చూళవగ్గపాళి

౧. కమ్బక్ఖన్ధక

పుచ్ఛా – భణ్డనాదికారకస్స ఆవుసో భిక్ఖునో తజ్జనీయకమ్మం కాతుం భగవతా కత్థ అనుఞ్ఞాతం, కం ఆరబ్భ కిస్మిం వత్థుస్మిం అనుఞ్ఞాతం.

విస్సజ్జనా – సావత్థియం భన్తే పణ్డుకలోహితకే భిక్ఖూ ఆరబ్భ అనుఞ్ఞాతం, పణ్డుకలోహితకా భన్తే భిక్ఖూ అత్తనా భణ్డనకారకా కలహకారకా వివాదకారకా భస్సకారకా సఙ్ఘే అధికరణకారకా, యేపి చఞ్ఞే భిక్ఖూ భణ్డనకారకా కలహకారకా వివాదకారకా భస్సకారకా సఙ్ఘే అధికరణకారకా తే ఉపసఙ్కమిత్వా ఏవమాహంసు ‘‘మా ఖో తుమ్హే ఆయస్మన్తో ఏసో అజేసి, బలవాబలవం పటిమన్తేథ, తుమ్హే తేన పణ్డితతరా చ బ్యత్తతరా చ బహుస్సుతతరా చ అలమత్తతరా చ, మా చస్స భాయిత్థ, మయమ్పి తుమ్హాకం పక్ఖా భవిస్సామా’’తి, తేన అనుప్పన్నాని చేవ భణ్డనాని ఉప్పజ్జన్తి, ఉప్పన్నాని చ భణ్డనాని భియ్యోభావాయ వేపుల్లాయ సంవత్తన్తి. తస్మిం భన్తే వత్థుస్మిం అనుఞ్ఞాతం.

పుచ్ఛా – తజ్జనీయకమ్మకతస్స ఆవుసో భిక్ఖునో కతిసు వత్తేసు సమ్మా వత్తన్తస్స తం కమ్మం పటిప్పస్సమ్భేతుం భగవతా కత్థ అనుఞ్ఞాతం, కం ఆరబ్భ కిస్మిం వత్థుస్మిం అనుఞ్ఞాతం.

విస్సజ్జనా – అట్ఠారససు భన్తే వత్తేసు సమ్మా వత్తన్తస్స తజ్జనీయకమ్మకతస్స భిక్ఖునో తం కమ్మం పటిప్పస్సమ్భేతుం భగవతా సావత్థియం అనుఞ్ఞాతం, తేయేవ పణ్డుకలోహితకా భిక్ఖూ సఙ్ఘేన తజ్జనీయకమ్మకతా సమ్మా వత్తిత్వా సఙ్ఘం ఉపసఙ్కమిత్వా యాచింసు, తస్మిం భన్తే వత్థుస్మిం అనుఞ్ఞాతం.

పుచ్ఛా – బాలస్స ఆవుసో అబ్యత్తస్స ఆపత్తిబహులస్స అనపదానస్స గిహిసంసట్ఠస్స అననులోమికేహి గిహిసంసగ్గేహి నియస్సకమ్మం కాతుం కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – సావత్థియం భన్తే ఆయస్మన్తం సేయ్యసకం ఆరబ్భ పఞ్ఞత్తం, ఆయస్మా భన్తే సేయ్యసకో బాలో అహోసి అబ్యత్తో ఆపత్తిబహులో అనపదానో గిహిసంసట్ఠో విహాసి అననులోమికేహి గిహిసంసగ్గేహి, తస్మిం భన్తే వత్థుస్మిం పఞ్ఞత్తం.

పుచ్ఛా – నియస్సకమ్మకతస్స ఆవుసో భిక్ఖునో కతిసు వత్తేసు సమ్మా వత్తన్తస్స తం కమ్మం పటిప్పస్సమ్భేతుం భగవతా అనుఞ్ఞాతం.

విస్సజ్జనా – అట్ఠారససు భన్తే వత్తేసు సమ్మా వత్తన్తస్స నియస్స కమ్మకతస్స భిక్ఖునో తం కమ్మం పటిప్పస్సమ్భేతుం భగవతా అనుఞ్ఞాతం, న ఉపసమ్పాదేతబ్బం, న నిస్సయో దాతబ్బో, న సామణేరో ఉపట్ఠాపేతబ్బో, న భిక్ఖునోవాదకసమ్ముతి సాదితబ్బా, సమ్మతేనపి భిక్ఖునియో న ఓవదితబ్బా, ఏవమాదీసు భన్తే అట్ఠారససు వత్తేసు సమ్మా వత్తన్తస్స నియస్సకమ్మకతస్స భిక్ఖునో తం కమ్మం పటిప్పస్సమ్భేతుం భగవతా అనుఞ్ఞాతం.

పుచ్ఛా – కులదూసకస్స ఆవుసో పాపసమాచారస్స భిక్ఖునో పబ్బాజనీయకమ్మం కాతుం భగవతా కత్థ అనుఞ్ఞాతం, కం ఆరబ్భ కిస్మిం వత్థుస్మిం అనుఞ్ఞాతం.

విస్సజ్జనా – సావత్థియం భన్తే అస్సజిపునబ్బసుకే భిక్ఖూ ఆరబ్భ అనుఞ్ఞాతం, అస్సజిపునబ్బసుకా భన్తే భిక్ఖూ కీటాగిరిస్మిం కులదూసకా అహేసుం పాపసమాచారా, తస్మిం భన్తే వత్థుస్మిం అనుఞ్ఞాతం.

పుచ్ఛా – పటిసారణీయకమ్మం ఆవుసో పుచ్ఛామి, సద్ధం ఆవుసో పసన్నం గహపతిం దాయకం కారకం సఙ్ఘుపట్ఠాకం హీనేన ఖుంసేన్తస్స భిక్ఖునో పటిసారణీయకమ్మం కాతుం భగవతా కత్థ అనుఞ్ఞాతం, కం ఆరబ్భ కిస్మిం వత్థుస్మిం అనుఞ్ఞాతం.

