మహావగ్గపాళి
సంగాయనస్స పుచ్ఛా విస్సజ్జనా
పుచ్ఛా – ఉభతో విభఙ్గానన్తరం ఆవుసో పోరాణకేహి సంగీతికారమహాథేరేహి కం నామ పావచనం సంగీతం.
విస్సజ్జనా – ఉభతో విభఙ్గానన్తరం భన్తే పోరాణకేహి సంగీతికారమహాథేరేహి ఖన్ధకా సంగీతా.
పుచ్ఛా – తే పన ఆవుసో ఖన్ధకా వగ్గభేదేన కతివిధా.
విస్సజ్జనా – తే పన భన్తే ఖన్ధకా దువిధా వగ్గభేదేన మహావగ్గో చూళవగ్గోతి.
పుచ్ఛా – మహావగ్గే ఆవుసో కతి ఖన్ధకా పరియాపన్నా.
విస్సజ్జనా – మహావగ్గే భన్తే దసఖన్ధకా పరియాపన్నా, సేయ్యథిదం, మహాఖన్ధకో ఉపోసథక్ఖన్ధకో వస్సూపనాయికక్ఖన్ధకో పవారణాక్ఖన్ధకో చమ్మక్ఖన్ధకో భేసజ్జక్ఖన్ధకో కథినక్ఖన్ధకో చీవరక్ఖన్ధకో చమ్పేయ్యక్ఖన్ధకో కోసమ్బకక్ఖన్ధకోతి.
పుచ్ఛా – మహాఖన్ధకే ఆవుసో బహూ కథాయో, కతమా తాసం ఆదికథా.
విస్సజ్జనా – మహాఖన్ధకే భన్తే బోధికథా ఆది.
మహాఖన్ధక
మహాబోధిపుచ్ఛా
పుచ్ఛా – తస్మాతిహ ఆవుసో తతో పట్ఠాయ తం పుచ్ఛిస్సామి, భగవా ఆవుసో పఠమాభిసమ్బుద్ధకాలే కత్థ కీవచీరం కేనాకారేన విహాసి.
విస్సజ్జనా – భగవా భన్తే పఠమాభిసమ్బుద్ధో బోధిరుక్ఖమూలే సత్తాహం ఏకపల్లఙ్కేన విహాసి విముత్తిసుఖం పటిసంవేదీ.
పుచ్ఛా – తదా ఆవుసో భగవా కీదిసం ధమ్మం మనసికత్వా కీదిసం ఉదానం ఉదానేసి.
విస్సజ్జనా – తదా భన్తే భగవా రత్తియా పఠమం యామం రత్తియా మజ్ఝిమం యామం రత్తియా పచ్ఛిమం యామం పటిచ్చసముప్పాదం అనులోమం పటిలోమం మనసికత్వా తీణి ఉదానాని ఉదానేసి.
అజపాల
పుచ్ఛా – తస్స ఆవుసో సత్తాహస్స అచ్చయేన భగవా కత్థ విహాసి.
విస్సజ్జనా – తస్స భన్తే సత్తాహస్స అచ్చయేన భగవా అజపాల నిగ్రోధమూలే విహాసి, సత్తాహం ఏకపల్లఙ్కేన విహాసి విముత్తిసుఖం పటిసంవేదీ.
ముచలిన్దా
పుచ్ఛా – తస్సపి ఆవుసో సత్తాహస్స అచ్చయేన భగవా కత్థ విహాసి.
విస్సజ్జనా – తస్స భన్తే సత్తాహస్స అచ్చయేన భగవా ముచలిన్దమూలే సత్తాహం ఏకపల్లఙ్కేన నిసీది.
పుచ్ఛా – తస్సపి ఆవుసో సత్తాహస్స అచ్చయేన భగవా కత్థ విహాసి.
విస్సజ్జనా – తస్సపి భన్తే సత్తాహస్స అచ్చయేన భగవా రాజాయతనమూలే సత్తాహం ఏకపల్లఙ్కేన నిసీది విముత్తిసుఖం పటిసంవేదీ.
పుచ్ఛా – తస్సపి ఆవుసో సత్తాహస్స అచ్చయేన భగవా కత్థ విహాసి.
