౩. వస్సుపనాయికక్ఖన్ధక

పుచ్ఛా – వస్సూపనాయికం ఆవుసో భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – రాజగహే భన్తే సమ్బహులా భిక్ఖూ ఆరబ్భ పఞ్ఞత్తం, సమ్బహులా భన్తే భిక్ఖూ హేమన్తమ్పి గిమ్హమ్పి వస్సమ్పి చారికం చరింసు, తస్మిం భన్తే వత్థుస్మిం పఞ్ఞత్తం.

పుచ్ఛా – కతిపనావుసో వస్సూపనాయికా భగవతా అనుఞ్ఞాతా.

విస్సజ్జనా – ద్వేమా భన్తే వస్సూపనాయికా భగవతా అనుఞ్ఞాతా పురిమికా పచ్ఛిమికా, అపరజ్జుగతాయ భన్తే ఆసళ్హియా పురిమికా ఉపగన్తబ్బా, మాసగతాయ భన్తే ఆసళ్హియా పచ్ఛిమికా ఉపగన్తబ్బా, ఇమా ఖో భన్తే ద్వే వస్సూపనాయికా భగవతా అనుఞ్ఞాతా.

పుచ్ఛా – వస్సం ఆవుసో ఉపగన్త్వా పురిమం వా తేమాసం పచ్ఛిమం వా తేమాసం అవసిత్వా చారికం పక్కమన్తస్స దుక్కటం కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – రాజగహే భన్తే ఛబ్బగ్గియే భిక్ఖూ ఆరబ్భ పఞ్ఞత్తం, ఛబ్బగ్గియా భన్తే భిక్ఖూ వస్సం ఉపగన్త్వా అన్తరా వస్సం చారికం పక్కమింసు, తస్మిం భన్తే వత్థుస్మిం పఞ్ఞత్తం.

పుచ్ఛా – సత్తాహ కరణీయేన ఆవుసో పహితే గన్తుం భగవతా కత్థ అనుఞ్ఞాతం, కం ఆరబ్భ కిస్మిం వత్థుస్మిం అనుఞ్ఞాతం.

విస్సజ్జనా – సావత్థియం భన్తే సమ్బహులే భిక్ఖూ ఆరబ్భ అనుఞ్ఞాతం, సమ్బహులా భన్తే భిక్ఖూ ఉదేనేన ఉపాసకేన పహితే న గచ్ఛింసు, తస్మిం భన్తే వత్థుస్మిం అనుఞ్ఞాతం.

పుచ్ఛా – సత్తాహకరణీయేన ఆవుసో సత్తన్నం అపహితేపి గన్తుం భగవతా కత్థ అనుఞ్ఞాతం, కం ఆరబ్భ కిస్మిం వత్థుస్మిం అనుఞ్ఞాతం.

విస్సజ్జనా – సావత్థియం భన్తే అఞ్ఞతరస్స భిక్ఖునో మాతుగిలాన వత్థుస్మిం అనుఞ్ఞాతం.

అనుజానామి భిక్ఖవే సత్తన్నం సత్తాహకరణీయేన అపహితేపి గన్తుం, పగేవ పహితే.

పుచ్ఛా – కిస్మించి ఆవుసో అన్తరాయే సతి అన్తోవస్సం పక్కమితుం భగవతా కత్థ అనుఞ్ఞాతం, కం ఆరబ్భ కిస్మిం వత్థుస్మిం అనుఞ్ఞాతం.

విస్సజ్జనా – సావత్థియం భన్తే సమ్బహులే భిక్ఖూ ఆరబ్భ అనుఞ్ఞాతం, సమ్బహులా భన్తే భిక్ఖూ కోసలేసు జనపదేసు వస్సం ఉపగచ్ఛింసు, తే వస్సూపగతా వాళేహి ఉబ్బాళ్హా అహేసుం, తస్మిం భన్తే వత్థుస్మిం అనుఞ్ఞాతం.

పుచ్ఛా – రుక్ఖ సుసిరే వా ఆవుసో రుక్ఖవిటభియా వా అజ్ఝోకాసే వా వస్సం ఉపగచ్ఛన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – సావత్థియం భన్తే సమ్బహులే భిక్ఖూ ఆరబ్భ పఞ్ఞత్తం, సమ్బహులా భన్తే భిక్ఖూ రుక్ఖసుసిరేపి రుక్ఖవిటభియాపి అజ్ఝోకాసేపి వస్సం ఉపగచ్ఛింసు, తస్మిం భన్తే వత్థుస్మిం పఞ్ఞత్తం.

పుచ్ఛా – అసేనాసనికేన ఆవుసో వస్సం ఉపగచ్ఛన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – తస్మింయేవ భన్తే సావత్థియం సమ్బహులే భిక్ఖూ ఆరబ్భ పఞ్ఞత్తం, సమ్బహులా భన్తే భిక్ఖూ అసేనాసనికా వస్సం ఉపగచ్ఛింసు, తస్మిం భన్తే వత్థుస్మిం పఞ్ఞత్తం.

పుచ్ఛా – ఛవకుటికాయ వా ఆవుసో ఛత్తే వా చాటియా వా వస్సం ఉపగచ్ఛన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – సావత్థియంయేవ భన్తే సమ్బహులే భిక్ఖూ ఆరబ్భ పఞ్ఞత్తం, సమ్బహులా భన్తే భిక్ఖూ ఛవకుటికాయపి ఛత్తేపి చాటియాపి వస్సం ఉపగచ్ఛింసు, తస్మిం భన్తే వత్థుస్మిం పఞ్ఞత్తం.

పుచ్ఛా – పటిస్సవం ఆవుసో విసం వాదేన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – సావత్థియం భన్తే ఆయస్మన్తం ఉపనన్దం సక్యపుత్తం ఆరబ్భ పఞ్ఞత్తం, ఆయస్మా భన్తే ఉపనన్దో సక్యపుత్తో రఞ్ఞో పసేనదిస్స కోసలస్స వస్సం వాసం పటిస్సుణిత్వా విసంవాదేసి, తస్మిం భన్తే వత్థుస్మిం పఞ్ఞత్తం.

పుచ్ఛా – వస్సూపనాయికం పుచ్ఛిస్సం, సనిదానం సనిద్దేసం. సముక్కట్ఠపదానం ఆవుసో కతి ఆపత్తియో.

విస్సజ్జనా – వస్సూపనాయికం విస్సజ్జిస్సం, సనిదానం సనిద్దేసం. సముక్కట్ఠపదానం భన్తే ఏకా ఆపత్తి.