విస్సజ్జనా – సావత్థియం భన్తే ఆయస్మన్తం సుధమ్మం ఆరబ్భ అనుఞ్ఞాతం, భగవతి భన్తే సావత్థియం విహరతి ఆయస్మా సుధమ్మో మచ్ఛికాసణ్డే చిత్తం గహపతిం సద్ధం పసన్నం దాయకం కారకం సఙ్ఘుపట్ఠాకం హీనేన ఖుంసేసి హీనేన వమ్భేసి, తస్మిం భన్తే వత్థుస్మిం అనుఞ్ఞాతం.

తేనహి భిక్ఖవే సఙ్ఘో సుధమ్మస్స భిక్ఖునో పటిసారణీయకమ్మం కరోతు ‘‘చిత్తో తే గహపతి ఖమాపేతబ్బో’’తి –

పుచ్ఛా – పటిసారణీయకమ్మకతస్స ఆవుసో భిక్ఖునో అనుదూతం దాతుఞ్చ తేన అనుదూతేన సద్ధిం గన్త్వా యథాఖుంసితం గహపతిం ఖమాపేతుం చ భగవతా కత్థ అనుఞ్ఞాతం, కం ఆరబ్భ కిస్మిం వత్థుస్మిం అనుఞ్ఞాతం.

విస్సజ్జనా – సావత్థియం భన్తే ఆయస్మన్తంయేవ సుధమ్మం ఆరబ్భ అనుఞ్ఞాతం, ఆయస్మా భన్తే సుధమ్మో మచ్ఛికాసణ్డం గన్త్వా మఙ్కుభూతో నాసక్ఖి చిత్తం గహపతిం ఖమాపేతుం, తస్మిం భన్తే వత్థుస్మిం అనుఞ్ఞాతం.

పుచ్ఛా – పటిసారణీయకమ్మకతస్స ఆవుసో భిక్ఖునో కతిసు వత్తేసు సమ్మా వత్తన్తస్స తం కమ్మం పటిప్పస్సమ్భేతుం భగవతా అనుఞ్ఞాతం.

విస్సజ్జనా – అట్ఠారససు భన్తే వత్తేసు సమ్మా వత్తన్తస్స పటిసారణీయ కమ్మకతస్స భిక్ఖునో తం కమ్మం పటిప్పస్సమ్భేతుం భగవతా అనుఞ్ఞాతం.

పుచ్ఛా – ఆపత్తిం ఆవుసో ఆపజ్జిత్వా తం ఆపత్తిం పస్సితుం వా పటికాతుం వా న ఇచ్ఛన్తస్స భిక్ఖునో ఆపత్తియా అదస్సనే వా అప్పటికమ్మే వా ఉక్ఖేపనీయకమ్మం కాతుం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – కోసమ్బియం భన్తే ఆయస్మన్తం ఛన్నత్థేరం ఆరబ్భ పఞ్ఞత్తం, ఆయస్మా భన్తే ఛన్నో ఆపత్తిం ఆపజ్జిత్వా న ఇచ్ఛి తం ఆపత్తిం పస్సితుం వా పటికాతుం వా, తస్మిం భన్తే వత్థుస్మిం పఞ్ఞత్తం.

పుచ్ఛా – ఆపత్తియా ఆవుసో అదస్సనేన వా అప్పటికమ్మే వా ఉక్ఖేపనీయ కమ్మకతేన భిక్ఖునా కతిసు వత్తేసు సమ్మా వత్తితబ్బం.

విస్సజ్జనా – తేచత్తాలీసాయ భన్తే వత్తేసు సమ్మా వత్తితబ్బం.

పుచ్ఛా – ఉక్ఖేపనీయకమ్మకతస్స ఆవుసో భిక్ఖునో సమ్మా వత్తన్తస్స తం కమ్మం పటిప్పస్సమ్భేతుం భగవతా కత్థ అనుఞ్ఞాతం, కం ఆరబ్భ కిస్మిం వత్థుస్మిం అనుఞ్ఞాతం.

విస్సజ్జనా – కోసమ్బియం భన్తే ఆయస్మన్తంయేవ ఛన్నం ఆరబ్భ అనుఞ్ఞాతం, ఆయస్మా భన్తే ఛన్నో సఙ్ఘేన ఆపత్తియా అదస్సనే వా అప్పటికమ్మే వా ఉక్ఖేపనీయకమ్మకతో సమ్మా వత్తేసి లోమంపాతేసి నేత్థారం వత్తేసి సఙ్ఘం ఉపసఙ్కమిత్వా తస్స కమ్మస్స పటిప్పస్సద్ధియా యాచి, తస్మిం భన్తే వత్థుస్మిం అనుఞ్ఞాతం.

పుచ్ఛా – పాపికం ఆవుసో దిట్ఠిం గహేత్వా తం దిట్ఠిం న పటినిస్సజ్జన్తస్స పాపికాయ దిట్ఠియా అప్పటినిస్సగ్గే ఉక్ఖేపనీయకమ్మం కాతుం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – సావత్థియం భన్తే అరిట్ఠం భిక్ఖుం గద్ధబాధిపుబ్బం ఆరబ్భ పఞ్ఞత్తం, భగవతి భన్తే సావత్థియం విహరతి అరిట్ఠస్స నామ భిక్ఖునో గద్ధబాధిపుబ్బస్స ఏవరూపం పాపకం దిట్ఠిగతం ఉప్పన్నం అహోసి ‘‘తథాహం భగవతా ధమ్మం దేసితం ఆజానామి, యథాయేమే అన్తరాయికా ధమ్మా వుత్తా భగవతా, తే పటిసేవతో నాలం అన్తరాయాయా’’తి, తస్మిం భన్తే వత్థుస్మిం పఞ్ఞత్తం.

పుచ్ఛా – పాపికాయ ఆవుసో దిట్ఠియా అప్పటినిస్సగ్గే ఉక్ఖేపనీయకమ్మకతేన భిక్ఖునా కతిసు వత్తేసు సమ్మా వత్తితబ్బం.

విస్సజ్జనా – తేచత్తాలీసాయ భన్తే వత్తేసు సమ్మా వత్తితబ్బం.

పుచ్ఛా – కమ్మక్ఖన్ధకం పుచ్ఛిస్సం, సనిదాని సనిద్దేసం. సముక్కట్ఠపదానం ఆవుసో కతి ఆపత్తియో.

విస్సజ్జనా – కమ్మక్ఖన్ధకం విస్సజ్జిస్సం, సనిదానం సనిద్దేసం. సముక్కట్ఠపదానం భన్తే ఏకా ఆపత్తి.