విస్సజ్జనా – తస్స భన్తే సత్తాహస్స అచ్చయేన భగవా పునదేవ అజపాలనిగ్రోధమూలే విహాసి.
పుచ్ఛా – తస్మిం పన ఆవుసో అజపాలనిగ్రోధే విహరన్తస్స భగవతో కథం చేతసో పరివితక్కో ఉదపాది.
విస్సజ్జనా – తస్మిం పన భన్తే అజపాలనిగ్రోధే విహరన్తస్స భగవతో రహోగతస్స పటిసల్లీనస్స ధమ్మగమ్భీరతాపటిసంయుత్తో చేతసో పరివితక్కో ఉదపాది.
అధిగతో ఖో మ్యాయం ధమ్మో గమ్భీరో దుద్దసో అరనుబోధో సన్తో పణీతో అతక్కావచరా నిపుణో పణ్డితవేదనీయో.
ఆలయరామాఖో పనాయం పజా ఆలయరతా ఆలయసమ్ముదితా,
సహమ్పతి బ్రహ్మా
పుచ్ఛా – కథం ఆవుసో తదా ధమ్మదేసనాయ బ్రహ్మయాచనా చ భగవతో పటిఞ్ఞాచ అహోసి.
విస్సజ్జనా – దేసేతు భన్తే భగవా ధమ్మం, దేసేతు సుగతో ధమ్మం, సన్తి సత్తా అప్పరజక్ఖజాతికా అస్సవనతా ధమ్మస్స పరిహాయన్తి, భవిస్సన్తి ధమ్మస్స అఞ్ఞాతారోతి ఇతి భన్తే బ్రహ్మునో ధమ్మదేసనాయ యాచనా అహోసి,
‘‘అపారుతా తేసం అమతస్స ద్వారా,
యే సోతవన్తో పముఞ్చన్తు సద్ధం;
విహింససఞ్ఞీ పగుణం నభాసిం,
ధమ్మం పణీతం మనుజేసు బ్రహ్మే’’తి.
ఏవం ఖో భన్తే భగవతో ధమ్మదేసనాయ పటిఞ్ఞా చ అహోసి.
నస్సతి వత లోకో…
దేసేతు భన్తే భగవా ధమ్మం…
అపారుతా తేసం అమతస్స ద్వారా,
యే సోతవన్తో పముఞ్చన్తు సద్ధం.
పుచ్ఛా – ఏవం ఖో ఆవుసో భగవా ధమ్మదేసనాయ పటిఞ్ఞం కత్వా పఠమం ధమ్మం దేసేన్తో కత్థ కీదిసం ధమ్మం కస్స దేసేసి.
విస్సజ్జనా – బారాణసియం భన్తే ఇసిపతనే మిగదాయే పఞ్చవగ్గియ భిక్ఖుపముఖానం బ్రహ్మగణానం ధమ్మచక్కపవత్తనసుత్తం దేసేసి.
పుచ్ఛా – తస్మిం ఖో పన ఆవుసో ధమ్మచక్కపవత్తనసుత్తే దేసియమానే మనుస్సలోకే కస్స ధమ్మాభిసమయో అహోసి.
విస్సజ్జనా – ఆయస్మతో భన్తే కోణ్డఞ్ఞస్స ధమ్మాభిసమయో అహోసి.
పుచ్ఛా – కథం ను ఖో ఆవుసో ఇమస్మిం బుద్ధసాసనే పఠమం పబ్బజ్జా చ ఉపసమ్పదా చ అహోసి.
విస్సజ్జనా – ఇమస్మిం భన్తే బుద్ధసాసనే పఠమం ఏహిభిక్ఖుపసమ్పదా అహోసి.
లభేయ్యాహం భన్తే భగవతో సన్తికే పబ్బజం, లభేయ్యం ఉపసమ్పదం.
ఏహి భిక్ఖు స్వాఖాతో ధమ్మో, చర బ్రహ్మచరియం సమ్మా దుక్ఖస్స అన్తకిరియాయ.
పుచ్ఛా – ఇతరేసం పన ఆవుసో చతున్నం పఞ్చవగ్గియానం కదా ధమ్మాభిసమయో అహోసి.
