నమో తస్స భగవతో అరహతో సమ్మాసమ్బుద్ధస్స
వినయపిటక
సంగాయనస్స పుచ్ఛా విస్సజ్జనా
ఓకాస దానకథా
సుణాతు మే భన్తే సఙ్ఘో, మహతీ అయం పరిసా, ఏవరూపాయ పరిసాయ న సుకరా సబ్బసో కథం సావేతుం, తస్మా ఆయస్మతో చ జవనత్థేరస్స పఖుక్కూనగరవాసినో ఆయస్మతో చ విచిత్తసారాభివంసస్స తిపిటకధర ధమ్మభణ్డాగారికస్స వినయపుచ్ఛనభారఞ్చ వినయవిస్సజ్జన భారఞ్చ ఆవహితుం ఓకాసం దమ్మి, కరోథ తుమ్హే ఆవుసో ఛట్ఠసంగీతిపుబ్బఙ్గమాని వినయపుచ్ఛన వినయవిస్సజ్జన కిచ్చాని యథాధమ్మం యథావినయం.
అగ్గమహాపణ్డిత భదన్తజవన మహాథేరేన
ఠపితా
పుచ్ఛక సమ్ముతి ఞాత్తి
సుణాతు మే భన్తే సఙ్ఘో, యది సఙ్ఘస్స పత్తకల్లం, అహం ఆయస్మన్తం విచిత్తసారాభివంసం తిపిటకధర ధమ్మభణ్డాగారికం వినయం పుచ్ఛేయ్యం.
తిపిటకధర ధమ్మభణ్డాగారిక
భదన్తవిచిత్తసారాభివంసేన
ఠపితా విస్సజ్జక సమ్ముతి ఞాత్తి
సుణాతు మే భన్తే సఙ్ఘో, యది సఙ్ఘస్స పత్తకల్లం, అహం ఆయస్మతా జవనత్థేరేన సఙ్ఘనాయక మహాథేరస్స పటినిధిభూతేన వినయం పుట్ఠో విస్సజ్జేయ్యం.
పఠమ పారాజిక సిక్ఖాపుచ్ఛా
పుచ్ఛా – యం తేన ఆవుసో భగవతా జానతా పస్సతా అరహతా సమ్మాసమ్బుద్ధేన పఠమం పారాజికం కత్థ పఞ్ఞత్తం.
విస్సజ్జనా – వేసాలియం భన్తే పఞ్ఞత్తం.
పుచ్ఛా – కం ఆవుసో ఆరబ్భ పఞ్ఞత్తం.
విస్సజ్జనా – సుదిన్నం భన్తే కలన్దపుత్తం ఆరబ్భ పఞ్ఞత్తం.
పుచ్ఛా – కిస్మిం ఆవుసో వత్థుస్మిం పఞ్ఞత్తం.
విస్సజ్జనా – సుదిన్దో భన్తే కలన్దపుత్తో పురాణదుతియికాయ మేథునం ధమ్మం పటిసేవి, తస్మిం భన్తే వత్థుస్మిం పఞ్ఞత్తం.
పుచ్ఛా – అత్థి ఆవుసో తత్థ పఞ్ఞత్తి అనుపఞ్ఞత్తి అనుప్పన్నపఞ్ఞత్తి.
విస్సజ్జనా – ఏకా భన్తే పఞ్ఞత్తి ద్వే అనుపఞ్ఞత్తియో, అనుప్పన్నపఞ్ఞత్తి తస్మిం నత్థి.
పుచ్ఛా – సబ్బత్థపఞ్ఞత్తినుఖో ఆవుసో పదేసపఞ్ఞత్తినుఖో.
విస్సజ్జనా – సబ్బత్థపఞ్ఞత్తి భన్తే.
పుచ్ఛా – సాధారణపఞ్ఞత్తినుఖో ఆవుసో అసాధారణపఞ్ఞత్తినుఖో.
విస్సజ్జనా – సాధారణపఞ్ఞత్తి భన్తే.