౨. పారివాసికక్ఖన్ధక

పుచ్ఛా – పారివాసికస్స ఆవుసో పకతత్తానం భిక్ఖూనం అభివాదనాదీని సాదియన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – సావత్థియం భన్తే పారివాసికే భిక్ఖూ ఆరబ్భ పఞ్ఞత్తం, పారివాసికా భన్తే భిక్ఖూ సాదియింసు పకతత్తానం భిక్ఖూనం అభివాదనాదీని, తస్మిం భన్తే వత్థుస్మిం పఞ్ఞత్తం.

పుచ్ఛా – పారివాసికేన ఆవుసో భిక్ఖునా కతిసు వత్తేసు సమ్మా వత్తితబ్బం.

విస్సజ్జనా – పారివాసికేన భన్తే భిక్ఖునా చతునవుతియా వత్తేసు సమ్మా వత్తితబ్బం.

పుచ్ఛా – పారివాసికం పుచ్ఛిస్సం, సనిదానం సనిద్దేసం. సముక్కట్ఠపదానం ఆవుసో కతి ఆపత్తియో.

విస్సజ్జనా – పారివాసికం విస్సజ్జిస్సం, సనిదానం సనిద్దేసం. సముక్కట్ఠపదానం భన్తే ఏకా ఆపత్తి.

౩. సముచ్చయక్ఖన్ధక

పుచ్ఛా – సముచ్చయం పుచ్ఛిస్సం, సనిదానం సనిద్దేసం. సముక్కట్ఠపదానం ఆవుసో కతి ఆపత్తియో.

విస్సజ్జనా – సముచ్చయం విస్సజ్జిస్సం, సనిదానం సనిద్దేసం. సముక్కట్ఠపదానం భన్తే ఏకా ఆపత్తి.

౪. సమథక్ఖన్ధక

పుచ్ఛా – అసమ్ముఖీభూతానం ఆవుసో భిక్ఖూనం తజ్జనీయం వా నియస్సం వా పబ్బాజనీయం వా పటిసారణీయం వా ఉక్ఖేపనీయం వా కమ్మం కరోన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – సావత్థియం భన్తే ఛబ్బగ్గియే భిక్ఖూ ఆరబ్భ పఞ్ఞత్తం, ఛబ్బగ్గియా భన్తే భిక్ఖూ అసమ్ముఖీభూతానం భిక్ఖూనం కమ్మం అకంసు తజ్జనీయమ్పి నియస్సమ్పి పబ్బాజనీయమ్పి పటిసారణీయమ్పి ఉక్ఖేపనీయమ్పి, తస్మిం భన్తే వత్థుస్మిం పఞ్ఞత్తం.

పుచ్ఛా – సతివేపుల్లపత్తస్స ఆవుసో భిక్ఖునో సతివినయం దానం భగవతా కత్థ అనుఞ్ఞాతం, కం ఆరబ్భ కిస్మిం వత్థుస్మిం అనుఞ్ఞాతం.

విస్సజ్జనా – రాజగహే భన్తే మేత్తియభూమజకే భిక్ఖూ ఆరబ్భ అనుఞ్ఞాతం మేత్తియభూమజకా భన్తే భిక్ఖూ ఆయస్మన్తం దబ్బం మల్లపుత్తం అమూలికాయ సీలవిపత్తియా అనుద్ధంసేసుం, తస్మిం భన్తే వత్థుస్మిం అనుఞ్ఞాతం.

పుచ్ఛా – కతిపనావుసో ఏత్థ ధమ్మికాని సతివినయదానాని.

విస్సజ్జనా – పఞ్చిమాని భన్తే ధమ్మికాని సతివినయస్స దానాని, సుద్ధో హోతి భిక్ఖు అనాపత్తికో, అనువదన్తి చ నం, యాచతి చ, తస్స సఙ్ఘో సతివినయం దేతి ధమ్మేన సమగ్గేన, ఇమాని ఖో భన్తే పఞ్చ ధమ్మికాని సతి వినయస్స దానాని.

పుచ్ఛా – అమూళ్హస్స ఆవుసో భిక్ఖునో అమూళ్హవినయం దాతుం భగవతా కత్థ అనుఞ్ఞాతం, కం ఆరబ్భ కిస్మిం వత్థుస్మిం అనుఞ్ఞాతం.

విస్సజ్జనా – రాజగహే భన్తే సమ్బహులే భిక్ఖూ ఆరబ్భ అనుఞ్ఞాతం, సమ్బహులా భన్తే భిక్ఖూ గగ్గం భిక్ఖుం ఉమ్మత్తకేన చిత్తవిపరియాసకతేన అజ్ఝాచిణ్ణేన ఆపత్తియా చోదేసుం ‘‘సరతా యస్మా ఏవరూపిం ఆపత్తిం ఆపజ్జితా’’తి, సో ఏవం వదేతి ‘‘అహం ఖో ఆవుసో ఉమ్మత్తకో అహోసి చిత్తవిపరియాసకతో, తేన మే ఉమ్మత్తకేన చిత్తవిపరియాసకతేన బహుం అస్సామణకం అజ్ఝాచిణ్ణం భాసితపరిక్కన్తం, నాహం తం సరామి, మూళ్హేన మే ఏతం కత’’న్తి. ఏవమ్పి నం వుచ్చమానా చోదేన్తేవ ‘‘సరతా యస్మా ఏవరూపిం ఆపత్తిం ఆపజ్జితా’’తి, తస్మిం భన్తే వత్థుస్మిం అనుఞ్ఞాతం.

పుచ్ఛా – కతి ఆవుసో అధమ్మికాని అమూళ్హవినయస్స దానాని, విభజిత్వా కథేహి.

