౭. సఙ్ఘతేదకక్ఖన్ధక

పుచ్ఛా – కథం ఆవుసో ఛన్నం సక్యకుమారానం సహ ఉపాలికప్పకేన పబ్బజ్జా అహోసి, కథఞ్చ నేసం విసేసో ఉదపాది.

విస్సజ్జనా – భగవా భన్తే ఉపాలిం కప్పకం పఠమం పబ్బాజేసి, పచ్ఛా తే సక్యకుమారే, అథ భన్తే ఆయస్మా భద్దియో తేనేవ అన్తరవస్సేన తిస్సో విజ్జా సచ్ఛాకాసి, ఆయస్మా అనురుద్ధో దిబ్బచక్ఖుం ఉప్పాదేసి, ఆయస్మా ఆనన్దో సోతాపత్తిఫలం సచ్ఛాకాసి, దేవదత్తో పోథుజ్జనికం ఇద్ధిం అభినిప్ఫాదేసి. ఏవం ఖో భన్తే ఛన్నం సక్యకుమారానం ఉపాలికప్పకేన సహ పబ్బజ్జా అహోసి, ఏవఞ్చ పన భన్తే తేసం విసేసాధిగమో అహోసి.

పకాసనీయ

పుచ్ఛా – పకాసనీయకమ్మం ఆవుసో కాతుం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – రాజగహే భన్తే దేవదత్తం ఆరబ్భ పఞ్ఞత్తం, దేవదత్తో భన్తే ‘‘సరాజికాయ మం భగవా పరిసాయ ఖేళాసకవాదేన అపసాదేతి, సారిపుత్తమోగ్గల్లానేవ ఉక్కంసతీ’’తి కుపితో అనత్తమనో భగవతి ఆఘాతం బన్ధి, తస్మిం భన్తే వత్థుస్మిం పఞ్ఞత్తం.

పకాసనీయ

పుచ్ఛా – దేవదత్తస్స ఆవుసో పకాసనీయకమ్మం కారాపేత్వా కథం భగవా పకాసేతుం ఆణాపేసి.

విస్సజ్జనా – భగవా భన్తే దేవదత్తస్స పకాసనీయకమ్మం కాతుం పఞ్ఞపేత్వా ఆయస్మన్తం సారిపుత్తం ఆమన్తేసి ‘‘తేన హి త్వం సారిపుత్త దేవదత్తం రాజగహే పకాసేహీ’’తి, ఏవం ఖో భన్తే దేవదత్తస్స పకాసనీయకమ్మం కత్వా దేవదత్తం రాజగహే పకాసేతుం భగవా ఆణాపేసి.

దేవదత్త

పుచ్ఛా – కథం ఆవుసో దేవదత్తేన దుట్ఠచిత్తేన వధకచిత్తేన తథా గతస్స రుహిరం ఉప్పాదేత్వా పఠమం ఆనన్తరియం కమ్మం ఉపచితం.

విస్సజ్జనా – భగవా భన్తే గిజ్ఝకూటస్స పబ్బతస్స ఛాయాయం చఙ్కమి, అథ భన్తే దేవదత్తో గిజ్ఝకూటం పబ్బతం ఆరుహిత్వా మహతిం సిలం పవిజ్ఝి ‘‘ఇమాయ సమణం గోతమం జీవితా వోరోపేస్సామీ’’తి, అథ ఖో భన్తే ద్వే పబ్బతకూటాని సమాగన్త్వా తం సిలం సమ్పటిచ్ఛింసు, తతో పపతికా ఉప్పతిత్వా భగవతో పాదే రుహిరం ఉప్పాదేసి. ఏవం ఖో భన్తే దేవదత్తేన దుట్ఠేన వధకచిత్తేన తథాగతస్స రుహిరం ఉప్పాదేత్వా పఠమం ఆనన్తరియకమ్మం ఉపచితం.

