౧౦. తికాదిదస్సనవారో

౧. కుసలత్తికం

౧౦౩౮. పఞ్చన్నం ఖన్ధానం కతి కుసలా, కతి అకుసలా, కతి అబ్యాకతా…పే… సత్తన్నం చిత్తానం కతి కుసలా, కతి అకుసలా, కతి అబ్యాకతా?

రూపక్ఖన్ధో అబ్యాకతో. చత్తారో ఖన్ధా సియా కుసలా, సియా అకుసలా, సియా అబ్యాకతా. దసాయతనా అబ్యాకతా. ద్వాయతనా సియా కుసలా, సియా అకుసలా, సియా అబ్యాకతా. సోళస ధాతుయో అబ్యాకతా. ద్వే ధాతుయో సియా కుసలా, సియా అకుసలా, సియా అబ్యాకతా. సముదయసచ్చం అకుసలం. మగ్గసచ్చం కుసలం. నిరోధసచ్చం అబ్యాకతం. దుక్ఖసచ్చం సియా కుసలం, సియా అకుసలం, సియా అబ్యాకతం.

దసిన్ద్రియా అబ్యాకతా. దోమనస్సిన్ద్రియం అకుసలం. అనఞ్ఞాతఞ్ఞస్సామీతిన్ద్రియం కుసలం. చత్తారిన్ద్రియా సియా కుసలా, సియా అబ్యాకతా. ఛ ఇన్ద్రియా సియా కుసలా, సియా అకుసలా, సియా అబ్యాకతా.

తయో కుసలహేతూ కుసలా. తయో అకుసలహేతూ అకుసలా. తయో అబ్యాకతహేతూ అబ్యాకతా. కబళీకారో ఆహారో అబ్యాకతో. తయో ఆహారా సియా కుసలా, సియా అకుసలా, సియా అబ్యాకతా. ఛ ఫస్సా అబ్యాకతా. మనోవిఞ్ఞాణధాతుసమ్ఫస్సో సియా కుసలో, సియా అకుసలో, సియా అబ్యాకతో. ఛ వేదనా… ఛ సఞ్ఞా… ఛ చేతనా… ఛ చిత్తా అబ్యాకతా. మనోవిఞ్ఞాణధాతు సియా కుసలా, సియా అకుసలా, సియా అబ్యాకతా.

౨. వేదనాతికం

౧౦౩౯. పఞ్చన్నం ఖన్ధానం కతి సుఖాయ వేదనాయ సమ్పయుత్తా, కతి దుక్ఖాయ వేదనాయ సమ్పయుత్తా, కతి అదుక్ఖమసుఖాయ వేదనాయ సమ్పయుత్తా…పే… సత్తన్నం చిత్తానం కతి సుఖాయ వేదనాయ సమ్పయుత్తా, కతి దుక్ఖాయ వేదనాయ సమ్పయుత్తా, కతి అదుక్ఖమసుఖాయ వేదనాయ సమ్పయుత్తా?

ద్వే ఖన్ధా న వత్తబ్బా సుఖాయ వేదనాయ సమ్పయుత్తాతిపి, దుక్ఖాయ వేదనాయ సమ్పయుత్తాతిపి, అదుక్ఖమసుఖాయ వేదనాయ సమ్పయుత్తాతిపి. తయో ఖన్ధా సియా సుఖాయ వేదనాయ సమ్పయుత్తా, సియా దుక్ఖాయ వేదనాయ సమ్పయుత్తా, సియా అదుక్ఖమసుఖాయ వేదనాయ సమ్పయుత్తా.