విస్సజ్జనా – తీణి భన్తే అధమ్మికాని అమూళ్హవినయస్స దానాని, ఇధ భన్తే భిక్ఖు ఆపత్తిం ఆపన్నో హోతి, తమేనం చోదేతి సఙ్ఘో వా సమ్బహులా వా ఏకపుగ్గలో వా ‘‘సరతాయస్మా ఏవరూపిం ఆపత్తిం ఆపజ్జితా’’తి, సో సరమానోవ ఏవం వదేతి ‘‘న ఖో అహం ఆవుసో సరామి ఏవరూపిం ఆపత్తిం ఆపజ్జితా’’తి. అఞ్ఞో సరమానోవ ఏవం వదేతి ‘‘సరామి ఖో అహం ఆవుసో యథా సుపినన్తేనా’’తి. అఞ్ఞో అనుమ్మత్తకోవ ఉమ్మత్తకాలయం కరోతి ‘‘అహమ్పి ఖో ఏవం కరోమి, తుమ్హేపి ఏవం కరోథ, మయ్హమ్పి ఏతం కప్పతి, తుమ్హాకమ్పేతం కప్పతీ’’తి. ఏసం సఙ్ఘో అమూళ్హవినయం దేతి, అధమ్మికం భన్తే అమూళ్హవినయస్స దానం. ఇమాని ఖో భన్తే తీణి అధమ్మికాని అమూళ్హవినయస్స దానాని.

పుచ్ఛా – కతి ఆవుసో ధమ్మికాని అమూళ్హవినయస్స దానాని, విభజిత్వా కథేహి.

విస్సజ్జనా – తీణి భన్తే ధమ్మికాని అమూళ్హవినయస్స దానాని, ఇధ భన్తే భిక్ఖు ఉమ్మత్తకో హోతి చిత్తవిపరియాసకతో తేన ఉమ్మత్తకేన చిత్తవిపరియాసకతేన బహుం అస్సామణకం అజ్ఝాచిణ్ణం హోతి భాసితపరిక్కన్తం, తమేనం చోదేతి సఙ్ఘో వా సమ్బహులా వా ఏకపుగ్గలో వా ‘‘సరతాయస్మా ఏవరూపిం ఆపత్తిం ఆపజ్జితా’’తి, సో అస్సరమానోవ ఏవం వదేతి ‘‘న ఖో అహం ఆవుసో సరామి ఏవరూపిం ఆపత్తిం ఆపజ్జితా’’తి. అఞ్ఞోపి అస్సరమానోవ ఏవం వదేతి ‘‘సరామి ఖో అహం ఆవుసో యథా సుపినన్తేనా’’తి. అఞ్ఞోపి ఉమ్మత్తకోవ ఉమ్మత్తకాలయం కరోతి ‘‘అహమ్పి ఏవం కరోమి, తుమ్హేపి ఏవం కరోథ, మయ్హమ్పి ఏతం కప్పతి, తుమ్హాకమ్పేతం కప్పతీ’’తి. ఏసం భన్తే తిణ్ణం భిక్ఖూనం సఙ్ఘో అమూళ్హవినయం దేతి, ధమ్మికం భన్తే అమూళ్హవినయస్స దానం. ఇమాని ఖో భన్తే తీణి ధమ్మికాని అమూళ్హవినయస్స దానాని.

పుచ్ఛా – అప్పటిఞ్ఞాయ ఆవుసో భిక్ఖూనం తజ్జనీయాదీని కమ్మాని కరోన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – రాజగహే భన్తే ఛబ్బగ్గియే భిక్ఖూ ఆరబ్భ పఞ్ఞత్తం, ఛబ్బగ్గియా భన్తే భిక్ఖూ అప్పటిఞ్ఞాయ భిక్ఖూనం కమ్మాని అకంసు తజ్జనీయాదీని, తస్మిం భన్తే వత్థుస్మిం పఞ్ఞత్తం.

పుచ్ఛా – కథం ఆవుసో అధమ్మికం హోతి పటిఞ్ఞాతకరణం.

విస్సజ్జనా – అఞ్ఞథా భన్తే ఆపత్తిం ఆపజ్జన్తస్స అఞ్ఞథా పటిజానన్తస్స యథా సో పటిజానాతి, తథా సఙ్ఘో కారేతి, ఏవం ఖో భన్తే అధమ్మికం హోతి పటిఞ్ఞాతకరణం.

పుచ్ఛా – కథం ఆవుసో ధమ్మికం హోతి పటిఞ్ఞాతకరణం.

విస్సజ్జనా – యం భన్తే ఆపత్తిం ఆపజ్జన్తస్స తమేవ పటిజానన్తస్స తేనేవ సఙ్ఘో కారేతి, ఏవం ఖో భన్తే ధమ్మికం పటిఞ్ఞాతకరణం.

పుచ్ఛా – యేభుయ్యసికాయ ఆవుసో అధికరణం వూపసమేతుం భగవతా కత్థ అనుఞ్ఞాతం, కం ఆరబ్భ కిస్మిం వత్థుస్మిం అనుఞ్ఞాతం.

విస్సజ్జనా – రాజగహే భన్తే సమ్బహులే భిక్ఖూ ఆరబ్భ అనుఞ్ఞాతం, సమ్బహులా భన్తే భిక్ఖూ భణ్డనజాతా కలహజాతా వివాదాపన్నా అఞ్ఞమఞ్ఞం ముఖసత్తీహి వితుదన్తా విహరింసు, న సక్కోన్తి తం అధికరణం వూపసమేతుం, తస్మిం భన్తే వత్థుస్మిం అనుఞ్ఞాతం.

పుచ్ఛా – కథం ఆవుసో అధికరణం యేభుయ్యసికాయ వూపసమేతబ్బం.

విస్సజ్జనా – పఞ్చహి భన్తే అఙ్గేహి సమన్నాగతో భిక్ఖు సలాకగ్గాహాపకో సమ్మన్నితబ్బో, తేన భన్తే సలాకగ్గాహాపకేన సలాకా గాహాతబ్బా యథా బహుతరా భిక్ఖూ ధమ్మవాదినో వదన్తి తథా తం అధికరణం వూపసమేతబ్బం, ఏవం ఖో భన్తే యేభుయ్యసికాయ అధికరణం వూపసమేతబ్బం.

పుచ్ఛా – కతి ఆవుసో అధమ్మికా సలాకగ్గాహా.

విస్సజ్జనా – దస భన్తే అధమ్మికా సలాకగ్గాహా, ఓరమత్తకఞ్చ అధికరణం హోతి, న చ గతిగతం హోతి, న చ సరితసారితం హోతి, జానాతి ‘అధమ్మవాదీ బహుతరా’తి, అప్పేవ నామ అధమ్మవాదీ బహుతరా అస్సూతి, జానాతి ‘సఙ్ఘో భిజ్జిస్సతీ’తి, అప్పేవ నామ సఙ్ఘో భిజ్జేయ్యాతి, అధమ్మేన గణ్హన్తి, వగ్గా గణ్హన్తి, న చ యథాదిట్ఠియా గణ్హన్తి, ఇమే ఖో భన్తే దస అధమ్మికా కలాకగ్గాహా.

