౬. సేనాసనక్ఖన్ధక

పుచ్ఛా – పఞ్చ ఆవుసో లేణాని భగవతా కత్థ అనుఞ్ఞాతాని, కం ఆరబ్భ కిస్మిం వత్థుస్మిం అనుఞ్ఞాతాని.

విస్సజ్జనా – రాజగహే భన్తే సమ్బహులే భిక్ఖూ ఆరబ్భ అనుఞ్ఞాతాని, సమ్బహులా భన్తే భిక్ఖూ భగవన్తం ఉపసఙ్కమిత్వా ఏతదవోచుం ‘‘రాజగహకో భన్తే సేట్ఠీ విహారే కారాపేతుకామో, కథం ను ఖో భన్తే పటిపజ్జితబ్బ’’న్తి, తస్మిం భన్తే వత్థుస్మిం అనుఞ్ఞాతాని.

పుచ్ఛా – కథం ఆవుసో విహారా పఠమం ఉప్పన్నా, కథఞ్చ తే పతిట్ఠాపి తా.

విస్సజ్జనా – ఏకాహేనేవ భన్తే రాజగహకేన సేట్ఠినా ఛట్ఠివిహారా పతిట్ఠాపితా, తే ఇధ భన్తే సట్ఠివిహారా బుద్ధప్పముఖస్స ఆగతానాగతస్స చాతుద్దిసస్స సఙ్ఘస్స పతిట్ఠాపితా.

పుచ్ఛా – విహారే ఆవుసో పటిభానకమ్మం పటిక్ఖిపిత్వా మాలాకమ్మాదీని భగవతా కత్థ అనుఞ్ఞాతాని, కం ఆరబ్భ కిస్మిం వత్థుస్మిం అనుఞ్ఞాతాని.

విస్సజ్జనా – రాజగహే భన్తే ఛబ్బగ్గియే భిక్ఖూ ఆరబ్భ అనుఞ్ఞాతాని. ఛబ్బగ్గియా భన్తే భిక్ఖూ విహారే పటిభానచిత్తం కారాపేసుం ఇత్థిరూపకం పురిసరూపకం, తస్మిం భన్తే వత్థుస్మిం అనుఞ్ఞాతాని.

పుచ్ఛా – యథావుడ్ఢం ఆవుసో అభివాదనాదీని చ అగ్గాసనాదీని చ అనుజానిత్వా సఙ్ఘికం యథావుడ్ఢం పటిబాహన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – అన్తరా చ భన్తే వేసాలిం అన్తరా చ సావత్థిం ఛబ్బగ్గియానం భిక్ఖూనం అన్తేవాసికే భిక్ఖూ ఆరబ్భ పఞ్ఞత్తం, ఛబ్బగ్గియానం భన్తే భిక్ఖూనం అన్తేవాసికా భిక్ఖూ బుద్ధప్పముఖస్స సఙ్ఘస్స పురతో పురతో గన్త్వా విహారే పటిగ్గహేసుం, సేయ్యాయో పటిగ్గహేసుం ‘‘ఇదం అమ్హాకం ఉపజ్ఝాయానం భవిస్సతి, ఇదం అమ్హాకం ఆచరియానం భవిస్సతి, ఇదం అమ్హాకం భవిస్సతీ’’తి, తస్మిం భన్తే వత్థుస్మిం పఞ్ఞత్తం.

పుచ్ఛా – ఏకేన ఆవుసో ద్వే పటిబాహన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – సావత్థియం భన్తే ఆయస్మన్తం ఉపనన్దం సక్యపుత్తం ఆరబ్భ పఞ్ఞత్తం, ఆయస్మా భన్తే ఉపనన్దో సక్యపుత్తో ఏకో ద్వే పటిబాహి, తస్మిం భన్తే వత్థుస్మిం పఞ్ఞత్తం.

పుచ్ఛా – నవకేన ఆవుసో ఉద్దిసన్తేన సమకే వా ఆసనే నిసీదితుం ఉచ్చతరే వా ధమ్మగారవేన, థేరేన పన భిక్ఖునా ఉద్దిసాపేన్తేన సమకే వా ఆసనే నిసీదితుం నీచతరే వా ధమ్మగారవేన భగవతా కత్థ అనుఞ్ఞాతం, కం ఆరబ్భ కిస్మిం వత్థుస్మిం అనుఞ్ఞాతం.

విస్సజ్జనా – సావత్థియం భన్తే సమ్బహులే భిక్ఖూ ఆరబ్భ అనుఞ్ఞాతం, సమ్బహులా భన్తే భిక్ఖూ ఆయస్మతో ఉపాలిస్స సన్తికే వినయం పరియాపుణింసు, ఆయస్మా భన్తే ఉపాలి ఠితకోవ ఉద్దిసతి థేరానం భిక్ఖూనం గారవేన, తత్థ భన్తే థేరా చేవ భిక్ఖూ కిలమింసు ఆయస్మా చ ఉపాలి కిలమి, తస్మిం భన్తే వత్థుస్మిం అనుఞ్ఞాతం.

పుచ్ఛా – తివస్సన్తరేన ఆవుసో సహ నిసీదితుం భగవతా కత్థ అనుఞ్ఞాతం, కం ఆరబ్భ కిస్మిం వత్థుస్మిం అనుఞ్ఞాతం.