దసాయతనా న వత్తబ్బా సుఖాయ వేదనాయ సమ్పయుత్తాతిపి, దుక్ఖాయ వేదనాయ సమ్పయుత్తాతిపి, అదుక్ఖమసుఖాయ వేదనాయ సమ్పయుత్తాతిపి. మనాయతనం సియా సుఖాయ వేదనాయ సమ్పయుత్తం, సియా దుక్ఖాయ వేదనాయ సమ్పయుత్తం, సియా అదుక్ఖమసుఖాయ వేదనాయ సమ్పయుత్తం. ధమ్మాయతనం సియా సుఖాయ వేదనాయ సమ్పయుత్తం, సియా దుక్ఖాయ వేదనాయ సమ్పయుత్తం, సియా అదుక్ఖమసుఖాయ వేదనాయ సమ్పయుత్తం, సియా న వత్తబ్బం సుఖాయ వేదనాయ సమ్పయుత్తన్తిపి, దుక్ఖాయ వేదనాయ సమ్పయుత్తన్తిపి, అదుక్ఖమసుఖాయ వేదనాయ సమ్పయుత్తన్తిపి.

దస ధాతుయో న వత్తబ్బా సుఖాయ వేదనాయ సమ్పయుత్తాతిపి, దుక్ఖాయ వేదనాయ సమ్పయుత్తాతిపి, అదుక్ఖమసుఖాయ వేదనాయ సమ్పయుత్తాతిపి. పఞ్చ ధాతుయో అదుక్ఖమసుఖాయ వేదనాయ సమ్పయుత్తా, కాయవిఞ్ఞాణధాతు సియా సుఖాయ వేదనాయ సమ్పయుత్తా, సియా దుక్ఖాయ వేదనాయ సమ్పయుత్తా. మనోవిఞ్ఞాణధాతు సియా సుఖాయ వేదనాయ సమ్పయుత్తా, సియా దుక్ఖాయ వేదనాయ సమ్పయుత్తా, సియా అదుక్ఖమసుఖాయ వేదనాయ సమ్పయుత్తా. ధమ్మధాతు సియా సుఖాయ వేదనాయ సమ్పయుత్తా, సియా దుక్ఖాయ వేదనాయ సమ్పయుత్తా, సియా అదుక్ఖమసుఖాయ వేదనాయ సమ్పయుత్తా, సియా న వత్తబ్బా సుఖాయ వేదనాయ సమ్పయుత్తాతిపి, దుక్ఖాయ వేదనాయ సమ్పయుత్తాతిపి, అదుక్ఖమసుఖాయ వేదనాయ సమ్పయుత్తాతిపి.

ద్వే సచ్చా సియా సుఖాయ వేదనాయ సమ్పయుత్తా, సియా అదుక్ఖమసుఖాయ వేదనాయ సమ్పయుత్తా. నిరోధసచ్చం న వత్తబ్బం సుఖాయ వేదనాయ సమ్పయుత్తన్తిపి, దుక్ఖాయ వేదనాయ సమ్పయుత్తన్తిపి, అదుక్ఖమసుఖాయ వేదనాయ సమ్పయుత్తన్తిపి. దుక్ఖసచ్చం సియా సుఖాయ వేదనాయ సమ్పయుత్తం, సియా దుక్ఖాయ వేదనాయ సమ్పయుత్తం, సియా అదుక్ఖమసుఖాయ వేదనాయ సమ్పయుత్తం, సియా న వత్తబ్బం సుఖాయ వేదనాయ సమ్పయుత్తన్తిపి, దుక్ఖాయ వేదనాయ సమ్పయుత్తన్తిపి, అదుక్ఖమసుఖాయ వేదనాయ సమ్పయుత్తన్తిపి.