విస్సజ్జనా – పాటిపదే భన్తే దివసే ఆయస్మతో వప్పస్స, దుతియే భన్తే దివసే ఆయస్మతో భద్దియస్స, తతియే భన్తే దివసే ఆయస్మతో మహానామస్స, చతుత్థే భన్తే దివసే ఆయస్మతో అస్సజిస్స ధమ్మాభిసమయో అహోసి.
పుచ్ఛా – సబ్బేసమ్పి ఆవుసో తేసం పఞ్చవగ్గియానం భిక్ఖూనం కదా అరహత్తపత్తి హోతి.
విస్సజ్జనా – సబ్బేసమ్పి భన్తే తేసం పఞ్చవగ్గియానం భిక్ఖూనం పక్ఖస్స పఞ్చమియం అనత్తలక్ఖణసుత్తే దేసియమానే అరహత్తపత్తి హోతి.
పుచ్ఛా – కదా ఆవుసో భగవతా భిక్ఖూ తత్థ తత్థ చారికం చరిత్వా ధమ్మదేసనత్థాయ పేసితా.
విస్సజ్జనా – యసప్పముఖానం భన్తే చతుపఞ్ఞాస సహాయకానం పబ్బజితకాలే భగవతా భిక్ఖూ తత్థ తత్థ చారికం చరిత్వా ధమ్మదేసనత్థాయ పేసితా.
సరణగమన
పుచ్ఛా – కదా ఆవుసో భగవతా తీహి సరణగమనేహి పబ్బజ్జూప సమ్పదా అనుఞ్ఞాతో అహోసి.
విస్సజ్జనా – యసప్పముఖానం భన్తే చతుపఞ్ఞాసాయ గిహి సహాయకానం పబ్బజిత్వా తత్థ తత్థ చారికం చరిత్వా ధమ్మదేసనత్థాయ పేసితకాలే భగవతా తీహి సరణగమనేహి పబ్బజ్జా చ ఉపసమ్పదా చ అనుఞ్ఞాతా.
అనుజానామి భిక్ఖవే తుమ్హేవ దాని తాసు తాసు దిసాసు తేసు తేసు జనపదేసు పబ్బాజేథ ఉపసమ్పాదేథ.
పుచ్ఛా – భగవతా ఆవుసో భిక్ఖూనం ఆరామో పటిగ్గణ్హితుం కత్థ కిస్మిం వత్థుస్మిం అనుఞ్ఞాతో.
విస్సజ్జనా – భగవతా భన్తే భిక్ఖూనం ఆరామం పటిగ్గణ్హితుం రాజగహే అనుఞ్ఞాతో, రాజా భన్తే మాగధో సేనియో బిమ్బిసారో బుద్ధప్పముఖస్స భిక్ఖుసఙ్ఘస్స వేళువనం ఉయ్యానం అదాసి, తస్మిం భన్తే వత్థుస్మిం అనుఞ్ఞాతో.
ఏతాహం భన్తే వేళువనం ఉయ్యానం బుద్ధప్పముఖస్స భిక్ఖుసఙ్ఘస్స దమ్మి –
అనుజానామి భిక్ఖవే ఆరామం.
పుచ్ఛా – కథఞ్చ ఆవుసో ద్విన్నం అగ్గసావకానం పబ్బజ్జూపసమ్పదా అహోసి.
విస్సజ్జనా – ద్విన్నం భన్తే అగ్గసావకానం ఏహి భిక్ఖుపసమ్పదా అహోసి.
విప్పసన్నాని ఖో తే ఆవుసో ఇన్ద్రియాని.
కంసి త్వం ఆవుసో ఉద్దిస్స పబ్బజితో.
కో వా తే సత్థా.
కస్స వా త్వం ధమ్మం రోచేసి.
అత్థావుసో మహాసమణో సక్యపుత్తో సక్యకులా పబ్బజితో.
కిం వాదీ పనాయస్మతో సత్థా కిమక్ఖాయీ.
యే ధమ్మా హేతుప్పభవా, తేసం హేతుం తథాగతో;
ఆహ తేసఞ్చ యో నిరోధో, ఏవం వాదీ మహాసమణో.
అలం ఆవుసో మా అగమిత్థ.