పుచ్ఛా – ఏకతోపఞ్ఞత్తినుఖో ఆవుసో ఉభతోపఞ్ఞత్తినుఖో.
విస్సజ్జనా – ఉభతోపఞ్ఞత్తి భన్తే.
పుచ్ఛా – పఞ్చన్నం ఆవుసో పాతిమోక్ఖుద్దేసానం కత్థోగధం కత్థ పరియాపన్నం.
విస్సజ్జనా – నిదానోగధం భన్తే నిదానపరియాపన్నం.
పుచ్ఛా – కతమేన ఆవుసో ఉద్దేసేన ఉద్దేసం ఆగచ్ఛతి.
విస్సజ్జనా – దుతియేన భన్తే ఉద్దేసేన ఉద్దేసం ఆగచ్ఛతి.
పుచ్ఛా – చతున్నం ఆవుసో విపత్తీనం కతమా విపత్తి.
విస్సజ్జనా – సీలవిపత్తి భన్తే.
పుచ్ఛా – కా ఆవుసో విపత్తి.
విస్సజ్జనా – అసంవరో భన్తే విపత్తి.
పుచ్ఛా – కా ఆవుసో సమ్పత్తి.
విస్సజ్జనా – సంవరో భన్తే సమ్మత్తి.
పుచ్ఛా – కా ఆవుసో పటిపత్తి.
విస్సజ్జనా – న ఏవరూపం కరిస్సామీతి యావజీవం ఆపాణకోటికం సమాదాయ సిక్ఖతి సిక్ఖాపదేసు, అయం భన్తే పటిపత్తి.
పుచ్ఛా – కతి ఆవుసో అత్థవసే పటిచ్చ భగవతా పఠమం పారాజికం పఞ్ఞత్తం.
విస్సజ్జనా – దస భన్తే అత్థవసే పటిచ్చ భగవతా పఠమం పారాజికం పఞ్ఞత్తం, ౧ - సఙ్ఘసుట్ఠుతాయ, ౨ - సఙ్ఘఫాసుతాయ, ౩ - దుమ్మఙ్కూనం పుగ్గలానం నిగ్గహాయ, ౪ - పేసలానం భిక్ఖూనం ఫాసువిహారాయ, ౫ - దిట్ఠధమ్మికానం ఆసవానం సంవరాయ, ౬ - సమ్పరాయికానం ఆసవానం పటిఘాతాయ, ౭ - అప్పసన్నానం పసాదాయ, ౮ - పసన్నానం భియ్యోభావాయ, ౯ - సద్ధమ్మట్ఠితియా, ౧౦ - వినయానుగ్గహాయ.
పుచ్ఛా – కే ఆవుసో సిక్ఖన్తి.
విస్సజ్జనా – సేక్ఖాచ భన్తే పుథుజ్జనకల్యాణకాచ సిక్ఖన్తి.
పుచ్ఛా – కే ఆవుసో సిక్ఖితసిక్ఖా.
విస్సజ్జనా – అరహన్తో భన్తే సిక్ఖితసిక్ఖా.
పుచ్ఛా – కత్థ ఆవుసో ఠితం.
విస్సజ్జనా – సిక్ఖాకామేసు భన్తే ఠితం.
పుచ్ఛా – కే ఆవుసో ధారేన్తి.
విస్సజ్జనా – యేసం భన్తే వత్తతి తే ధారేన్తి.
పుచ్ఛా – కస్స ఆవుసో వచనం.
విస్సజ్జనా – భగవతో భన్తే వచనం అరహతో సమ్మాసమ్బుద్ధస్స.
పుచ్ఛా – కేనావుసో ఆభతం.
విస్సజ్జనా – పరమ్పరాయ భన్తే ఆభతం.