ద్వాదసిన్ద్రియా న వత్తబ్బా సుఖాయ వేదనాయ సమ్పయుత్తాతిపి, దుక్ఖాయ వేదనాయ సమ్పయుత్తాతిపి, అదుక్ఖమసుఖాయ వేదనాయ సమ్పయుత్తాతిపి. ఛ ఇన్ద్రియా సియా సుఖాయ వేదనాయ సమ్పయుత్తా, సియా అదుక్ఖమసుఖాయ వేదనాయ సమ్పయుత్తా. తీణిన్ద్రియా సియా సుఖాయ వేదనాయ సమ్పయుత్తా, సియా దుక్ఖాయ వేదనాయ సమ్పయుత్తా, సియా అదుక్ఖమసుఖాయ వేదనాయ సమ్పయుత్తా. జీవితిన్ద్రియం సియా సుఖాయ వేదనాయ సమ్పయుత్తం, సియా దుక్ఖాయ వేదనాయ సమ్పయుత్తం, సియా అదుక్ఖమసుఖాయ వేదనాయ సమ్పయుత్తం, సియా న వత్తబ్బం సుఖాయ వేదనాయ సమ్పయుత్తన్తిపి, దుక్ఖాయ వేదనాయ సమ్పయుత్తన్తిపి, అదుక్ఖమసుఖాయ వేదనాయ సమ్పయుత్తన్తిపి.

దోసో అకుసలహేతు దుక్ఖాయ వేదనాయ సమ్పయుత్తో. సత్త హేతూ సియా సుఖాయ వేదనాయ సమ్పయుత్తా, సియా అదుక్ఖమసుఖాయ వేదనాయ సమ్పయుత్తా. మోహో అకుసలహేతు సియా సుఖాయ వేదనాయ సమ్పయుత్తో, సియా దుక్ఖాయ వేదనాయ సమ్పయుత్తో, సియా దుక్ఖమసుఖాయ వేదనాయ సమ్పయుత్తో.

కబళీకారో ఆహారో న వత్తబ్బో సుఖాయ వేదనాయ సమ్పయుత్తోతి పి, దుక్ఖాయ వేదనాయ సమ్పయుత్తోతిపి, అదుక్ఖమసుఖాయ వేదనాయ సమ్పయుత్తోతిపి. తయో ఆహారా సియా సుఖాయ వేదనాయ సమ్పయుత్తా, సియా దుక్ఖాయ వేదనాయ సమ్పయుత్తా, సియా అదుక్ఖమసుఖాయ వేదనాయ సమ్పయుత్తా.

పఞ్చ ఫస్సా అదుక్ఖమసుఖాయ వేదనాయ సమ్పయుత్తా. కాయవిఞ్ఞాణధాతుసమ్ఫస్సో సియా సుఖాయ వేదనాయ సమ్పయుత్తో, సియా దుక్ఖాయ వేదనాయ సమ్పయుత్తో. మనోవిఞ్ఞాణధాతుసమ్ఫస్సో సియా సుఖాయ వేదనాయ సమ్పయుత్తో, సియా దుక్ఖాయ వేదనాయ సమ్పయుత్తో, సియా అదుక్ఖమసుఖాయ వేదనాయ సమ్పయుత్తో.

సత్త వేదనా న వత్తబ్బా సుఖాయ వేదనాయ సమ్పయుత్తాతిపి, దుక్ఖాయ వేదనాయ సమ్పయుత్తాతిపి, అదుక్ఖమసుఖాయ వేదనాయ సమ్పయుత్తాతిపి. పఞ్చ సఞ్ఞా… పఞ్చ చేతనా… పఞ్చ చిత్తా అదుక్ఖమసుఖాయ వేదనాయ సమ్పయుత్తా, కాయవిఞ్ఞాణధాతు సియా సుఖాయ వేదనాయ సమ్పయుత్తా, సియా దుక్ఖాయ వేదనాయ సమ్పయుత్తా. మనోవిఞ్ఞాణధాతు సియా సుఖాయ వేదనాయ సమ్పయుత్తా, సియా దుక్ఖాయ వేదనాయ సమ్పయుత్తా, సియా అదుక్ఖమసుఖాయ వేదనాయ సమ్పయుత్తా.

౩. విపాకత్తికం

౧౦౪౦. పఞ్చన్నం ఖన్ధానం కతి విపాకా, కతి విపాకధమ్మధమ్మా, కతి నేవవిపాకనవిపాకధమ్మధమ్మా…పే… సత్తన్నం చిత్తానం కతి విపాకా, కతి విపాకధమ్మధమ్మా, కతి నేవవిపాకనవిపాకధమ్మధమ్మా?