ఏతే భిక్ఖవే ద్వే సహాయకా ఆగచ్ఛన్తి కోలితో ఉపతిస్సో చ ఏతం మే సావకయుగం భవిస్సతి అగ్గం భద్దయుగం.
లభేయ్యామ మయం భన్తే భగవతో సన్తికే పబ్బజ్జం లభేయ్యామ ఉపసమ్పదం.
ఏథ భిక్ఖవో స్వాఖాతో ధమ్మో, చరథ బ్రహ్మచరియం సమ్మా దుక్ఖస్స అన్తకిరియాయ.
పుచ్ఛా – ఉపజ్ఝాయో ఆవుసో గణ్హితుం భగవతా కత్థ అనుఞ్ఞాతో, కం ఆరబ్భ కిస్మిం వత్థుస్మిం అనుఞ్ఞాతో.
విస్సజ్జనా – రాజగహే భన్తే సమ్బహులే భిక్ఖూ ఆరబ్భ అనుఞ్ఞాతో, సమ్బహులా భన్తే భిక్ఖూ అనుపజ్ఝాయకా అనాచరియకా అనోవదియమానా అననుసాసియమానా దున్నివత్థా దుప్పారుతా అనోకప్పసమ్పన్నా పిణ్డాయ చరింసు, తస్మిం భన్తే వత్థుస్మిం అనుఞ్ఞాతో.
పుచ్ఛా – ఉపజ్ఝాయమ్హి ఆవుసో న సమ్మావత్తన్తస్స దుక్కటం కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.
విస్సజ్జనా – రాజగహే భన్తే సమ్బహులే సద్ధివిహారికే ఆరబ్భ పఞ్ఞత్తం, సమ్బహులా భన్తే సద్ధివిహారికా ఉపజ్ఝాయమ్హి న సమ్మావత్తింసు, తస్మిం భన్తే వత్థుస్మిం పఞ్ఞత్తం.
పుచ్ఛా – కదా ఆవుసో భగవతా తీహి సరణగమనేహి ఉపసమ్పదం పటిక్ఖిపిత్వా ఞాతిచతుత్థేన కమ్మేన ఉపసమ్పదా అనుఞ్ఞాతా.
విస్సజ్జనా – రాధబ్రాహ్మణస్స భన్తే పబ్బజితకాలే భగవతా తీహి సరణగమనేహి ఉపసమ్పదం పటిక్ఖిపిత్వా ఞాత్తిచతుత్థేన కమ్మేన ఉపసమ్పదా అనుఞ్ఞాతా.
కోను ఖో భిక్ఖవే తస్స బ్రాహ్మణస్స అధికారం సరతి.
అహం ఖో భన్తే తస్స బ్రాహ్మణస్స అధికారం సరామి.
సాధు సాధు సారిపుత్త, కతఞ్ఞునో హి సారిపుత్త సప్పురిసా కతవేదినో.
కథాహం భన్తే తం బ్రాహ్మణం ఉపసమ్పాదేమి.
యాసా భిక్ఖవే మయా తీహి సరణగమనేహి ఉపసమ్పదాఅనుఞ్ఞాతా, తం అజ్జతగ్గే పటిక్ఖిపామి.
అనుజానామి భిక్ఖవే ఞాత్తిచతుత్థేన కమ్మేన ఉపసమ్పాదేతుం.
పుచ్ఛా – అయాచితకం ఆవుసో ఉపసమ్పదాపేక్ఖం ఉపసమ్పాదేన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.
విస్సజ్జనా – రాజగహే భన్తే అఞ్ఞతరం భిక్ఖుం ఆరబ్భ పఞ్ఞత్తం, అఞ్ఞతరో భన్తే భిక్ఖు ఉపసమ్పన్నసమనన్తరం అనాచారం అచరి, తస్మిం భన్తే వత్థుస్మిం పఞ్ఞత్తం.
పుచ్ఛా – చతున్నం ఆవుసో నిస్సయానం ఆచిక్ఖణా భగవతా కత్థ అనుఞ్ఞాతా, కం ఆరబ్భ కిస్మిం వత్థుస్మిం అనుఞ్ఞాతా.