పుచ్ఛా – కతి ఆవుసో ధమ్మికా సలాకగ్గాహా.

విస్సజ్జనా – దస భన్తే ధమ్మికా సలాకగ్గాహా వుత్తవిపరియాయేన.

పుచ్ఛా – పాపుస్సన్నస్స ఆవుసో భిక్ఖుస్స తస్స పాపియసికా కమ్మం కాతుం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – రాజగహే భన్తే ఉపవాళం భిక్ఖుం ఆరబ్భ పఞ్ఞత్తం, ఉపవాళో భన్తే భిక్ఖు సఙ్ఘమజ్ఝే ఆపత్తియా అనుయుఞ్జియమానో అవజానిత్వా పటిజానాతి, పటిజానిత్వా అవజానాతి, అఞ్ఞేనఞ్ఞం పటిచరతి, సమ్పజానముసా భాసతి, తస్మిం భన్తే వత్థుస్మిం పఞ్ఞత్తం.

పుచ్ఛా – కతి ఆవుసో ధమ్మికాని తస్సపాపియసికా కమ్మస్స కరణాని.

విస్సజ్జనా – పఞ్చిమాని భన్తే ధమ్మికాని తస్సపాపియసికా కమ్మస్స కరణాని. అసుచి చ హోతి, అలజ్జీ చ, సానువాదో చ, తస్స సఙ్ఘో తస్సపాపియసికా కమ్మం కరోతి ధమ్మేన సమగ్గేన, ఇమాని ఖో భన్తే పఞ్చ ధమ్మికాని తస్స పాపియసికా కమ్మస్స కరణాని.

పుచ్ఛా – తస్స పాపియసికాకమ్మకతేన ఆవుసో భిక్ఖునా కతిసు వత్తేసు సమ్మా వత్తితబ్బం.

విస్సజ్జనా – తస్స పాపియసికాకమ్మకతేన భన్తే భిక్ఖునా అట్ఠారససు వత్తేసు సమ్మా వత్తితబ్బం. న ఉపసమ్పాదేతబ్బం, న నిస్సయో దాతబ్బో, న సామణేరో ఉపట్ఠాపేతబ్బో, ఏవమాదీసు భన్తే అట్ఠారససు వత్తేసు సమ్మా వత్తితబ్బం.

పుచ్ఛా – కతి ఆవుసో అధికరణాని సమథేహి వూపసమేతబ్బాని.

విస్సజ్జనా – చత్తారిమాని భన్తే అధికరణాని సమథేహి వూపసమేతబ్బాని, వివాదాధికరణం అనువాదాధికరణం ఆపత్తాధికరణం కిచ్చాధికరణం, ఇమాని భన్తే చత్తారి అధికరణాని సమథేహి వూపసమేతబ్బాని.

పుచ్ఛా – కిం ఆవుసో వివాదాధికరణస్స మూలం.

విస్సజ్జనా – ఛ భన్తే వివాదమూలాని వివాదాధికరణస్స మూలం, తీణిపి అకుసలమూలాని వివాదాధికరణస్స మూలం, తీణిపి కుసలమూలాని వివాదాధికరణస్స మూలం, ఇదం భన్తే వివాదాధికరణస్స మూలం.

పుచ్ఛా – కిం పనావుసో అనువాదాధికరణస్స మూలం.

విస్సజ్జనా – ఛ భన్తే అనువాదమూలాని అనువాదాధికరణస్స మూలం, తీణిపి అకుసలమూలాని అనువాదాధికరణస్స మూలం, తీణిపి కుసలమూలాని అనువాదాధికరణస్స మూలం, కాయోపి అనువాదాధికరణస్స మూలం, వాచాపి అనువాదాధికరణస్స మూలం, ఇదం ఖో భన్తే అనువాదాధికరణస్స మూలం.

పుచ్ఛా – కిం పనావుసో ఆపత్తాధికరణస్స మూలం.

విస్సజ్జనా – ఛ భన్తే ఆపత్తిసముట్ఠానా ఆపత్తాధికరణస్స మూలం, అత్తి భన్తే ఆపత్తి కాయతో సముట్ఠాతి న వాచతో న చిత్తతో, అత్థి భన్తే ఆపత్తి వాచతో సముట్ఠాతి న కాయతో న చిత్తతో, అత్థి భన్తే ఆపత్తి కాయతో చ వాచతో చ సముట్ఠాతి న చిత్తతో, అత్థి భన్తే ఆపత్తి కాయతో చ చిత్తతో చ సముట్ఠాతి న వాచతో, అత్థి భన్తే ఆపత్తి వాచతో చ చిత్తతో చ సముట్ఠాతి న కాయతో, అత్థి భన్తే ఆపత్తి కాయతో చ వాచతో చ చిత్తతో చ సముట్ఠాతి, ఇమాని భన్తే ఛ ఆపత్తి సముట్ఠానాని ఆపత్తాధికరణస్స మూలం.

పుచ్ఛా – కిం పనావుసో కిచ్చాధికరణస్స మూలం.

విస్సజ్జనా – కిచ్చాధికరణస్స భన్తే ఏకం మూలం సఙ్ఘో.

పుచ్ఛా – సమథం ఆవుసో పుచ్ఛిస్సం, సనిదానం సనిద్దేసం. సముక్కట్ఠపదానం ఆవుసో కతి ఆపత్తియో.

విస్సజ్జనా – సమథం భన్తే విస్సజ్జిస్సం, సనిదానం సనిద్దేసం. సముక్కట్ఠపదానం భన్తే ద్వే ఆపత్తియో.

౫. ఖుద్దకవత్థుక్ఖన్ధక

పుచ్ఛా – నహాయన్తేన ఆవుసో భిక్ఖునా రుక్ఖే వా థమ్భే వా కుట్టే వా కాయం ఉగ్ఘంసేన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – రాజగహే భన్తే ఛబ్బగ్గియే భిక్ఖూ ఆరబ్భ పఞ్ఞత్తం, ఛబ్బగ్గియా భన్తే భిక్ఖూ నహాయమానా రుక్ఖేపి థమ్భేపి కుట్టేపి కాయం ఉగ్ఘంసేసుం, తస్మిం భన్తే వత్థుస్మిం పఞ్ఞత్తం.