విస్సజ్జనా – సావత్థియం భన్తే సమ్బహులే భిక్ఖూ ఆరబ్భ అనుఞ్ఞాతం, సమ్బహులానం భన్తే భిక్ఖూనం ఏతదహోసి ‘‘కిత్తావతాను ఖో సమానాసనికో హోతీ’’తి, తస్మిం భన్తే వత్థుస్మిం అనుఞ్ఞాతం.

పుచ్ఛా – మఞ్చే చ ఆవుసో పీఠే చ ద్విన్నంయేవ నిసీదితుం భగవతా కత్థ అనుఞ్ఞాతం, కం ఆరబ్భ కిస్మిం వత్థుస్మిం అనుఞ్ఞాతం.

విస్సజ్జనా – సావత్థియం భన్తే సమ్బహులే సమానాసనికే ఆరబ్భ పఞ్ఞత్తం, సమ్బహులా భన్తే భిక్ఖూ సమానాసనికా మఞ్చే నిసీదిత్వా మఞ్చం భిన్దింసు, పీఠే నిసీదిత్వా పీఠం భిన్దింసు, తస్మిం భన్తే వత్థుస్మిం అనుఞ్ఞాతం.

పుచ్ఛా – దీఘాసనే పనావుసో అసమానాసనికేహిపి నిసీదితుం భగవతా కత్థ అనుఞ్ఞాతం, కం ఆరబ్భ కిస్మిం వత్థుస్మిం అనుఞ్ఞాతం.

విస్సజ్జనా – సావత్థియం భన్తే సమ్బహులే భిక్ఖూ ఆరబ్భ అనుఞ్ఞాతం, సమ్బహులా భన్తే భిక్ఖూ దీఘాసనే అసమానాసనికేహి సహ నిసీదితుం కుక్కుచ్చాయింసు, తస్మిం భన్తే వత్థుస్మిం అనుఞ్ఞాతం.

పుచ్ఛా – పఞ్చ ఆవుసో అవిస్సజ్జియాని భగవతా కత్థ పఞ్ఞత్తాని, కం ఆరబ్భ కిస్మిం వత్థుస్మిం పఞ్ఞత్తాని.

విస్సజ్జనా – సావత్థియం భన్తే సమ్బహులే భిక్ఖూ ఆరబ్భ పఞ్ఞత్తాని, సమ్బహులా భన్తే భిక్ఖూ సఙ్ఘికం సేనాసనం విస్సజ్జేసుం, తస్మిం భన్తే వత్థుస్మిం పఞ్ఞత్తం.

పుచ్ఛా – పఞ్చ ఆవుసో అవేభఙ్గియాని భగవతా కత్థ పఞ్ఞత్తాని, కం ఆరబ్భ కిస్మిం వత్థుస్మిం పఞ్ఞత్తాని.

విస్సజ్జనా – కీటాగిరిస్మిం భన్తే అస్సజిపునబ్బసుకే భిక్ఖూ ఆరబ్భ పఞ్ఞత్తాని, అస్సజిపునబ్బసుకా భన్తే భిక్ఖూ సఙ్ఘికం సేనాసనం విభజింసు, తస్మిం భన్తే వత్థుస్మిం పఞ్ఞత్తాని.

పుచ్ఛా – అఞ్ఞత్ర పరిభోగం ఆవుసో అఞ్ఞత్ర పరిభుఞ్జన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – ఆళవియం భన్తే సమ్బహులే భిక్ఖూ ఆరబ్భ పఞ్ఞత్తం, సమ్బహులా భన్తే భిక్ఖూ అఞ్ఞతరస్స ఉపాసకస్స విహారపరిభోగం సేనాసనం అఞ్ఞత్ర పరిభుఞ్జింసు, తస్మిం భన్తే వత్థుస్మిం పఞ్ఞత్తం.

పుచ్ఛా – అధోతేహి చ ఆవుసో అల్లేహి చ పాదేహి సేనాసనం అక్కమన్తస్స చ సఉపాహనేన సేనాసనం అక్కమన్తస్స చ దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – ఆళవియం భన్తే సమ్బహులే భిక్ఖూ ఆరబ్భ పఞ్ఞత్తం, సమ్బహులా భన్తే భిక్ఖూ అధోతేహి పాదేహి సేనాసనం అక్కమింసు, అల్లేహి చ పాదేహి సేనాసనం అక్కమింసు, సఉపాహనాపి సేనాసనం అక్కమింసు, సేనాసనం దుస్సి, తస్మిం భన్తే వత్థుస్మిం పఞ్ఞత్తం.

పుచ్ఛా – పరికమ్మకతాయ ఆవుసో భూమియా నిట్ఠుభన్తస్స చ పరికమ్మకతం భిత్తిం అపస్సయన్తస్స చ దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – ఆళవియం భన్తే సమ్బహులేవ భిక్ఖూ ఆరబ్భ పఞ్ఞత్తం, సమ్బహులా భన్తే భిక్ఖూ పరికమ్మకతాయ భూమియా నిట్ఠుభింసు, పరికమ్మకతం భిత్తిం అపస్సయింసు, తస్మిం భన్తే వత్థుస్మిం పఞ్ఞత్తం.

పుచ్ఛా – సేనాసనక్ఖన్ధకం పుచ్ఛిస్సం, సనిదానం సనిద్దేసం. సముక్కట్ఠపదానం ఆవుసో కతి ఆపత్తియో.

విస్సజ్జనా – సేనాసనక్ఖన్ధకం విస్సజ్జిస్సం, సనిదానం సనిద్దేసం. సముక్కట్ఠపదానం భన్తే తిస్సో ఆపత్తియో.