౪. పవారణాక్ఖన్ధక

పుచ్ఛా – వస్సం వుట్ఠానం ఆవుసో భిక్ఖూనం తీహి ఠానేహి పవారితుం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – సావత్థియం భన్తే సమ్బహులే భిక్ఖూ ఆరబ్భ అనుఞ్ఞాతం, సమ్బహులా భన్తే భిక్ఖూ సన్దిట్ఠా సమ్భత్తా అన్తోవస్సం నేవ ఆలపింసు న సల్లపింసు, తస్మిం భన్తే వత్థుస్మిం అనుఞ్ఞాతం.

అనుజానామి భిక్ఖవే వస్సం వుట్ఠానం భిక్ఖూనం తీహి ఠానేహి పవారేతుం, దిట్ఠేవ వా సుతేన వా పరిసఙ్కాయ వా.

పుచ్ఛా – కతి ఆవుసో పవారణా దివసవసేన చ పుగ్గలవసేన చ కాతబ్బాకారవసేన చ.

విస్సజ్జనా – దివసవసేన భన్తే తిస్సో పవారణా, తథా పుగ్గలవసేన కాతబ్బాకారవసేనచ.

పుచ్ఛా – కతీనం ఆవుసో సఙ్ఘే పవారేతుం భగవతా అనుఞ్ఞాతం, కతీనం పనావుసో అఞ్ఞమఞ్ఞం పవారేతుం భగవతా అనుఞ్ఞాతం.

విస్సజ్జనా – పఞ్చన్నం భన్తే భిక్ఖూనం సఙ్ఘే పవారేతుం భగవతా అనుఞ్ఞాతం, చతున్నం వా భన్తే తిణ్ణం వా ద్విన్నం వా అఞ్ఞమఞ్ఞం పవారేతుం అనుఞ్ఞాతం.

పుచ్ఛా – ఏకేన పనావుసో వస్సంవుట్ఠేన భిక్ఖునా కథం పటిపజ్జితబ్బన్తి భగవతా అనుఞ్ఞాతం.

విస్సజ్జనా – ఏకేన పన భన్తే భిక్ఖునా ‘‘అజ్జ మే పవారణా’’తి అధిట్ఠాతబ్బన్తి భగవతా అనుఞ్ఞాతం.

పుచ్ఛా – పవారణం పుచ్ఛిస్సం, సనిదానం సనిద్దేసం. సముక్కట్ఠపదానం ఆవుసో కతి ఆపత్తియో.

విస్సజ్జనా – పవారణం విస్సజ్జిస్సం, సనిదానం సనిద్దేసం. సముక్కట్ఠపదానం భన్తే తిస్సో ఆపత్తియో.