పుచ్ఛా – గన్ధబ్బహత్థకేన వా ఆవుసో కురువిన్దకసుత్తియా వా మల్లకేన వా నహాయన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – రాజగహే భన్తే ఛబ్బగ్గియేవ భిక్ఖూ ఆరబ్భ పఞ్ఞత్తం, ఛబ్బగ్గియా భన్తే భిక్ఖూ గన్ధబ్బహత్థకేనపి కురువిన్దకసుత్తియాపి మల్లకేనపి నహాయింసు, తస్మిం భన్తే వత్థుస్మిం పఞ్ఞత్తం.

పుచ్ఛా – పాణినా ఆవుసో పరికమ్మం కాతుం భగవతా కత్థ అనుఞ్ఞాతం, కం ఆరబ్భ కిస్మిం వత్థుస్మిం అనుఞ్ఞాతం.

విస్సజ్జనా – రాజగహే భన్తే సమ్బహులే భిక్ఖూ ఆరబ్భ అనుఞ్ఞాతం, సమ్బహులా భన్తే భిక్ఖూ పిట్ఠిపరికమ్మం కాతుం కుక్కుచ్చాయింసు, తస్మిం భన్తే వత్థుస్మిం అనుఞ్ఞాతం.

పుచ్ఛా – వల్లికం వా ఆవుసో పామఙ్గం వా కణ్ఠసుత్తకం వా కటిసుత్తకం వా ఓవట్టికం వా కాయురం వా హత్థాభరణం వా అఙ్గులిముద్దికం వా ధారేన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – రాజగహే భన్తే ఛబ్బగ్గియే భిక్ఖూ ఆరబ్భ పఞ్ఞత్తం, ఛబ్బగ్గియా భన్తే భిక్ఖూ వల్లికాదీని ధారేసుం, తస్మిం భన్తే వత్థుస్మిం పఞ్ఞత్తం.

పుచ్ఛా – దీఘే ఆవుసో కేసే ధారేన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – రాజగహే భన్తే ఛబ్బగ్గియే భిక్ఖూ ఆరబ్భ పఞ్ఞత్తం, ఛబ్బగ్గియా భన్తే భిక్ఖూ దీఘే కేసే ధారేసుం, తస్మిం భన్తే వత్థుస్మిం పఞ్ఞత్తం.

పుచ్ఛా – కోచ్ఛేనవా ఆవుసో ఫణకేనవా హత్థఫణకేనవా కేసే ఓసణ్ఠేన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – రాజగహే భన్తే ఛబ్బగ్గియేవ భిక్ఖూ ఆరబ్భ పఞ్ఞత్తం, ఛబ్బగ్గియా భన్తే భిక్ఖూ కోచ్ఛాదీహి కేసే ఓసణ్ఠేసుం, తస్మిం భన్తే వత్థుస్మిం పఞ్ఞత్తం.

పుచ్ఛా – ఆదాసే వా ఆవుసో ఉదకపత్తే వా ముఖనిమిత్తం ఓలోకేన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – రాజగహే భన్తే ఛబ్బగ్గియేవ భిక్ఖూ ఆరబ్భ పఞ్ఞత్తం, ఛబ్బగ్గియా భన్తే భిక్ఖూ ఆదాసేపి ఉదకపత్తేపి ముఖనిమిత్తం ఓలోకేసుం, తస్మిం భన్తే వత్థుస్మిం పఞ్ఞత్తం.

పుచ్ఛా – ఆబాధపచ్చయా పనావుసో ఆదాసే వా ఉదకపత్తే వా ముఖనిమిత్తం ఓలోకేతుం భగవతా కత్థ అనుఞ్ఞాతం, కం ఆరబ్భ కిస్మిం వత్థుస్మిం అనుఞ్ఞాతం.

విస్సజ్జనా – రాజగహే భన్తే అఞ్ఞతరం భిక్ఖుం ఆరబ్భ అనుఞ్ఞాతం, భగవతి భన్తే రాజగహే విహరతి అఞ్ఞతరస్స భిక్ఖునో ముఖే వణో అహోసి, సో భిక్ఖూ ఏతదవోచ ‘‘కీదిసో మే ఆవుసో వణో’’తి, భిక్ఖూ ఏవమాహంసు ‘‘ఏదిసో తే ఆవుసో వణో’’తి, సో న సద్దహతి, తస్మిం భన్తే వత్థుస్మిం అనుఞ్ఞాతం.

పుచ్ఛా – ముఖాలేపనాదీని ఆవుసో కరోన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – రాజగహే భన్తే ఛబ్బగ్గియే భిక్ఖూ ఆరబ్భ పఞ్ఞత్తం, ఛబ్బగ్గియా భన్తే భిక్ఖూ ముఖాలేపనాదీని అకంసు, తస్మిం భన్తే వత్థుస్మిం పఞ్ఞత్తం.

పుచ్ఛా – నచ్చం వా ఆవుసో గీతం వా వాదితం వా దస్సనాయ గచ్ఛన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – రాజగహే భన్తే ఛబ్బగ్గియే భిక్ఖూ ఆరబ్భ పఞ్ఞత్తం, ఛబ్బగ్గియా భన్తే నచ్చమ్పి గీతమ్పి వాదితమ్పి దస్సనాయ గచ్ఛింసు, తస్మిం భన్తే వత్థుస్మిం పఞ్ఞత్తం.

పుచ్ఛా – కథం ఆవుసో నచ్చాదీని పస్సన్తస్స ఆపత్తి హోతి, కథం పన అనాపత్తి.

విస్సజ్జనా – నచ్చం వా భన్తే గీతం వా వాదితం వా దస్సనాయ గచ్ఛతి ఆపత్తి దుక్కటస్స, యత్థ ఠితో పస్సతి వా సుణాతి వా ఆపత్తి దుక్కటస్స, దస్సనూపచారం విజహిత్వా పునప్పునం పస్సతి ఆపత్తి దుక్కటస్స, ఆరామే ఠితస్స పస్సతో అనాపత్తి, విహారతో పన విహారం పస్సిస్సామీతి గచ్ఛతో ఆపత్తియేవ, యత్థ ఠితో పస్సతి వా సుణాతి వా ఆపత్తి దుక్కటస్స, ఆసనసాలాయ నిసిన్నో పస్సతి అనాపత్తి, పస్సిస్సామీతి వుట్ఠహిత్వా గచ్ఛతి ఆపత్తి దుక్కటస్స, యత్థ ఠితో పస్సతి వా సుణాతి వా ఆపత్తి దుక్కటస్స, పతిపథం గచ్ఛన్తో పస్సతి అనాపత్తి, గీవం పరివత్తేత్వా పస్సతో పన ఆపత్తి భన్తే.