రూపక్ఖన్ధో నేవవిపాకనవిపాకధమ్మధమ్మో. చత్తారో ఖన్ధా సియా విపాకా, సియా విపాకధమ్మధమ్మా, సియా నేవవిపాకనవిపాకధమ్మధమ్మా.

దసాయతనా నేవవిపాకనవిపాకధమ్మధమ్మా. ద్వాయతనా సియా విపాకా, సియా విపాకధమ్మధమ్మా, సియా నేవవిపాకనవిపాకధమ్మధమ్మా.

దస ధాతుయో నేవవిపాకనవిపాకధమ్మధమ్మా. పఞ్చ ధాతుయో విపాకా. మనోధాతు సియా విపాకా, సియా నేవవిపాకనవిపాకధమ్మధమ్మా. ద్వే ధాతుయో సియా విపాకా సియా విపాకధమ్మధమ్మా, సియా నేవవిపాకనవిపాకధమ్మధమ్మా.

ద్వే సచ్చా విపాకధమ్మధమ్మా. నిరోధసచ్చం నేవవిపాకనవిపాకధమ్మధమ్మం. దుక్ఖసచ్చం సియా విపాకం, సియా విపాకధమ్మధమ్మం, సియా నేవవిపాకనవిపాకధమ్మధమ్మం.

సత్తిన్ద్రియా నేవవిపాకనవిపాకధమ్మధమ్మా. తీణిన్ద్రియా విపాకా. ద్విన్ద్రియా విపాకధమ్మధమ్మా. అఞ్ఞిన్ద్రియం సియా విపాకం, సియా విపాకధమ్మధమ్మం. నవిన్ద్రియా సియా విపాకా, సియా విపాకధమ్మధమ్మా, సియా నేవవిపాకనవిపాకధమ్మధమ్మా.

ఛ హేతూ విపాకధమ్మధమ్మా. తయో అబ్యాకతహేతూ సియా విపాకా, సియా నేవవిపాకనవిపాకధమ్మధమ్మా.

కబళీకారో ఆహారో నేవవిపాకనవిపాకధమ్మధమ్మో. తయో ఆహారా సియా విపాకా, సియా విపాకధమ్మధమ్మా, సియా నేవవిపాకనవిపాకధమ్మధమ్మా. పఞ్చ ఫస్సా విపాకా. మనోధాతుసమ్ఫస్సో సియా విపాకో, సియా నేవవిపాకనవిపాకధమ్మధమ్మో. మనోవిఞ్ఞాణధాతుసమ్ఫస్సో సియా విపాకో, సియా విపాకధమ్మధమ్మో, సియా నేవవిపాకనవిపాకధమ్మధమ్మో. పఞ్చ వేదనా… పఞ్చ సఞ్ఞా… పఞ్చ చేతనా… పఞ్చ చిత్తా విపాకా. మనోధాతు సియా విపాకా, సియా నేవవిపాకనవిపాకధమ్మధమ్మా. మనోవిఞ్ఞాణధాతు సియా విపాకా, సియా విపాకధమ్మధమ్మా, సియా నేవవిపాకనవిపాకధమ్మధమ్మా.

౪. ఉపాదిన్నత్తికం

౧౦౪౧. పఞ్చన్నం ఖన్ధానం కతి ఉపాదిన్నుపాదానియా, కతి అనుపాదిన్నుపాదానియా, కతి అనుపాదిన్నఅనుపాదానియా…పే… సత్తన్నం చిత్తానం కతి ఉపాదిన్నుపాదానియా, కతి అనుపాదిన్నుపాదానియా, కతి అనుపాదిన్నఅనుపాదానియా?

రూపక్ఖన్ధో సియా ఉపాదిన్నుపాదానియో, సియా అనుపాదిన్నుపాదానియో ౪. చత్తారో ఖన్ధా సియా ఉపాదిన్నుపాదానియా, సియా అనుపాదిన్నుపాదానియా, సియా అనుపాదిన్నఅనుపాదానియా.