సంగాయనత్థాయ సఙ్ఘస్స ఞాపనం
సుణాతు మే భన్తే సఙ్ఘో అహం భన్తే ఆయస్మన్తం విచిత్థసారాభివంసం తిపిటకధర ధమ్మభణ్డాగారికం పఠమస్స పారాజికస్స నిదానమ్పి పుచ్ఛిం, పుగ్గలమ్పి పుచ్ఛిం, వత్థుమ్పి పుచ్ఛిం, పఞ్ఞత్తి అనుపఞ్ఞత్తిఆదీనిపి పుచ్ఛిం, పుట్ఠో పుట్ఠోచ సో ఆయస్మావిచిత్తసారాభివంసో విస్సజ్జేసి, ఇతిహిదం భన్తే పఠమం పారాజిక సిక్ఖాపదం నిమ్మలం సుపరిసుద్ధం తస్సేవ భగవతో వచనం అరహతో సమ్మాసమ్బుద్ధస్స, తస్మా యథాపురే మహాకస్సపాదయో మహాథేరవరా పోరాణసంగీతికారా బ్రహ్మచరియ సఙ్ఖాతస్స బుద్ధసాసనస్స చిరట్ఠితియా బహుజనహితాయ బహుజనసుఖాయ లోకానుకమ్పాయ అత్థాయ హితాయ సుఖాయ దేవమనుస్సానం ధమ్మవినయం సఙ్గాయింసుచేవ అనుసఙ్గాయింసుచ, ఏవమేవ మయమ్పి దాని సబ్బేవ ఛట్ఠసంగీతిమహాధమ్మసభాపరియాపన్నా ఇదం పఠమ పారాజిక సిక్ఖాపదం ఏకతోసజ్ఝాయనవసేన సంగాయేయ్యామ.
రేవతాభి పణ్డితధజ సాసనవంస మహాధమ్మరాజగురునో
అభిధజమహారట్ఠగురునోచ సఙ్ఘనాయక మహాథేరస్స
ఓకాస దానకథా
సుణాతు మే భన్తే సఙ్ఘో, మహతీ అయం పరిసా, ఏవరూపాయ పరిసాయ న సుకరా సబ్బసో కథం సావేతుం, తస్మా ఆయస్మతోచ సోభనస్స సాసనరి సారామాధివాసినో ఆయస్మతోచ విచిత్తసారాభివంసస్స తిపిటకధర ధమ్మభణ్డాగారికస్స వినయపుచ్ఛనభారఞ్చ వినయవిస్సజ్జనభారఞ్చ ఆవహితుం ఓకాసం దమ్మి, కరోథ తుమ్హే ఆవుసో ఛట్ఠసంగీతిపుబ్బఙ్గమాని వినయపుచ్ఛన వినయవిస్సజ్జన కిచ్చాని యథాధమ్మం యథావినయం.
అగ్గమహాపణ్డిత భదన్త సోభనత్థేరేన
ఠపితా పుచ్ఛక సమ్ముతి ఞాత్తి
సుణాతు మే భన్తే సఙ్ఘో, యది సఙ్ఘస్స పత్తకల్లం, అహం ఆయస్మన్తం విచిత్తసారాభివంసం తిపిటకధర ధమ్మభణ్డాగారికం వినయం పుచ్ఛేయ్యం.
తిపిటకధర ధమ్మభణ్డాగారిక
భదన్తవిచిత్తసారాభివంసేన
ఠపితా విస్సజ్జక సమ్ముతి ఞాత్తి
సుణాతు మే భన్తే సఙ్ఘో, యదిసఙ్ఘస్స పత్తకల్లం, అహం ఆయస్మతా సోభనత్థేరేన సఙ్ఘనాయక మహాథేరస్స పటినిధిభూతేన వినయం పుట్ఠో విస్సజ్జేయ్యం.
దుతియ పారాజిక సిక్ఖాపుచ్ఛా
పుచ్ఛా – యం తేన ఆవుసో భగవతా జానతా పస్సతా అరహతా సమ్మాసమ్బుద్ధేన దుతియం పారాజికం కత్థ పఞ్ఞత్తం.