పుచ్ఛా – ఆయతకేన ఆవుసో గీతస్సరేన ధమ్మం గాయన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – రాజగహే భన్తే ఛబ్బగ్గియే భిక్ఖూ ఆరబ్భ పఞ్ఞత్తం, ఛబ్బగ్గియా భన్తే భిక్ఖూ ఆయతకేన గీతస్సరేన ధమ్మం గాయింసు, తస్మిం భన్తే వత్థుస్మిం పఞ్ఞత్తం.

పుచ్ఛా – దారుపత్తం ఆవుసో ధారేన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – రాజగహే భన్తే ఆయస్మన్తం పిణ్డోలభారద్వాజం ఆరబ్భ పఞ్ఞత్తం, ఆయస్మా భన్తే పిణ్డోలభారద్వాజో ఛవస్స దారుపత్తస్స కారణా గిహీనం ఉత్తరిమనుస్సధమ్మం ఇద్ధిపాటిహారియం దస్సేతి, తస్మిం భన్తే వత్థుస్మిం పఞ్ఞత్తం.

న చ భిక్ఖవే దారుపత్తో ధారేతబ్బో, యో ధారేయ్య ఆపత్తి దుక్కటస్స –

పుచ్ఛా – భగవతా ఆవుసో ఉచ్చావచే పత్తే పటిక్ఖిపిత్వా అయో పత్తో భూమిపత్తోతి ఇమేయేవ ద్వే పత్తా కత్థ అనుఞ్ఞాతా, కం ఆరబ్భ కిస్మిం వత్థుస్మిం అనుఞ్ఞాతా.

విస్సజ్జనా – రాజగహే భన్తే ఛబ్బగ్గియే భిక్ఖూ ఆరబ్భ అనుఞ్ఞాతా, ఛబ్బగ్గియా భన్తే భిక్ఖూ ఉచ్చావచే పత్తే ధారేసుం సోవణ్ణమయా రూపియమయా, తస్మిం భన్తే వత్థుస్మిం అనుఞ్ఞాతా.

పుచ్ఛా – సోదకం ఆవుసో పత్తం పటిసామేన్తస్స చ ఓతాపేన్తస్సచ ఉణ్హే పత్తం నిదహన్తస్స చ దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – రాజగహే భన్తే సమ్బహులే భిక్ఖూ ఆరబ్భ పఞ్ఞత్తం, సమ్బహులా భన్తే భిక్ఖూ సోదకం పత్తం పటిసామేసుం, ఓతాపేసుం, ఉణ్హే పత్తం నిదహింసు, తస్మిం భన్తే వత్థుస్మిం పఞ్ఞత్తం.

పుచ్ఛా – ఛవసీసపత్తం ఆవుసో ధారేన్తస్స చ సబ్బపంసుకూలికస్స చ దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – రాజగహే భన్తే అఞ్ఞతరం భిక్ఖుం ఆరబ్భ పఞ్ఞత్తం, అఞ్ఞతరో భన్తే భిక్ఖు సబ్బపంసుకూలికో అహోసి, సో ఛవసీసస్స పత్తం ధారేసి, అఞ్ఞతరా ఇత్థీ పస్సిత్వా భీతా విస్సరమకాసి ‘‘అభుం మే పిసాచో వతాయ’’న్తి, తస్మిం భన్తే వత్థుస్మిం పఞ్ఞత్తం.

పుచ్ఛా – చలకాని వా ఆవుసో అట్ఠికాని వా ఉచ్ఛిట్ఠోదకం వా పత్తేన నీహరన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – రాజగహే భన్తే సమ్బహులే భిక్ఖూ ఆరబ్భ పఞ్ఞత్తం, సమ్బహులా భన్తే భిక్ఖూ చలకానిపి అట్ఠికానిపి ఉచ్ఛిట్ఠో దకమ్పి పత్తేన నీహరింసు, తస్మిం భన్తే వత్థుస్మిం పఞ్ఞత్తం.

పుచ్ఛా – ఉపాహనత్థవికా ఆవుసో భగవతా కత్థ అనుఞ్ఞాతా, కం ఆరబ్భ కిస్మిం వత్థుస్మిం అనుఞ్ఞాతా.

విస్సజ్జనా – అన్తరా చ భన్తే రాజగహం అన్తరా చ వేసాలిం అఞ్ఞతరం భిక్ఖుం ఆరబ్భ అనుఞ్ఞాతా, అఞ్ఞతరో భన్తే భిక్ఖు ఉపాహనాయో కాయబన్ధనేన బన్ధిత్వా గామం పిణ్డాయ పావిసి, అఞ్ఞతరో ఉపాసకో తం భిక్ఖుం అభివాదేన్తో ఉపాహనాయో సీసేన ఘట్టేతి, సో భిక్ఖు మఙ్కు అహోసి, తస్మిం భన్తే వత్థుస్మిం అనుఞ్ఞాతా.

పుచ్ఛా – అద్ధానమగ్గప్పటిపన్నేన ఆవుసో పరిస్సావనం యాచియమానేన న దదన్తస్స చ అప్పటిస్సావనకేన అద్ధానం పటిపజ్జన్తస్స చ దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – అన్తరా చ భన్తే రాజగహం అన్తరా చ వేసాలిం అఞ్ఞతరం భిక్ఖుం ఆరబ్భ పఞ్ఞత్తం, అఞ్ఞతరో భన్తే భిక్ఖు పరిస్సావనం యాచియమానో న అదాసి, తస్మిం భన్తే వత్థుస్మిం పఞ్ఞత్తం.

పుచ్ఛా – పుప్ఫాభికిణ్ణే ఆవుసో సయనే సయన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – వేసాలియం భన్తే ఛబ్బగ్గియే భిక్ఖూ ఆరబ్భ పఞ్ఞత్తం, ఛబ్బగ్గియా భన్తే భిక్ఖూ పుప్ఫాభికిణ్ణేసు సయనేసు సయింసు, తస్మిం భన్తే వత్థుస్మిం పఞ్ఞత్తం.

