౮. వత్తక్ఖన్ధక

పుచ్ఛా – ఆగన్తుకానం ఆవుసో భిక్ఖూనం వత్తం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – సావత్థియం భన్తే సమ్బహులే ఆగన్తుకే భిక్ఖూ ఆరబ్భ పఞ్ఞత్తం, ఆగన్తుకా భన్తే భిక్ఖూ సఉపాహనాపి ఆరామం పవిసింసు, ఛత్తపగ్గహితాపి ఆరామం పవిసింసు, ఓగుణ్ఠితాపి ఆరామం పవిసింసు, సీసేపి చీవరం కరిత్వా ఆరామం పవిసింసు, పానీయేనపి పాదే దోవింసు, వుడ్ఢతరేపి ఆవాసికే భిక్ఖూ నాభివాదేసుం, నపి సేనాసనం పుచ్ఛింసు, తస్మిం భన్తే వత్థుస్మిం ‘‘తేన హి భిక్ఖవే ఆగన్తుకానం భిక్ఖూనం వత్తం పఞ్ఞపేస్సామి, యథా ఆగన్తుకేహి భిక్ఖూహి సమ్మా వత్తితబ్బం, ఆగన్తుకేన భిక్ఖవే భిక్ఖునా ఇదాని ఆరామం పవిసిస్సామీతి ఉపాహనా ఓముఞ్చిత్వా నీచం కత్వా పప్ఫోటేత్వా గహేత్వా ఛత్తం అపనామేత్వా సీసం వివరిత్వా సీసే చీవరం ఖన్ధే కత్వా సాధుకం అతరమానేన ఆరామో పవిసితబ్బో’’ ఏవమాదినా భన్తే ఆగన్తుకానం భిక్ఖూనం వత్తం పఞ్ఞత్తం.

పుచ్ఛా – ఆవాసికానం ఆవుసో భిక్ఖూనం వత్తం భగవతా కత్థ కం ఆరబ్భ కిస్మిం వత్థుస్మిం పఞ్ఞత్తం, కథఞ్చ పన పఞ్ఞత్తం.

విస్సజ్జనా – సావత్థియం భన్తే సమ్బహులే ఆవాసికే భిక్ఖూ ఆరబ్భ పఞ్ఞత్తం, సమ్బహులా భన్తే ఆవాసికా భిక్ఖూ ఆగన్తుకే భిక్ఖూ దిస్వా నేవ ఆసనం పఞ్ఞపేసుం, న పాదోదకం పాదపీఠం పాదకథలికం ఉపనిక్ఖిపింసు, న పచ్చుగ్గన్త్వా పత్తచీవరం పటిగ్గహేసుం, న సేనాసనం పఞ్ఞపేసుం, తస్మిం భన్తే వత్థుస్మిం పఞ్ఞత్తం, తస్మిం భన్తే వత్థుస్మిం –

‘‘ఆవాసికేన భిక్ఖవే భిక్ఖునా ఆగన్తుకం భిక్ఖుం వుడ్ఢతరం దిస్వా ఆసనం పఞ్ఞపేతబ్బం, పాదోదకం పాదపీఠం పాదకథలికం ఉపనిక్ఖిపితబ్బం, పచ్చుగ్గన్త్వా పత్తచీవరం పటిగ్గహేతబ్బం పానీయేన పుచ్ఛితబ్బో’’ ఏవమాదినా భన్తే ఆవాసికానం భిక్ఖూనం వత్తం భగవతా పఞ్ఞత్తం.

పుచ్ఛా – గమికానం ఆవుసో భిక్ఖూనం వత్తం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం, కథఞ్చపన పఞ్ఞత్తం.

విస్సజ్జనా – సావత్థియం భన్తే సమ్బహులే గమికే భిక్ఖూ ఆరబ్భ పఞ్ఞత్తం, సమ్బహులా భన్తే గమికా భిక్ఖూ దారుభణ్డం మత్తికాభణ్డం అప్పటిసామేత్వా ద్వారవాతపానం వివరిత్వా సేనాసనం అనాపుచ్ఛా పక్కమింసు, తస్మిం భన్తే వత్థుస్మిం ‘‘గమికేన భిక్ఖవే భిక్ఖునా దారుభణ్డం పటిసామేత్వా ద్వారవాతపానం థకేత్వా సేనాసనం ఆపుచ్ఛా పక్కమితబ్బం’’ ఏవమాదినా భన్తే ఆకారేన భగవతా గమికానం భిక్ఖూనం వత్తం పఞ్ఞత్తం.

పుచ్ఛా – భత్తగ్గే ఆవుసో అనుమోదితుం భగవతా కత్థ అనుఞ్ఞాతం, కం ఆరబ్భ కిస్మిం వత్థుస్మిం అనుఞ్ఞాతం.

విస్సజ్జనా – సావత్థియం భన్తే సమ్బహులే భిక్ఖూ ఆరబ్భ అనుఞ్ఞాతం, సమ్బహులా భన్తే భిక్ఖూ భత్తగ్గే నానుమోదింసు, తస్మిం భన్తే వత్థుస్మిం అనుఞ్ఞాతం.

పుచ్ఛా – భిక్ఖూనం ఆవుసో భత్తగ్గవత్తం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – సావత్థియం భన్తే ఛబ్బగ్గియే భిక్ఖూ ఆరబ్భ పఞ్ఞత్తం, ఛబ్బగ్గియా భన్తే భిక్ఖూ దున్నివత్థా దుప్పారుతా అనాకప్పసమ్పన్నా భత్తగ్గం గచ్ఛింసు, తస్మిం భన్తే వత్థుస్మిం ‘‘సచే ఆరామే కాలో ఆరోచితో హోతి, తిమణ్డలం పటిచ్ఛాదేన్తేన పరిమణ్డలం నివాసేత్వా కాయబన్ధనం బన్ధిత్వా సగుణం కత్వా సఙ్ఘాటియో పారుపిత్వా గణ్ఠికం పటిముఞ్చిత్వా ధోవిత్వా పత్తం గహేత్వా సాధుకం అతరమానేన గామో పవిసితబ్బో’’తి ఏవమాదినా భన్తే భత్తగ్గవత్తం పఞ్ఞత్తం.

పుచ్ఛా – భిక్ఖూనం ఆవుసో సేనాసనవత్తం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం, కథఞ్చ తం పఞ్ఞత్తం.

విస్సజ్జనా – సావత్థియం భన్తే ఛబ్బగ్గియే భిక్ఖూ ఆరబ్భ పఞ్ఞత్తం, ఛబ్బగ్గియా భన్తే భిక్ఖూ భిక్ఖూసు అజ్ఝోకాసే చీవరం కరోన్తేసు పటివాతే అఙ్గణే సేనాసనం పప్ఫోటేసుం, తస్మిం భన్తే వత్థుస్మిం ‘‘యస్మిం విహారే విహరతి, సచే సో విహారో ఉక్లాపో హోతి, సచే ఉస్సహతి సోధేతబ్బో’’తి ఏవమాదినా భన్తే భిక్ఖూనం సేనాసనవత్తం భగవతా పఞ్ఞత్తం.

పుచ్ఛా – సమాచారం పుచ్ఛిస్సం, సనిదానం సనిద్దేసం. సముక్కట్ఠపదానం ఆవుసో కతి ఆపత్తియో.

విస్సజ్జనా – సమాచారం విస్సజ్జిస్సం, సనిదానం సనిద్దేసం. సముక్కట్ఠపదానం భన్తే ఏకా ఆపత్తి.