పఞ్చాయతనా ఉపాదిన్నుపాదానియా. సద్దాయతనం అనుపాదిన్నుపాదానియం. చత్తారో ఆయతనా సియా ఉపాదిన్నుపాదానియా, సియా అనుపాదిన్నుపాదానియా. ద్వాయతనా సియా ఉపాదిన్నుపాదానియా, సియా అనుపాదిన్నుపాదానియా, సియా అనుపాదిన్నఅనుపాదానియా.

దస ధాతుయో ఉపాదిన్నుపాదానియా. సద్దధాతు అనుపాదిన్నుపాదానియా. పఞ్చ ధాతుయో సియా ఉపాదిన్నుపాదానియా, సియా అనుపాదిన్నుపాదానియా. ద్వే ధాతుయో సియా ఉపాదిన్నుపాదానియా, సియా అనుపాదిన్నుపాదానియా, సియా అనుపాదిన్నఅనుపాదానియా.

సముదయసచ్చం అనుపాదిన్నుపాదానియం. ద్వే సచ్చా అనుపాదిన్నఅనుపాదానియా. దుక్ఖసచ్చం సియా ఉపాదిన్నుపాదానియం, సియా అనుపాదిన్నుపాదానియం.

నవిన్ద్రియా ఉపాదిన్నుపాదానియా. దోమనస్సిన్ద్రియం అనుపాదిన్నుపాదానియం. తీణిన్ద్రియా అనుపాదిన్నఅనుపాదానియా. నవిన్ద్రియా సియా ఉపాదిన్నుపాదానియా, సియా అనుపాదిన్నుపాదానియా, సియా అనుపాదిన్నఅనుపాదానియా. తయో అకుసలహేతూ అనుపాదిన్నుపాదానియా. తయో కుసలహేతూ సియా అనుపాదిన్నుపాదానియా, సియా అనుపాదిన్నఅనుపాదానియా. తయో అబ్యాకతహేతూ సియా ఉపాదిన్నుపాదానియా, సియా అనుపాదిన్నుపాదానియా, సియా అనుపాదిన్నఅనుపాదానియా.

కబళీకారో ఆహారో సియా ఉపాదిన్నుపాదానియో, సియా అనుపాదిన్నుపాదానియో. తయో ఆహారా సియా ఉపాదిన్నుపాదానియా, సియా అనుపాదిన్నుపాదానియా, సియా అనుపాదిన్నఅనుపాదానియా.

పఞ్చ ఫస్సా ఉపాదిన్నుపాదానియా. మనోధాతుసమ్ఫస్సో సియా ఉపాదిన్నుపాదానియో, సియా అనుపాదిన్నుపాదానియో. మనోవిఞ్ఞాణధాతుసమ్ఫస్సో సియా ఉపాదిన్నుపాదానియో, సియా అనుపాదిన్నుపాదానియో, సియా అనుపాదిన్నఅనుపాదానియో. పఞ్చ వేదనా… పఞ్చ సఞ్ఞా… పఞ్చ చేతనా… పఞ్చ చిత్తా ఉపాదిన్నుపాదానియా. మనోధాతు సియా ఉపాదిన్నుపాదానియా, సియా అనుపాదిన్నుపాదానియా. మనోవిఞ్ఞాణధాతు సియా ఉపాదిన్నుపాదానియా, సియా అనుపాదిన్నుపాదానియా, సియా అనుపాదిన్నఅనుపాదానియా.

౫. వితక్కత్తికం

౧౦౪౨. పఞ్చన్నం ఖన్ధానం కతి సవితక్కసవిచారా, కతి అవితక్కవిచారమత్తా, కతి అవితక్కఅవిచారా…పే… సత్తన్నం చిత్తానం కతి సవితక్కసవిచారా, కతి అవితక్కవిచారమత్తా, కతి అవితక్కఅవిచారా?