విస్సజ్జనా – రాజగహే భన్తే అఞ్ఞతరం భిక్ఖుం ఆరబ్భ అనుఞ్ఞాతా, అఞ్ఞతరో భన్తే భిక్ఖు ఉదరస్స కారణా పబ్బజి, తస్మిం భన్తే వత్థుస్మిం అనుఞ్ఞాతా.
ఏహి దాని ఆవుసో పిణ్డాయ చరిస్సామ.
కథఞ్హి నామ భిక్ఖు ఏవం స్వాక్ఖాతే ధమ్మవినయే ఉదరస్స కారణా పబ్బజిస్సతి.
పుచ్ఛా – ఊనదసవస్సేన ఆవుసో ఉపసమ్పాదేన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.
విస్సజ్జనా – రాజగహే భన్తే ఆయస్మన్తం ఉపసేనం వఙ్గన్తపుత్తం ఆరబ్భ పఞ్ఞత్తం, ఆయస్మా భన్తే ఉపసేనో వఙ్గన్తపుత్తో ఏకవస్సో సద్ధివిహారికం ఉపసమ్పాదేసి, తస్మిం భన్తే వత్థుస్మిం పఞ్ఞత్తం.
పుచ్ఛా – బాలేన ఆవుసో అబ్యత్తేన ఉపసమ్పాదేన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.
విస్సజ్జనా – రాజగహే భన్తే సమ్బహులే భిక్ఖూ ఆరబ్భ పఞ్ఞత్తం, సమ్బహులా భన్తే భిక్ఖూ ‘‘దసవస్సమ్హా దసవస్సమ్హా’’తి బాలా అబ్యత్తా ఉపసమ్పాదేసుం, తస్మిం భన్తే వత్థుస్మిం పఞ్ఞత్తం.
పుచ్ఛా – ఆచరియో ఆవుసో గణ్హితుం భగవతా కత్థ అనుఞ్ఞాతో, కం ఆరబ్భ కిస్మిం వత్థుస్మిం అనుఞ్ఞాతో.
విస్సజ్జనా – రాజగహే భన్తే సమ్బహులే భిక్ఖూ ఆరబ్భ అనుఞ్ఞాతో, సమ్బహులా భన్తే భిక్ఖూ ఉపజ్ఝాయేసు పక్కన్తేసుపి విబ్భన్తేసుపి కాలఙ్కతేసుపి పక్ఖసఙ్కన్తేసుపి అనాచరియకా అనోవదియమానా అననుసాసియమానా దున్నివత్థా దుప్పారుతా అనాకప్పసమ్పన్నా పిణ్డాయ చరింసు, తస్మిం భన్తే వత్థుస్మిం అనుఞ్ఞాతో.
పుచ్ఛా – పఞ్చహి ఆవుసో ఆబాధేహి ఫుట్ఠం పబ్బాజేన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.
విస్సజ్జనా – రాజగహే భన్తే సమ్బహులే భిక్ఖూ ఆరబ్భ పఞ్ఞత్తం, సమ్బహులా భన్తే భిక్ఖూ పఞ్చహి ఆబాధేహి ఫుట్ఠం పబ్బాజేసుం, తస్మిం భన్తే వత్థుస్మిం పఞ్ఞత్తం.
సాధు భన్తే అయ్యా పఞ్చహి ఆబాధేహి ఫుట్ఠం న పబ్బాజేయ్యుం…
పుచ్ఛా – రాజభటం ఆవుసో పబ్బాజేన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.
విస్సజ్జనా – రాజగహే భన్తే సమ్బహులే భిక్ఖూ ఆరబ్భ పఞ్ఞత్తం, సమ్బహులా భన్తే భిక్ఖూ రాజభటే పబ్బాజేసుం, తస్మిం భన్తే వత్థుస్మిం పఞ్ఞత్తం.
పుచ్ఛా – ధజబన్ధం ఆవుసో చోరం పబ్బాజేన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.
విస్సజ్జనా – రాజగహేయేవ భన్తే అఙ్గులిమాలం చోరం ఆరబ్భ పఞ్ఞత్తం, అఙ్గులిమాలో భన్తే చోరో భిక్ఖూసు పబ్బజితో హోతి, తస్మిం భన్తే వత్థుస్మిం పఞ్ఞత్తం.