పుచ్ఛా – కులేసు ఆవుసో తికభోజనం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – రాజగహే భన్తే దేవదత్తం ఆరబ్భ పఞ్ఞత్తం, దేవదత్తో భన్తే పరిహీనలాభసక్కారో సపరిసో కులేసు విఞ్ఞాపేత్వా విఞ్ఞాపేత్వా భుఞ్జి, తస్మిం భన్తే వత్థుస్మిం పఞ్ఞత్తం.

పుచ్ఛా – అలం దేవదత్త, మా తే రుచ్చి సఙ్ఘభేదో, గరుకో ఖో దేవదత్త సఙ్ఘభేదోతిఆదికో ఆవుసో ఓవాదో భగవతా కత్థ దిన్నో, కిస్మిం వత్థుస్మిం దిన్నో.

విస్సజ్జనా – రాజగహే భన్తే దేవదత్తం ఆరబ్భ దిన్నో, దేవదత్తో భన్తే సఙ్ఘభేదాయ పరక్కమి చక్కభేదాయ, తస్మిం భన్తే వత్థుస్మిం దిన్నో.

అలం దేవదత్త, మా తే రుచ్చి సఙ్ఘభేదో, గరుకో ఖో దేవదత్త సఙ్ఘభేదో –

పుచ్ఛా – ‘‘సుకరం సాధునా సాధుం, సాధుం పాపేన దుక్కరం. పాపం పాపేన సుకరం, పాపమరియేహి దుక్కర’’న్తి- ఆవుసో ఇదం ఉదానం భగవతా కత్థ ఉదానితం, కం ఆరబ్భ కిస్మిం వత్థుస్మిం ఉదానితం.

విస్సజ్జనా – రాజగహే భన్తే దేవదత్తంయేవ ఆరబ్భ ఉదానితం, ఆయస్మా భన్తే ఆనన్దో పుబ్బణ్హసమయం నివాసేత్వా పత్తచీవరమాదాయ రాజగహం పిణ్డాయ పావిసి, అథ ఖో భన్తే దేవదత్తో యేనాయస్మా ఆనన్దో తేనుపసఙ్కమి, ఉపసఙ్కమిత్వా ఆయస్మన్తం ఆనన్దం ఏతదవోచ ‘‘అజ్జతగ్గే దానాహం ఆవుసో ఆనన్ద అఞ్ఞత్రేవ భగవతా అఞ్ఞత్రేవ భిక్ఖుసఙ్ఘా ఉపోసథం కరిస్సామి సఙ్ఘకమ్మం కరిస్సామీ’’తి, తస్మిం భన్తే వత్థుస్మిం ఉదానితం.

సుకరం సాధునా సాధుం, సాధుం పాపేన దుక్కరం;

పాపం పాపేన సుకరం, పాపమరియేహి దుక్కరం.

పుచ్ఛా – భేదానువత్తకానం ఆవుసో భిక్ఖూనం థుల్లచ్చయం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – రాజగహే భన్తే సమ్బహులే భిక్ఖూ ఆరబ్భ పఞ్ఞత్తం, ఆయస్మా భన్తే సారిపుత్తో భగవన్తం ఉపసఙ్కమిత్వా ఏతదవోచ ‘‘సాధు భన్తే భేదానువత్తకా భిక్ఖూ పున ఉపసమ్పజ్జేయ్యు’’న్తి, తస్మిం భన్తే వత్థుస్మిం పఞ్ఞత్తం.

‘‘సాధు భన్తే భేదానువత్తకా భిక్ఖూ పున ఉపసమ్పజ్జేయ్యు’’న్తి –

పుచ్ఛా – కిత్తావతా ను ఖో ఆవుసో సఙ్ఘరాజి హోతి నో చ సఙ్ఘభేదో, కిత్తావతా చ పన సఙ్ఘరాజి చేవ హోతి సఙ్ఘభేదో చ.