రూపక్ఖన్ధో అవితక్కఅవిచారో. తయో ఖన్ధా సియా సవితక్కసవిచారా, సియా అవితక్కవిచారమత్తా, సియా అవితక్కఅవిచారా. సఙ్ఖారక్ఖన్ధో సియా సవితక్కసవిచారో, సియా అవితక్కవిచారమత్తో, సియా అవితక్కఅవిచారో సియా న వత్తబ్బో సవితక్కసవిచారోతిపి, అవితక్కవిచారమత్తోతిపి, అవితక్కఅవిచారోతిపి.

దసాయతనా అవితక్కఅవిచారా. మనాయతనం సియా సవితక్కసవిచారం, సియా అవితక్కవిచారమత్తం, సియా అవితక్కఅవిచారం. ధమ్మాయతనం సియా సవితక్కసవిచారం, సియా అవితక్కవిచారమత్తం, సియా అవితక్కఅవిచారం, సియా న వత్తబ్బం సవితక్కసవిచారన్తిపి, అవితక్కవిచారమత్తన్తిపి, అవితక్కఅవిచారన్తిపి.

పన్నరస ధాతుయో అవితక్కఅవిచారా. మనోధాతు సవితక్కసవిచారా. మనోవిఞ్ఞాణధాతు సియా సవితక్కసవిచారా, సియా అవితక్కవిచారమత్తా, సియా అవితక్కఅవిచారా. ధమ్మధాతు సియా సవితక్కసవిచారా, సియా అవితక్కవిచారమత్తా, సియా అవితక్కఅవిచారా, సియా న వత్తబ్బా సవితక్కసవిచారాతిపి, అవితక్కవిచారమత్తాతిపి, అవితక్కఅవిచారాతిపి.

సముదయసచ్చం సవితక్కసవిచారం. నిరోధసచ్చం అవితక్కఅవిచారం. మగ్గసచ్చం సియా సవితక్కసవిచారం, సియా అవితక్కవిచారమత్తం, సియా అవితక్కఅవిచారం. దుక్ఖసచ్చం సియా సవితక్కసవిచారం, సియా అవితక్కవిచారమత్తం, సియా అవితక్కఅవిచారం, సియా న వత్తబ్బం సవితక్కసవిచారన్తిపి, అవితక్కవిచారమత్తన్తిపి, అవితక్కఅవిచారన్తిపి.

నవిన్ద్రియా అవితక్కఅవిచారా. దోమనస్సిన్ద్రియం సవితక్కసవిచారం. ఉపేక్ఖిన్ద్రియం సియా సవితక్కసవిచారం, సియా అవితక్కఅవిచారం. ఏకాదసిన్ద్రియా సియా సవితక్కసవిచారా, సియా అవితక్కవిచారమత్తా, సియా అవితక్కఅవిచారా.

తయో అకుసలహేతూ సవితక్కసవిచారా. ఛ హేతూ సియా సవితక్కసవిచారా, సియా అవితక్కవిచారమత్తా, సియా అవితక్కఅవిచారా. కబళీకారో ఆహారో అవితక్కఅవిచారో. తయో ఆహారా సియా సవితక్కసవిచారా, సియా అవితక్కవిచారమత్తా, సియా అవితక్కఅవిచారా. పఞ్చ ఫస్సా అవితక్కఅవిచారా. మనోధాతుసమ్ఫస్సో సవితక్కసవిచారో. మనోవిఞ్ఞాణధాతుసమ్ఫస్సో సియా సవితక్కసవిచారో, సియా అవితక్కవిచారమత్తో, సియా అవితక్కఅవిచారో. పఞ్చ వేదనా… పఞ్చ సఞ్ఞా… పఞ్చ చేతనా… పఞ్చ చిత్తా అవితక్కఅవిచారా మనోధాతు సవితక్కసవిచారా, మనోవిఞ్ఞాణధాతు సియా సవితక్కసవిచారా, సియా అవితక్కవిచారమత్తా, సియా అవితక్కఅవిచారా.

