౬. భేసజ్జక్ఖన్ధక

పుచ్ఛా – పఞ్చ ఆవుసో భేసజ్జాని పటిగ్గహేత్వా కాలేపి వికాలేపి పరిభుఞ్జితుం భగవతా కత్థ అనుఞ్ఞాతం, కం ఆరబ్భ కిస్మిం వత్థుస్మిం అనుఞ్ఞాతం.

విస్సజ్జనా – సావత్థియం భన్తే సమ్బహులే భిక్ఖూ ఆరబ్భ అనుఞ్ఞాతం, సమ్బహులానం భన్తే భిక్ఖూనం సారదికేన ఆబాధేన పుట్ఠానం యాగుపి న సమ్మా పరిణామం గచ్ఛి, భత్తమ్పి భుత్తం న సమ్మా పరిణామం గచ్ఛి, తే తేన కిసా అహేసుం లూఖా దుబ్బణ్ణా ఉప్పణ్డుప్పణ్డుకజాతా ధమనిసన్థతగత్తా, తస్మిం భన్తే వత్థుస్మిం అనుఞ్ఞాతం.

పుచ్ఛా – మూలాదిభేసజ్జాని ఆవుసో భగవతా కత్థ అనుఞ్ఞాతాని, కం ఆరబ్భ కిస్మిం వత్థుస్మిం అనుఞ్ఞాతాని.

విస్సజ్జనా – సావత్థియం భన్తే సమ్బహులే గిలానే భిక్ఖూ ఆరబ్భ అనుఞ్ఞాతాని, సమ్బహులానం గిలానానం భిక్ఖూనం మూలేహి భేసజ్జేహి అత్థో అహోసి, తస్మిం భన్తే వత్థుస్మిం అనుఞ్ఞాతాని.

పుచ్ఛా – అన్తోవుట్ఠంవా ఆవుసో అన్తోపక్కం వా సామంపక్కం వా పరిభుఞ్జన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – రాజగహే భన్తే ఆయస్మన్తం ఆనన్దం ఆరబ్భ పఞ్ఞత్తం, ఆయస్మా భన్తే ఆనన్దో సామం తిలమ్పి తణ్డులమ్పి ముగ్గమ్పి విఞ్ఞాపేత్వా అన్తో వాసేత్వా అన్తో సామం పచి, తస్మిం భన్తే వత్థుస్మిం పఞ్ఞత్తం.

సుప్పియా వత్థు

పుచ్ఛా – మనుస్సమంసం ఆవుసో పరిభుఞ్జన్తస్స థుల్లచ్చయఞ్చ అప్పటివేక్ఖిత్వా మంసం పరిభుఞ్జన్తస్స దుక్కటఞ్చ భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – బారాణసియం భన్తే అఞ్ఞతరం భిక్ఖుం ఆరబ్భ పఞ్ఞత్తం, అఞ్ఞతరో భన్తే భిక్ఖు అప్పటివేక్ఖిత్వా మనుస్సమంసం భుఞ్జి, తస్మిం భన్తే వత్థుస్మిం పఞ్ఞత్తం.

న భిక్ఖవే మనుస్సమంసం పరిభుఞ్జితబ్బం, యో పరిభుఞ్జేయ్య, ఆపత్తి థుల్లచ్చయస్స, న చ భిక్ఖవే అప్పటివేక్ఖిత్వా మంసం పరిభుఞ్జితబ్బం, యో పరిభుఞ్జేయ్య ఆపత్తి దుక్కటస్స.

పుచ్ఛా – హత్థిమంసం వా ఆవుసో అస్సమంసం వా పరిభుఞ్జన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – బారాణసియం భన్తే సమ్బహులే భిక్ఖూ ఆరబ్భ పఞ్ఞత్తం, సమ్బహులా భన్తే భిక్ఖూ హత్థిమంసమ్పి అస్సమంసమ్పి పరిభుఞ్జింసు, తస్మిం భన్తే వత్థుస్మిం పఞ్ఞత్తం.