విస్సజ్జనా – రాజగహే భన్తే పఞ్ఞత్తం.
పుచ్ఛా – కం ఆవుసో ఆరబ్భ పఞ్ఞత్తం.
విస్సజ్జనా – ధనియం భన్తే కుమ్భకారపుత్తం ఆరబ్భ పఞ్ఞత్తం.
పుచ్ఛా – కిస్మిం ఆవుసో వత్థుస్మిం పఞ్ఞత్తం.
విస్సజ్జనా – ధనియో భన్తే కుమ్భకారపుత్తో రఞ్ఞో దారూని అదిన్నం ఆదియి, తస్మిం వత్థుస్మిం పఞ్ఞత్తం.
పుచ్ఛా – అత్థి ఆవుసో తత్థ పఞ్ఞత్తి అనుపఞ్ఞత్తి అనుప్పన్నపఞ్ఞత్తి.
విస్సజ్జనా – ఏకా భన్తే పఞ్ఞత్తి ఏకా అనుపఞ్ఞత్తి అనుప్పన్నపఞ్ఞత్తి తస్మిం నత్థి.
పుచ్ఛా – కా ఆవుసో తత్థ మూలపఞ్ఞత్తి.
విస్సజ్జనా – యో పన భిక్ఖు అదిన్నం థేయ్యసఙ్ఖాతం ఆదియేయ్య, యథారూపే అదిన్నాదానే రాజానో చోరం గహేత్వా హనేయ్యుంవా బన్ధేయ్యుంవా పబ్బాజేయ్యుంవా చోరోసి బాలోసి ముళ్హోసి థేనోసీతి తథారూపం భిక్ఖు అదిన్నం ఆదియమానో అయమ్పి పారాజికో హోతి అసంవాసోతి అయం భన్తే తత్థ మూలపఞ్ఞత్తి.
పుచ్ఛా – కా ఆవుసో తత్థ అనుపఞ్ఞత్తి.
విస్సజ్జనా – గామావా అరఞ్ఞావాతి అయం భన్తే తత్థ అనుపఞ్ఞత్తి.
పుచ్ఛా – కా ఆవుసో తత్థ పరిపుణ్ణపఞ్ఞత్తి.
విస్సజ్జనా – యో పన భిక్ఖు గామావా అరఞ్ఞావా అదిన్నం థేయ్యసఙ్ఖాతం ఆదియేయ్య, కథారూపే అదిన్నాదానే రాజానో చోరం గహేత్వా హనేయ్యుంవా బన్ధేయ్యుంవా పబ్బాజేయ్యుంవా చోరోసి బాలోసి మూళ్హోసి థేనోసీతి తథారూపం భిక్ఖు అదిన్నం ఆదియమానో అయమ్పి పారాజికో హోతి అసంవాసోతి అయం భన్తే తత్థ పరిపుణ్ణపఞ్ఞత్తి.
పుచ్ఛా – సబ్బత్థపఞ్ఞత్తి నుఖో ఆవుసో పదేసపఞ్ఞత్తినుఖో.
విస్సజ్జనా – సబ్బత్థపఞ్ఞత్తి భన్తే.
పుచ్ఛా – సాధారణపఞ్ఞత్తినుఖో ఆవుసో అసాధారణపఞ్ఞత్తి నుఖో.
విస్సజ్జనా – సాధారణపఞ్ఞత్తి భన్తే.
పుచ్ఛా – ఏకతోపఞ్ఞత్తినుఖో ఆవుసో ఉభతోపఞ్ఞత్తినుఖో.
విస్సజ్జనా – ఉభతోపఞ్ఞత్తి భన్తే.
పుచ్ఛా – తస్మిం ఆవుసో దుతియ పారాజికే అదిన్నం ఆదియన్తో కతి ఆపత్తియో ఆపజ్జతి విభజిత్వా విస్సజ్జేహి.
