ్ఞాణధాతుసమ్ఫస్సో సియా లోకియో, సియా లోకుత్తరో. ఛ వేదనా లోకియా. మనోవిఞ్ఞాణధాతుసమ్ఫస్సజా వేదనా సియా లోకియా, సియా లోకుత్తరా. ఛ సఞ్ఞా లోకియా. మనోవిఞ్ఞాణధాతుసమ్ఫస్సజా సఞ్ఞా సియా లోకియా, సియా లోకుత్తరా. ఛ చేతనా లోకియా. మనోవిఞ్ఞాణధాతుసమ్ఫస్సజా చేతనా సియా లోకియా, సియా లోకుత్తరా. ఛ చిత్తా లోకియా. మనోవిఞ్ఞాణధాతు సియా లోకియా, సియా లోకుత్తరాతి.

అభిఞ్ఞా ద్వే సారమ్మణా, దిట్ఠా కుసలవేదనా;

విపాకా చ ఉపాదిన్నా, వితక్కం రూపలోకియాతి.

ధమ్మహదయవిభఙ్గో నిట్ఠితో.

విభఙ్గపకరణం నిట్ఠితం.