పుచ్ఛా – కారభేదకం ఆవుసో చోరం పబ్బాజేన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.
విస్సజ్జనా – రాజగహేయేవ భన్తే సమ్బహులే భిక్ఖూ ఆరబ్భ పఞ్ఞత్తం, సమ్బహులా భన్తే భిక్ఖూ కారభేదకచోరం పబ్బాజేసుం, తస్మిం భన్తే వత్థుస్మిం పఞ్ఞత్తం.
పుచ్ఛా – ఇణాయికం ఆవుసో పబ్బాజేన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.
విస్సజ్జనా – రాజగహేయేవ భన్తే సమ్బహులే భిక్ఖూ ఆరబ్భ పఞ్ఞత్తం, సమ్బహులా భన్తే భిక్ఖూ ఇణాయికం పబ్బాజేసుం, తస్మిం భన్తే వత్థుస్మిం పఞ్ఞత్తం.
పుచ్ఛా – దాసం ఆవుసో పబ్బజేన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.
విస్సజ్జనా – రాజగహేయేవ భన్తే సమ్బహులే భిక్ఖూ ఆరబ్భ పఞ్ఞత్తం, సమ్బహులా భన్తే భిక్ఖూ దాసం పబ్బాజేసుం, తస్మిం భన్తే వత్థుస్మిం పఞ్ఞత్తం.
పుచ్ఛా – భణ్డుకమ్మాయ ఆవుసో అపలోకనం భగవతా కత్థ అనుఞ్ఞాతం, కం ఆరబ్భ కిస్మిం వత్థుస్మిం అనుఞ్ఞాతం.
విస్సజ్జనా – రాజగహేయేవ భన్తే అఞ్ఞతరం కమ్మారభణ్డుపుత్తం ఆరబ్భ అనుఞ్ఞాతం అఞ్ఞతరో భన్తే కమ్మారభణ్డుపుత్తో మాతాపితూహి సద్ధిం భణ్డిత్వా భిక్ఖూసు పబ్బజితో హోతి, తస్మిం భన్తే వత్థుస్మిం అనుఞ్ఞాతం.
పుచ్ఛా – ఊనవీసతివస్సస్స ఆవుసో పుగ్గలస్స ఉపసమ్పదా భగవతా కత్థ పటిక్ఖిత్తా, కం ఆరబ్భ కిస్మిం వత్థుస్మిం పటిక్ఖిత్తా.
విస్సజ్జనా – రాజగహే భన్తే సమ్బహులే భిక్ఖూ ఆరబ్భ పటిక్ఖిత్తా, సమ్బహులా భన్తే భిక్ఖూ ఊనవీసతివస్సం పుగ్గలం ఉపసమ్పాదేసుం, తస్మిం భన్తే వత్థుస్మిం పటిక్ఖిత్తా.
న భిక్ఖవే జానం ఊనవీసతివస్సో పుగ్గలో ఉపసమ్పాదేతబ్బో, యోఉపసమ్పాదేయ్య, యథాధమ్మో కారేతబ్బో.
పుచ్ఛా – మాతాపితూహి ఆవుసో అననుఞ్ఞాతం పుత్తం పబ్బాజేన్తస్స దుక్కటం భగవతా కత్థ పఞ్ఞత్తం, కిస్మిం వత్థుస్మిం పఞ్ఞత్తం.
విస్సజ్జనా – సక్కేసు భన్తే పఞ్ఞత్తం, రాజా భన్తే సుద్ధోదనో భగవన్తం ఉపసఙ్కమిత్వా వరం యాచి, సాధు భన్తే అయ్యాఅననుఞ్ఞాతం మాతాపితూహి పుత్తం పబ్బాజేయ్యున్తి, తస్మిం భన్తే వత్థుస్మిం పఞ్ఞత్తం.
న భిక్ఖవే అననుఞ్ఞాతో మాతాపితూహి పుత్తో పబ్బాజేతబ్బో, యో పబ్బాజేయ్య, ఆపత్తిదుక్కటస్స.
పుచ్ఛా – థేయ్యసంవాసకస్స ఆవుసో ఉపసమ్పదా భగవతా కత్థ పటిక్ఖిత్తా, కం ఆరబ్భ కిస్మిం వత్థుస్మిం పటిక్ఖిత్తా.