విస్సజ్జనా – అదిన్నం భన్తే ఆదియన్తో తిస్సో ఆపత్తియో ఆపజ్జతి, పఞ్చ మాసకంవా అతిరేక పఞ్చ మాసకంవా అగ్ఘనకం అదిన్నం థేయ్యసఙ్ఖాతం ఆదియతి ఆపత్తి పారాజికస్స, ఊనపఞ్చమాసకంవా అతిరేకమాసకంవా అదిన్నం థేయ్యసఙ్ఖాతం ఆదియతి ఆపత్తి థుల్లచ్చయస్స, మాసకంవా ఊనమాసకవా అగ్ఘనకం అదిన్నం థేయ్యసఙ్ఖాతం ఆదియతి ఆపత్తి దుక్కటస్స, అదిన్నం భన్తే ఆదియన్తో ఇమా తిస్సో ఆపత్తియో ఆపజ్జతి.
పుచ్ఛా – కేసం ఆవుసో అనాపత్తి.
విస్సజ్జనా – దసన్నం భన్తే పుగ్గలానం అనాపత్తి, సకసఞ్ఞిస్స, విస్సాసగ్గాహేన గణ్హన్తస్స, తావకాలికం గణ్హన్తస్స, పేతపరిగ్గహం గణ్హన్తస్స, తిరచ్ఛానగతపరిగ్గహం గణ్హన్తస్స, పంసుకూలసఞ్ఞిస్స, ఉమ్మత్తకస్స, ఖిత్తచిత్తస్స, వేదనాట్టస్స, ఆదికమ్మికస్సాతి.
పుచ్ఛా – పఞ్చన్నం ఆవుసో పాతిమోక్ఖుద్దేసానం కత్థోగధం కత్థపరియాపన్నం.
విస్సజ్జనా – నిదానోగధం భన్తే నిదానపరియాపన్నం.
పుచ్ఛా – కతమేన ఆవుసో ఉద్దేసేన ఉద్దేసం ఆగచ్ఛతి.
విస్సజ్జనా – దుతియేన భన్తే ఉద్దేసేన ఉద్దేసం ఆగచ్ఛతి.
పుచ్ఛా – చతున్నం ఆవుసో విపత్తీనం కతమా విపత్తి.
విస్సజ్జనా – సీలవిపత్తి భన్తే.
పుచ్ఛా – సత్తన్నం ఆవుసో ఆపత్తిక్ఖన్ధానం కతమో ఆపత్తిక్ఖన్ధో.
విస్సజ్జనా – పారాజికాపత్తిక్ఖన్ధో భన్తే.
పుచ్ఛా – ఛన్నం ఆవుసో ఆపత్తిసముట్ఠానానం కతిహి సముట్ఠానేహి సముట్ఠాతి.
విస్సజ్జనా – తీహి భన్తే సముట్ఠానేహి సముట్ఠాతి, సియా కాయతోచ చిత్తతోచ సముట్ఠాతి, న వాచాతో, సియా వాచాతోచ
చిత్తతోచ సముట్ఠాతి, న కాయతో, సియా కాయతోచ వాచాతోచ చిత్తతోచ సముట్ఠాతి.
పుచ్ఛా – చతున్నం ఆవుసో అధికరణానం కతమం అధికరణం.
విస్సజ్జనా – ఆపత్తాధికరణం భన్తే.
పుచ్ఛా – సత్తన్నం ఆవుసో సమథానం కతిహి సమథేహి సమ్మతి.
విస్సజ్జనా – ద్విహి భన్తే సమథేహి సమ్మతి సమ్ముఖావినయేనచ పటిఞ్ఞాత కరణేనచ.
పుచ్ఛా – కో ఆవుసో తత్థ వినయో, కో తత్థ అభివినయో.
విస్సజ్జనా – పఞ్ఞత్తి భన్తే వినయో విభత్తి అభివినయో.
పుచ్ఛా – కింఆవుసో తత్థ పాతిమోక్ఖం కిం తత్థ అధిపాతిమోక్ఖం.