(౧) రూపదుకం

౧౦౪౩. పఞ్చన్నం ఖన్ధానం కతి రూపా, కతి అరూపా…పే… సత్తన్నం చిత్తానం కతి రూపా, కతి అరూపా?

రూపక్ఖన్ధో రూపం. చత్తారో ఖన్ధా అరూపా. దసాయతనా రూపా. మనాయతనం అరూపం. ధమ్మాయతనం సియా రూపం, సియా అరూపం. దస ధాతుయో రూపా. సత్త ధాతుయో అరూపా. ధమ్మధాతు సియా రూపా, సియా అరూపా. తీణి సచ్చాని అరూపా. దుక్ఖసచ్చం సియా రూపం, సియా అరూపం. సత్తిన్ద్రియా రూపా. చుద్దసిన్ద్రియా అరూపా. జీవితిన్ద్రియం సియా రూపం, సియా అరూపం. నవ హేతూ అరూపా. కబళీకారో ఆహారో రూపం. తయో ఆహారా అరూపా. సత్త ఫస్సా అరూపా. సత్త వేదనా… సత్త సఞ్ఞా… సత్త చేతనా సత్త చిత్తా అరూపా.

(౨) లోకియదుకం

౧౦౪౪. పఞ్చన్నం ఖన్ధానం కతి లోకియా, కతి లోకుత్తరా? ద్వాదసన్నం ఆయతనానం కతి లోకియా, కతి లోకుత్తరా? అట్ఠారసన్నం ధాతూనం కతి లోకియా, కతి లోకుత్తరా? చతున్నం సచ్చానం కతి లోకియా, కతి లోకుత్తరా…పే… సత్తన్నం చిత్తానం కతి లోకియా, కతి లోకుత్తరా?

రూపక్ఖన్ధో లోకియో. చత్తారో ఖన్ధా సియా లోకియా, సియా లోకుత్తరా. దసాయతనా లోకియా. ద్వే ఆయతనా సియా లోకియా, సియా లోకుత్తరా. సోళస ధాతుయో లోకియా. ద్వే ధాతుయో సియా లోకియా, సియా లోకుత్తరా. ద్వే సచ్చా లోకియా. ద్వే సచ్చా లోకుత్తరా.

దసిన్ద్రియా లోకియా. తీణిన్ద్రియా లోకుత్తరా. నవిన్ద్రియా సియా లోకియా, సియా లోకుత్తరా. తయో అకుసలహేతూ లోకియా. ఛ హేతూ సియా లోకియా, సియా లోకుత్తరా. కబళీకారో ఆహారో లోకియో. తయో ఆహారా సియా లోకియా, సియా లోకుత్తరా. ఛ ఫస్సా లోకియా. మనోవిఞ్ఞాణధాతుసమ్ఫస్సో సియా లోకియో, సియా లోకుత్తరో. ఛ వేదనా లోకియా. మనోవిఞ్ఞాణధాతుసమ్ఫస్సజా వేదనా సియా లోకియా, సియా లోకుత్తరా. ఛ సఞ్ఞా లోకియా. మనోవిఞ్ఞాణధాతుసమ్ఫస్సజా సఞ్ఞా సియా లోకియా, సియా లోకుత్తరా. ఛ చేతనా లోకియా. మనోవిఞ్ఞాణధాతుసమ్ఫస్సజా చేతనా సియా లోకియా, సియా లోకుత్తరా. ఛ చిత్తా లోకియా. మనోవిఞ్ఞాణధాతు సియా లోకియా, సియా లోకుత్తరాతి.

అభిఞ్ఞా ద్వే సారమ్మణా, దిట్ఠా కుసలవేదనా;

విపాకా చ ఉపాదిన్నా, వితక్కం రూపలోకియాతి.

ధమ్మహదయవిభఙ్గో నిట్ఠితో.

విభఙ్గపకరణం నిట్ఠితం.