విస్సజ్జనా – సావత్థియం భన్తే అఞ్ఞతరం పురాణకులపుత్తం ఆరబ్భ పటిక్ఖిత్తా, అఞ్ఞతరో భన్తే పురాణకులపుత్తో ఖీణ కోలఞ్ఞో సామం పత్తచీవరం పటియాదేత్వా కేసమస్సుం ఓహారేత్వా కాసాయాని వత్థాని అచ్ఛాదేత్వా ఆరామం గన్త్వా భిక్ఖూహి సద్ధిం సంవసి, భన్తే వత్థుస్మిం పటిక్ఖిత్తా.
పుచ్ఛా – తిరచ్ఛానగతస్స ఆవుసో ఉపసమ్పదా భగవతా కత్థ పటిక్ఖిత్తా, కం ఆరబ్భ కిస్మిం వత్థుస్మిం పటిక్ఖిత్తా.
విస్సజ్జనా – సావత్థియం భన్తే అఞ్ఞతరం నాగం ఆరబ్భ పటిక్ఖిత్తా, అఞ్ఞతరో భన్తే నాగో మాణవకవణ్ణేన భిక్ఖూ ఉపసఙ్కమిత్వా పబ్బజ్జం యాచి, తం భిక్ఖూ పబ్బాజేసుం ఉపసమ్పాదేసుం, తస్మిం భన్తే వత్థుస్మిం పటిక్ఖిత్తా.
పుచ్ఛా – మాతుఘాతకస్స చ ఆవుసో పితుఘాతకస్స చ ఉపసమ్పదా భగవతా కత్థ పటిక్ఖిత్తా, కం ఆరబ్భ కిస్మిం వత్థుస్మిం పటిక్ఖిత్తా.
విస్సజ్జనా – సావత్థియంయేవ భన్తే అఞ్ఞతరం మాణవకం ఆరబ్భ పటిక్ఖిత్తా, అఞ్ఞతరో చ భన్తే మాణవకో అఞ్ఞతరో చ మాణవకో మాతరం జీవితా వోరోపేసి పితరం జీవితా వోరోపేసి, తస్మిం భన్తే వత్థుస్మిం పటిక్ఖిత్తా.
మాతుఘాతకో భిక్ఖవే అనుపసమ్పన్నో నఉపసమ్పాదేతబ్బో, ఉపసమ్పన్నో నాసేతబ్బో, పితుఘాతకో భిక్ఖవే అనుపసమ్పన్నో నఉపసమ్పాదేతబ్బో, ఉపసమ్పన్నో నాసేతబ్బో.
పుచ్ఛా – అపత్తచీవరకం వా ఆవుసో యాచితపత్తచీవరకం వా ఉపసమ్పాదేన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.
విస్సజ్జనా – సావత్థియం భన్తే సమ్బహులే భిక్ఖూ ఆరబ్భ పఞ్ఞత్తం, సమ్బహులా భన్తే భిక్ఖూ అపత్తచీవరకం ఉపసమ్పాదేసుం, యాచితకేన పత్తచీవరేన ఉపసమ్పాదేసుం, తస్మిం భన్తే వత్థుస్మిం పఞ్ఞత్తం.
పుచ్ఛా – ఉపసమ్పదం పుచ్ఛిస్సం, సనిదానం సఉద్దేసం. సముక్కట్ఠపదానం ఆవుసో కతి ఆపత్తియో.
విస్సజ్జనా – ఉపసమ్పదం విస్సజ్జిస్సం, సనిదానం సనిద్దేసం. సముక్కట్ఠపదానం భన్తే ద్వే ఆపత్తియో.
౨. ఉపోసథక్ఖన్ధక
పుచ్ఛా – చాతుద్దసే చ ఆవుసో పన్నరసే చ పక్ఖస్స చ అట్ఠమియా సన్నిపతిత్వా ధమ్మం భాసితుం భగవతా కత్థ అనుఞ్ఞాతం, కిస్మిం వత్థుస్మిం అనుఞ్ఞాతం.