విస్సజ్జనా – పఞ్ఞత్తి భన్తే పాతిమోక్ఖం, విభత్తి అధిపాతిమోక్ఖం.
పుచ్ఛా – కా ఆవుసో విపత్తి.
విస్సజ్జనా – అసంవరో భన్తే విపత్తి.
పుచ్ఛా – కా ఆవుసో సమ్పత్తి.
విస్సజ్జనా – సంవరో భన్తే సమ్పత్తి.
పుచ్ఛా – కా ఆవుసో పటిపత్తి.
విస్సజ్జనా – న ఏవరూపం కరిస్సామీతి యావజీవం ఆపాణకోటికం సమాదాయ సిక్ఖతి సిక్ఖాపదేసు అయం భన్తే తత్థ పటిపత్తి.
పుచ్ఛా – కతి ఆవుసో అత్థవసే పటిచ్చ భగవతా దుతియం పారాజికం పఞ్ఞత్తం.
విస్సజ్జనా – దస భన్తే అత్థవసే పటిచ్చ భగవతా దుతియం పారాజికం పఞ్ఞత్తం. సఙ్ఘసుట్ఠుతాయ సఙ్ఘఫాసుతాయ దుమ్మఙ్కూనం పుగ్గలానం నిగ్గహాయ పేసలానం భిక్ఖూనం ఫాసువిహారాయ దిట్ఠధమ్మికానం ఆసవానం సంవరాయ సమ్పరాయికానం ఆసవానం పటిఘాతాయ అప్పసన్నానం పసాదాయ పసన్నానం భియ్యోభావాయ సద్ధమ్మట్ఠితియా వినయానుగ్గహాయ.
పుచ్ఛా – కో ఆవుసో సిక్ఖన్తి.
విస్సజ్జనా – సేక్ఖాచ భన్తే పుథుజ్జనకల్యాణకాచ సిక్ఖన్తి.
పుచ్ఛా – కే ఆవుసో సిక్ఖితసిక్ఖా.
విస్సజ్జనా – అరహన్తో భన్తే సిక్ఖితసిక్ఖా.
పుచ్ఛా – కత్థ ఆవుసో ఠితం.
విస్సజ్జనా – సిక్ఖాకామేసు భన్తే ఠితం.
పుచ్ఛా – కే ఆవుసో ధారేన్తి.
విస్సజ్జనా – యేసం భన్తే వత్తతి తే ధారేన్తి.
పుచ్ఛా – కస్స ఆవుసో వచనం.
విస్సజ్జనా – భగవతా భన్తే వచనం అరహతో సమ్మాసమ్ముద్ధస్స.
పుచ్ఛా – కేనావుసో ఆభతం.
విస్సజ్జనా – పరమ్పరాయ భన్తే ఆభతం.
పుచ్ఛా – అత్థి ను ఖో ఆవుసో తత్థ ఉపనేతబ్బం వా అపనేతబ్బం వా అక్ఖరపదపచ్చాభట్ఠం వా విరద్ధపదబ్యఞ్జనం వా.
విస్సజ్జనా – నత్థి భన్తే.
