౫. చమ్మక్ఖన్ధక

సోణమథేర వత్థు

పుచ్ఛా – ఉపాహనం ఆవుసో భగవతా కత్థ అనుఞ్ఞాతం, కం ఆరబ్భ కిస్మిం వత్థుస్మిం అనుఞ్ఞాతం.

విస్సజ్జనా – రాజగహే భన్తే ఆయస్మన్తం సోణం ఆరబ్భ అనుఞ్ఞాతం, ఆయస్మతో భన్తే సోణస్స అచ్చారద్ధవీరియస్స చఙ్కమతో పాదా భిజ్జింసు, చఙ్కమో లోహితేన ఫుటో అహోసి, తస్మిం భన్తే వత్థుస్మిం అనుఞ్ఞాతం.

పుచ్ఛా – సబ్బనీలికా వా ఆవుసో సబ్బపీతికా వా సబ్బలోహితికా వా సబ్బమఞ్జిట్ఠికా వా సబ్బకణ్హా వా సబ్బమహారఙ్గరత్తా వా సబ్బమహానామరత్తా వా ఉపాహనాయో ధారేన్తస్స దుక్కటం భగవతా కత్థ కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – రాజగహే భన్తే ఛబ్బగ్గియే భిక్ఖూ ఆరబ్భ పఞ్ఞత్తం, ఛబ్బగ్గియా భన్తే భిక్ఖూ సబ్బనీలికాయో ఉపాహనాయో ధారేసుం, సబ్బపీతికాయో సబ్బలోహితికాయో సబ్బమఞ్జిట్ఠికాయో సబ్బకణ్హాయో సబ్బమహారఙ్గరత్తా సబ్బమహానామరత్తాయోపి ఉపాహనాయో ధారేసుం, తస్మిం భన్తే వత్థుస్మిం పఞ్ఞత్తం.

పుచ్ఛా – ఖల్లకబన్ధా వా ఆవుసో పుటబన్ధా వా పాలిగుణ్ఠిమా వా తూలపుణ్ణికా వా తిత్తిరపత్తికా వా మేణ్డవిసాణవద్ధికా వా అజవిసాణవద్ధికా వా విచ్ఛికాళికా వా మోరపిఞ్ఛ పరిసిబ్బికా వా చిత్రా వా ఉపాహనాయో ధారేన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – రాజగహే భన్తే ఛబ్బగ్గియే భిక్ఖూ ఆరబ్భ పఞ్ఞత్తం, ఛబ్బగ్గియా భన్తే భిక్ఖూ ఖల్లకబన్ధా ఉపాహనాయోపి ధారేసుం, పుటబన్ధా ఉపాహనాయోపి ధారేసుం, పాలిగుణ్ఠిమా ఉపాహనాయోపి ధారేసుం, తూలపుణ్ణికా ఉపాహనాయోపి ధారేసుం, తిత్తిరపత్తికా ఉపాహనాయోపి ధారేసుం, మేణ్డవిసాణవద్ధికా ఉపాహనాయోపి ధారేసుం, అజవిసాణవద్ధికా ఉపాహనాయోపి ధారేసుం, విచ్ఛికాళికా ఉపాహనాయోపి ధారేసుం, మోరపిఞ్ఛ పరిసిబ్బితా ఉపాహనాయో ధారేసుం, చిత్రా ఉపాహనాయోపి ధారేసుం, తస్మిం భన్తే వత్థుస్మిం పఞ్ఞత్తం.

పుచ్ఛా – కట్ఠపాదుకాయో ఆవుసో ధారేన్తస్స దుక్కటం భగవతా కత్థ కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – రాజగహే భన్తే ఛబ్బగ్గీయేవ భిక్ఖూ ఆరబ్భ పఞ్ఞత్తం, ఛబ్బగ్గియా భన్తే భిక్ఖూ రత్తియా పచ్చూససమయం పచ్చుట్ఠాయ కట్ఠపాదుకాయో అభిరుహిత్వా అజ్ఝోకాసే చఙ్కమన్తి ఉచ్చాసద్దా మహాసద్దా ఖటఖటసద్దా అనేకవిహితం తిరచ్ఛానకథం కథేన్తా, తస్మిం భన్తే వత్థుస్మిం పఞ్ఞత్తం.