పుచ్ఛా – ఏకభాజనే వా ఆవుసో భుఞ్జన్తానం ఏకథాలకే వా పివన్తానం ఏకత్థరణపావురణానం వా తువట్టానం దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – వేసాలియం భన్తే ఛబ్బగ్గియేవ భిక్ఖూ ఆరబ్భ పఞ్ఞత్తం, ఛబ్బగ్గియా భన్తే భిక్ఖూ ఏకభాజనేపి భుఞ్జింసు, ఏకథాలకేపి పివింసు, ఏకమఞ్చకేపి తువట్టేసుం, ఏకత్థరణాపి తువట్టేసుం, ఏకపావురణాపి తువట్టేసుం, ఏకత్థరణపావురణాపి, తస్మిం భన్తే వత్థుస్మిం పఞ్ఞత్తం.

పుచ్ఛా – చామరిబీజనిం ఆవుసో పటిక్ఖిపిత్వా తిస్సో బీజనియో భగవతా కత్థ అనుఞ్ఞాతా, కిస్మిఞ్చ వత్థుస్మిం అనుఞ్ఞాతా.

విస్సజ్జనా – సావత్థియం భన్తే అనుఞ్ఞాతా, సావత్థియం భన్తే భగవతి విహరతి సఙ్ఘస్స చామరిబీజనీ ఉప్పన్నా అహోసి, భగవతో ఏతమత్థం ఆరోచేసుం, తస్మిం భన్తే వత్థుస్మిం అనుఞ్ఞాతా.

న భిక్ఖవే చామరిబీజనీ ధారేతబ్బా, యో ధారేయ్య, ఆపత్తి దుక్కటస్స. అనుజానామి భిక్ఖవే తిస్సో బీజనియో వాకమయం ఉసీరమయం మోరపిఞ్ఛా మయం.

పుచ్ఛా – దీఘే ఆవుసో నఖే ధారేన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – సావత్థియం భన్తే అఞ్ఞతరం భిక్ఖుం ఆరబ్భ పఞ్ఞత్తం, అఞ్ఞతరో భన్తే భిక్ఖు దీఘే నఖే ధారేసి, తస్మిం భన్తే వత్థుస్మిం పఞ్ఞత్తం.

పుచ్ఛా – కత్తరికాయ ఆవుసో కేసే ఛేదాపేన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – సావత్థియం భన్తే ఛబ్బగ్గియే భిక్ఖూ ఆరబ్భ పఞ్ఞత్తం, ఛబ్బగ్గియా భన్తే భిక్ఖూ కత్తరికాయ కేసే ఛిన్దింసు, తస్మిం భన్తే వత్థుస్మిం పఞ్ఞత్తం.

పుచ్ఛా – దీఘే ఆవుసో నాసికాలోమే ధారేన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – సావత్థియం భన్తే సమ్బహులే భిక్ఖూ ఆరబ్భ పఞ్ఞత్తం, సమ్బహులా భన్తే భిక్ఖూ దీఘాని నాసికాలోమాని ధారేసుం, తస్మిం భన్తే వత్థుస్మిం పఞ్ఞత్తం.

పుచ్ఛా – ఉచ్చావచా ఆవుసో కణ్ణమలహరణియో పటిక్ఖిపిత్వా దస కణ్ణమలహరణియో భగవతా కత్థ అనుఞ్ఞాతా, కం ఆరబ్భ కిస్మిం వత్థుస్మిం అనుఞ్ఞాతా.

విస్సజ్జనా – సావత్థియం భన్తే ఛబ్బగ్గియే భిక్ఖూ ఆరబ్భ అనుఞ్ఞాతా, ఛబ్బగ్గియా భన్తే భిక్ఖూ ఉచ్చావచా కణ్ణమలహరణియో ధారేసుం సోవణ్ణమయం రూపియమయం, తస్మిం భన్తే వత్థుస్మిం అనుఞ్ఞాతా.

పుచ్ఛా – సఙ్ఘాటిపల్లత్థికాయ నిసీదన్తస్స ఆవుసో దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – సావత్థియం భన్తే ఛబ్బగ్గియే భిక్ఖూ ఆరబ్భ పఞ్ఞత్తం, ఛబ్బగ్గియా భన్తే భిక్ఖూ సఙ్ఘాటిపల్లత్థికాయ నిసీదింసు, సఙ్ఘాటియా పత్తా లుజ్జింసు, తస్మిం భన్తే వత్థుస్మిం పఞ్ఞత్తం.

పుచ్ఛా – అకాయబన్ధనేన ఆవుసో గామం పవిసన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – సావత్థియం భన్తే అఞ్ఞతరం భిక్ఖుం ఆరబ్భ పఞ్ఞత్తం, అఞ్ఞతరో భన్తే భిక్ఖు అకాయబన్ధనో గామం పిణ్డాయ పావిసి, తస్మిం భన్తే వత్థుస్మిం పఞ్ఞత్తం.

పుచ్ఛా – గిహినివత్థం ఆవుసో నివాసేన్తస్స చ, గిహిపారుతం పారుపన్తస్స చ, సంవేల్లియం నివాసేన్తస్స చ దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – సావత్థియం భన్తే ఛబ్బగ్గియే భిక్ఖూ ఆరబ్భ పఞ్ఞత్తం, ఛబ్బగ్గియా భన్తే భిక్ఖూ గిహినివత్థం నివాసింసు, గిహిపారుతమ్పి పారుపింసు, సంవేల్లియమ్పి నివాసింసు, తస్మిం భన్తే వత్థుస్మిం పఞ్ఞత్తం.

పుచ్ఛా – ఉభతో కాజం ఆవుసో ధారేన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – సావత్థియం భన్తే ఛబ్బగ్గియే భిక్ఖూ ఆరబ్భ పఞ్ఞత్తం, ఛబ్బగ్గియా భన్తే భిక్ఖూ ఉభతో కాజం ధారేసుం, తస్మిం భన్తే వత్థుస్మిం పఞ్ఞత్తం.

పుచ్ఛా – లోకాయతం ఆవుసో పరియాపుణన్తస్స చ వాచేన్తస్స చ దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.