‘‘సంగాయనత్థాయ సఙ్ఘస్స ఞాపనం’’
సుణాతు మే భన్తే సఙ్ఘో అహం భన్తే ఆయస్మన్తం విచిత్తసారాభివంస తిపిటకధరధమ్మభణ్డాగారికం దుతియస్స పారాజికస్స నిదానమ్పి పుచ్ఛిం, పుగ్గలమ్పి పుచ్ఛిం, వత్థుమ్పి పుచ్ఛిం, పఞ్ఞత్తిమ్పి పుచ్ఛిం, అనుపఞ్ఞత్తిమ్పి పుచ్ఛిం, ఆపత్తిమ్పి పుచ్ఛిం, అనాపత్తిమ్పి పుచ్ఛిం, అఞ్ఞానిపి ఈదిసాని పుచ్ఛితబ్బట్ఠానాని అనేకాని పుచ్ఛిం, పుట్ఠో పుట్ఠోచ సో ఆయస్మా విచిత్తసారాభివంసో విస్సజ్జేసి. ఇతి హిదం భన్తే ఇదం దుతియం పారాజిక సిక్ఖాపదం నిమ్మలం, సుపరిసుద్ధం, తస్సేవ భగవతో వచనం అరహతో సమ్మాసమ్బుద్ధస్స, తస్మా యథా పురే మహాకస్స పాదయో మహాథేరవరా పోరాణసంగీతికారా బ్రహ్మచరియసఙ్ఖాతస్స బుద్ధసాసనస్స చిరట్ఠితియా, బహుజనహితాయ, బహుజనసుఖాయ లోకానుకమ్పాయ అత్థాయ, హితాయ, సుఖాయ, దేవమనుస్సానం ధమ్మవినయం సఙ్గాయింసుచేవ అనుసఙ్గాయింసుచ, ఏవమేవ మయమ్పి దాని సబ్బేవ ఛట్ఠసంగీతిమహాధమ్మసభాపరియాపన్నా ఇదం దుతియ పారాజిక సిక్ఖాపదం ఏకతో గణసజ్ఝాయం కత్వా సమగ్గా సమ్మోదమానా హుత్వా సఙ్గాయేయ్యామ.
తతియ పారాజిక సిక్ఖాపుచ్ఛా
పుచ్ఛా – యం తేన ఆవుసో భగవతా (ప) సమ్మాసమ్బుద్ధేన తతియం పారాజికం కత్థ పఞ్ఞత్తం.
విస్సజ్జనా – వేసాలియం భన్తే పఞ్ఞత్తం.
పుచ్ఛా – కం ఆవుసో ఆరబ్భ పఞ్ఞత్తం.
విస్సజ్జనా – సమ్బహులే భన్తే భిక్ఖూ ఆరబ్భ పఞ్ఞత్తం.
పుచ్ఛా – కిస్మిం ఆవుసో వత్థుస్మిం పఞ్ఞత్తం.
విస్సజ్జనా – సమ్బహులా భన్తే భిక్ఖు అఞ్ఞమఞ్ఞం జీవితా వోరోపేసుం, తస్మిం భన్తే వత్థుస్మిం పఞ్ఞత్తం.
పుచ్ఛా – అత్థి నుఖో ఆవుసో తత్థ పఞ్ఞత్తి అనుపఞ్ఞత్తి అనుప్పన్నపఞ్ఞత్తి.
విస్సజ్జనా – ఏకా భన్తే పఞ్ఞత్తి, ఏకా అనుపఞ్ఞత్తి, అనుప్పన్నపఞ్ఞత్తి తస్మిం నత్థి.
పుచ్ఛా – కా ఆవుసో తత్థ మూలపఞ్ఞత్తి.
విస్సజ్జనా – యోపన భిక్ఖు సఞ్చిచ్చ మనుస్సవిగ్గహం జీవితా వోరోపేయ్య, సత్థహారకంవాస్స పరియేసేయ్య అయమ్పి పారాజికో హోతి అసంవాసోతి అయం భన్తే తత్థ మూలపఞ్ఞత్తి.
పుచ్ఛా – కా ఆవుసో తత్థ అనుపఞ్ఞత్తి.
విస్సజ్జనా – మరణవణ్ణం వా సంవణ్ణేయ్య మరణాయ వా సమాదపేయ్య అమ్భోపురిస కిం తుయ్హిమినా పాపకేన దుజ్జీవితేన మతన్తే జీవితా
సేయ్యాతి ఇతి చిత్తమనో చిత్తసఙ్కప్పో అనేకపరియాయేన మరణవణ్ణం వా సంవణ్ణేయ్య మరణాయ వా సమాదపేయ్యాతి అయం భన్తే తత్థ అనుపఞ్ఞత్తి.
పుచ్ఛా – కా ఆవుసో తత్థ పరిపుణ్ణపఞ్ఞత్తి.