పుచ్ఛా – యానేన ఆవుసో యాయన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – సావత్థియం భన్తే ఛబ్బగ్గియే భిక్ఖూ ఆరబ్భ పఞ్ఞత్తం, ఛబ్బగ్గియా భన్తే భిక్ఖూ యానేన యాయింసు, తస్మిం భన్తే వత్థుస్మిం పఞ్ఞత్తం.

పుచ్ఛా – గిలానస్స ఆవుసో యానం భగవతా కత్థ అనుఞ్ఞాతం, కం ఆరబ్భ కిస్మిం వత్థుస్మిం అనుఞ్ఞాతం.

విస్సజ్జనా – సావత్థియం భన్తే అఞ్ఞతరం గిలానం భిక్ఖుం ఆరబ్భ అనుఞ్ఞాతం, అఞ్ఞతరో భన్తే భిక్ఖు కోసలేసు జనపదే సావత్థిం గచ్ఛన్తో భగవన్తం దస్సనాయ అన్తరామగ్గే గిలానో కుక్కుచ్చాయన్తో యానం నాభిరుహి, తస్మిం భన్తే వత్థుస్మిం అనుఞ్ఞాతం.

పుచ్ఛా – ఉచ్చాసయనమహాసయనాని ఆవుసో ధారేన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – సావత్థియం భన్తే ఛబ్బగ్గియే భిక్ఖూ ఆరబ్భ పఞ్ఞత్తం, ఛబ్బగ్గియా భన్తే భిక్ఖూ ఉచ్చాసయనమహాసయనాని ధారేసుం, తస్మిం భన్తే వత్థుస్మిం పఞ్ఞత్తం.

పుచ్ఛా – గోచమ్మాని ఆవుసో ధారేన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – సావత్థియం భన్తే అఞ్ఞతరం పాపభిక్ఖుం ఆరబ్భ పఞ్ఞత్తం, అఞ్ఞతరో భన్తే భిక్ఖు పాణాతిపాతే సమాదపేసి, తస్మిం భన్తే వత్థుస్మిం పఞ్ఞత్తం.

పుచ్ఛా – పచ్చన్తిమేసు ఆవుసో జనపదేసు వినయధరపఞ్చమేన గణేన ఉపసమ్పదా చ గుణఙ్గుణూపహనఞ్చ ధువనహానఞ్చ చమ్మాని అత్థరణాని చ నిస్సీమగతానం చీవరదానఞ్చాతి ఇమాని పఞ్చ భగవతా కత్థ అనుఞ్ఞాతాని, కం ఆరబ్భ కిస్మిం వత్థుస్మిం అనుఞ్ఞాతాని.

విస్సజ్జనా – సావత్థియం భన్తే ఆయస్మన్తం సోణం కుటికణ్ణం ఆరబ్భ అనుఞ్ఞాతా, ఆయస్మా భన్తే సోణో కుటికణ్ణో ఏతాని పఞ్చవత్థూని ఆయస్మతో మహాకచ్చానస్స వచనేన భగవన్తం యాచి, తస్మిం భన్తే వత్థుస్మిం అనుఞ్ఞాతా.

పుచ్ఛా – చమ్మసఞ్ఞుత్తం పుచ్ఛిస్సం, సనిదానం సనిద్దేసం. సముక్కట్ఠపదానం ఆవుసో కతి ఆపత్తియో.

విస్సజ్జనా – చమ్మసఞ్ఞుత్తం విస్సజ్జిస్సం, సనిదానం సనిద్దేసం. సముక్కట్ఠపదానం భన్తే తిస్సో ఆపత్తియో.