విస్సజ్జనా – రాజగహే భన్తే సమ్బహులే భిక్ఖూ ఆరబ్భ అనుఞ్ఞాతా, సమ్బహులా భన్తే భిక్ఖూ చాతుద్దేస పన్నరసే అట్ఠమియా చ పక్ఖస్స సన్నిపతిత్వా తుణ్హీ నిసీదింసు, తస్మిం భన్తే వత్థుస్మిం అనుఞ్ఞాతా.
అనుజానామి భిక్ఖవే చాతుద్దసే పన్నరసే అట్ఠమియా చ పక్ఖస్స సన్నిపతితుం.
నను నామ సన్నిపతితేహి ధమ్మో భాసితబ్బో.
పుచ్ఛా – కదా ఆవుసో భిక్ఖూనం పాతిమోక్ఖుద్దేసో భగవతా అనుఞ్ఞాతో.
విస్సజ్జనా – యదా భన్తే భగవతో రహోగతస్స పటిసల్లీనస్స ఏవం చేతసో పరివితక్కో ఉదపాది ‘‘యంనూనాహం యాని మయా భిక్ఖూనం పఞ్ఞత్తాని సిక్ఖాపదాని, తాని నేసం పాతిమోక్ఖుద్దేసం అనుజానేయ్యం, సో నేసం భవిస్సతి ఉపోసథకమ్మ’’న్తి తదా భన్తే భగవతా భిక్ఖూనం పాతిమోక్ఖుద్దేసో అనుఞ్ఞాతో.
పుచ్ఛా – సీమం ఆవుసో సమ్మనితుం భగవతా కత్థ అనుఞ్ఞాతం, కిస్మిఞ్చ వత్థుస్మిం అనుఞ్ఞాతం.
విస్సజ్జనా – రాజగహే భన్తే అనుఞ్ఞాతం, రాజగహే భన్తే భగవతి విహరతి భిక్ఖూనం ఏతదహోసి ‘‘భగవతా పఞ్ఞత్తం ఏత్తావతా సామగ్గీ, యావతా ఏకావాసోతి కిత్తావతానుఖో ఏకావాసో హోతీ’’తి, తస్మిం భన్తే వత్థుస్మిం అనుఞ్ఞాతం.
పుచ్ఛా – కతి ఆవుసో ఉపోసథా దివసవసేన చ కారకపుగ్గలవసేన చ కాతబ్బాకారవసేన చ.
విస్సజ్జనా – దివసవసేన భన్తే తయో ఉపోసథా, పుగ్గలవసేన చ భన్తే తయో ఉపోసథా, కాతబ్బాకారవసేన చ భన్తే తయో ఉపోసథా.
పుచ్ఛా – కతి ఆవుసో ఉపోసథకమ్మాని తేసు చ కీదిసం ఉపోసథకమ్మం భగవతా అనుఞ్ఞాతం, కీదిసం అననుఞ్ఞాతం.
విస్సజ్జనా – చత్తారిమాని భన్తే ఉపోసథకమ్మాని, అధమ్మేన వగ్గం ఉపోసథకమ్మం, అధమ్మేన సమగ్గం ఉపోసథకమ్మం, ధమ్మేన వగ్గం ఉపోసథకమ్మం, ధమ్మేన సమగ్గం ఉపోసథకమ్మం. తత్ర భన్తే యదిదం అధమ్మేన వగ్గం ఉపోసథకమ్మం, అధమ్మేన సమగ్గం ఉపోసథకమ్మం ధమ్మేన వగ్గం ఉపోసథకమ్మం, ఏవరూపం భన్తే ఉపోసథకమ్మం అననుఞ్ఞాతం, తత్ర భన్తే యదిదం ధమ్మేన సమగ్గం ఉపోసథకమ్మం, ఏవరూపం భన్తే ఉపోసథకమ్మం అనుఞ్ఞాతం.
పుచ్ఛా – ఉపోసథం పుచ్ఛిస్సం, సనిదానం సనిద్దేసం. సముక్కట్ఠపదానం ఆవుసో కతి ఆపత్తియో.
విస్సజ్జనా – ఉపోసథం విస్సజ్జిస్సం, సనిదానం సనిద్దేసం. సముక్కట్ఠపదానం భన్తే తిస్సో ఆపత్తియో.