(౩౫. క) అయోనిసో మనసికారో

౯౩౬. తత్థ కతమో అయోనిసో మనసికారో? అనిచ్చే ‘‘నిచ్చ’’న్తి అయోనిసో మనసికారో, దుక్ఖే ‘‘సుఖ’’న్తి అయోనిసో మనసికారో, అనత్తని ‘‘అత్తా’’తి అయోనిసో మనసికారో, అసుభే ‘‘సుభ’’న్తి అయోనిసో మనసికారో, సచ్చవిప్పటికులేన వా చిత్తస్స ఆవట్టనా అనావట్టనా ఆభోగో సమన్నాహారో మనసికారో – అయం వుచ్చతి ‘‘అయోనిసో మనసికారో’’.

(ఖ) కుమ్మగ్గసేవనా

తత్థ కతమా కుమ్మగ్గసేవనా? తత్థ కతమో కుమ్మగ్గో? మిచ్ఛాదిట్ఠి, మిచ్ఛాసఙ్కప్పో, మిచ్ఛావాచా, మిచ్ఛాకమ్మన్తో, మిచ్ఛాఆజీవో, మిచ్ఛావాయామో, మిచ్ఛాసతి, మిచ్ఛాసమాధి – అయం వుచ్చతి ‘‘కుమ్మగ్గో’’. యా ఇమస్స కుమ్మగ్గస్స సేవనా నిసేవనా సంసేవనా భజనా సమ్భజనా భత్తి సమ్భత్తి తంసమ్పవఙ్కతా – అయం వుచ్చతి ‘‘కుమ్మగ్గసేవనా’’.

(గ) చేతసో చ లీనత్తం

తత్థ కతమం చేతసో చ లీనత్తం? యా చిత్తస్స అకల్యతా అకమ్మఞ్ఞతా ఓలీయనా సల్లీయనా లీనం లీయనా లీయితత్తం థినం థియనా థియితత్తం చిత్తస్స – ఇదం వుచ్చతి ‘‘చేతసో చ లీనత్తం’’.

తికం.