విస్సజ్జనా – ఏకతో భన్తే ఏకో హోతి, ఏకతో ద్వే చతుత్థో అనుస్సావేతి, సలాకం గాహేతి ‘‘అయం ధమ్మో అయం వినయో ఇదం సత్థుసాసనం ఇమం గణ్హథ ఇమం రోచేథాతి’’, ఏతేనేవ భన్తే నయేన చతున్నం వా పఞ్చన్నం వా ఛన్నం వా సత్తన్నం వా అట్ఠన్నం వా సఙ్ఘరాజి హోతి, నో చ సఙ్ఘభేదో, ఏకతో భన్తే చత్తారో హోన్తి, ఏకతో చత్తారో, నవమో అనుస్సావేతి, సలాకం గాహేతి ‘‘అయం ధమ్మో అయం వినయో ఇదం సత్థుసాసనం ఇమం గణ్హథ ఇమం రోచేథా’’తి, ఏవం ఖో భన్తే సఙ్ఘరాజి చేవ హోతి సఙ్ఘభేదో చ. ఏవం ఖో భన్తే సఙ్ఘరాజి హోతి, నో చ సఙ్ఘభేదో, ఏవఞ్చ పన భన్తే సఙ్ఘరాజి చేవ హోతి సఙ్ఘభేదో చ.

పుచ్ఛా – కిత్తావతా ను ఖో ఆవుసో సఙ్ఘో భిన్నో హోతి.

విస్సజ్జనా – ఇధ భన్తే భిక్ఖూ అధమ్మాదిం ధమ్మాదీనీతి దీపేన్తి, తే ఇమేహి అట్ఠారసహి వత్థూహి అపకస్సన్తి, అవపకస్సన్తి, ఆవేనిం ఉపోసథం కరోన్తి, ఆవేనిం పవారణం కరోన్తి, ఆవేనిం సఙ్ఘకమ్మం కరోన్తి, ఏవం ఖో భన్తే సఙ్ఘో భిన్నో హోతి.

పుచ్ఛా – కిత్తావతా ను ఖో ఆవుసో సఙ్ఘో సమగ్గో హోతి.

విస్సజ్జనా – ఇధ భన్తే భిక్ఖూ అధమ్మం అధమ్మోతి దీపేన్తి, ధమ్మం ధమ్మోతి దీపేన్తి, అవినయం అవినయోతి దీపేన్తి…పే… దుట్ఠుల్లం ఆపత్తిం దుట్ఠుల్లా ఆపత్తీతి దీపేన్తి, అదుట్ఠుల్లం ఆపత్తిం అదుట్ఠుల్లా ఆపత్తీతి దీపేన్తి, తే ఇమేహి అట్ఠారసహి వత్థూహి న అపకస్సన్తి, న అవపకస్సన్తి, న ఆవేనిం ఉపోసథం కరోన్తి, న ఆవేనిం పవారణం కరోన్తి, న ఆవేనిం సఙ్ఘకమ్మం కరోన్తి, ఏత్తావతా ఖో భన్తే సఙ్ఘో సమగ్గో హోతి.

పుచ్ఛా – సమగ్గం ఆవుసో సఙ్ఘం భిన్దిత్వా కిం సో పసవతి.

విస్సజ్జనా – సమగ్గం ఖో భన్తే సఙ్ఘం భిన్దిత్వా కప్పట్ఠితికం కిబ్బిసం పసవతి, కప్పం నిరయమ్హి పచ్చతి.

పుచ్ఛా – భిన్నం ఖో ఆవుసో సఙ్ఘం సమగ్గం కత్వా కిం సో పసవతి.

విస్సజ్జనా – భిన్నం ఖో భన్తే సఙ్ఘం సమగ్గం కత్వా బ్రహ్మం పుఞ్ఞం పసవతి, కప్పం సగ్గమ్హి మోదతి.

పుచ్ఛా – సఙ్ఘభేదం పుచ్ఛిస్సం, సనిదానం సనిద్దేసం. సముక్కట్ఠపదానం ఆవుసో కతి ఆపత్తియో.

విస్సజ్జనా – సఙ్ఘభేదం విస్సజ్జిస్సం, సనిదానం సనిద్దేసం. సముక్కట్ఠపదానం భన్తే ద్వే ఆపత్తియో.