పుచ్ఛా – సునక్ఖమంసం వా ఆవుసో అహిమంసం వా భుఞ్జన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – బారాణసియం భన్తే సమ్బహులే భిక్ఖూ ఆరబ్భ పఞ్ఞత్తం, సమ్బహులా భన్తే భిక్ఖూ సునక్ఖమంసమ్పి అహిమంసమ్పి పరిభుఞ్జింసు, తస్మిం భన్తే వత్థుస్మిం పఞ్ఞత్తం.

పుచ్ఛా – సీహమంసం వా ఆవుసో బ్యగ్ఘమంసం వా దీపిమంసం వా అచ్ఛమంసం వా తరచ్ఛమంసం వా భుఞ్జన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – బారాణసియంయేవ భన్తే సమ్బహులే భిక్ఖూ ఆరబ్భ పఞ్ఞత్తం, సమ్బహులా భన్తే భిక్ఖూ సీహమంసమ్పి బ్యగ్ఘమంసమ్పి దీపిమంసమ్పి అచ్ఛమంసమ్పి తరచ్ఛమంసమ్పి పరిభుఞ్జింసు, తస్మిం భన్తే వత్థుస్మిం పఞ్ఞత్తం.

పుచ్ఛా – గిలానస్స ఆవుసో గుళం వా అగిలానస్స గుళోదకం వా భగవతా కత్థ అనుఞ్ఞాతం, కం ఆరబ్భ కిస్మిం వత్థుస్మిం అనుఞ్ఞాతం.

విస్సజ్జనా – రాజగహే భన్తే సమ్బహులే భిక్ఖూ ఆరబ్భ అనుఞ్ఞాతం, సమ్బహులా భన్తే భిక్ఖూ గిలానస్సేవ భగవతా గుళో అనుఞ్ఞాతో నో అగిలానస్సాతి కుక్కుచ్చాయన్తా గుళం న భుఞ్జింసు, తస్మిం భన్తే వత్థుస్మిం అనుఞ్ఞాతం.

పుచ్ఛా – జానం ఆవుసో ఉద్దిస్స కతం మంసం పరిభుఞ్జన్తస్స దుక్కటం పఞ్ఞపేత్వా తికోటిపరిసుద్ధం మంసం భగవతా కత్థ అనుఞ్ఞాతం.

విస్సజ్జనా – వేసాలియం భన్తే సీహస్స సేటాపతినో వత్థుస్మిం అనుఞ్ఞాతం.

మేణ్డక వత్థు

పుచ్ఛా – పాథేయ్యం ఆవుసో పరియేసితుఞ్చ కప్పియకారకానం హత్థే ఉపనిక్ఖిత్తహిరఞ్ఞతో నిబ్బత్తం కప్పియపచ్చయం సాదితుఞ్చ భగవతా కత్థ అనుఞ్ఞాతం, కం ఆరబ్భ కిస్మిం వత్థుస్మిం అనుఞ్ఞాతం.

విస్సజ్జనా – అన్తరా చ భన్తే భద్దియం అన్తరా చ అఙ్గుత్తరాపం మేణ్డకం గహపతిం ఆరబ్భ అనుఞ్ఞాతం, మేణ్డకో భన్తే గహపతి భగవన్తం యాచి ‘‘సన్తి భన్తే మగ్గా కన్తారా అప్పోదకా అప్పభక్ఖా న సుకరా అపాథేయ్యేన గన్తుం, సాధు భన్తే భగవా భిక్ఖూనం పాథేయ్యం అనుజానాతూ’’తి, తస్మిం భన్తే వత్థుస్మిం అనుఞ్ఞాతం.

కేణియ వత్థు

పుచ్ఛా – అట్ఠ ఆవుసో పానాని భగవతా కత్థ అనుఞ్ఞాతాని, కం ఆరబ్భ కిస్మిం వత్థుస్మిం అనుఞ్ఞాతాని.

విస్సజ్జనా – ఆపణే భన్తే సమ్బహులే భిక్ఖూ ఆరబ్భ అనుఞ్ఞాతాని, సమ్బహులా భన్తే భిక్ఖూ కుక్కుచ్చాయన్తా పానాని న పటిగ్గణ్హింసు, తస్మిం భన్తే వత్థుస్మిం అనుఞ్ఞాతాని.

రోజమల్లా వత్థు

పుచ్ఛా – సబ్బఞ్చ ఆవుసో డాకం సబ్బఞ్చ పిట్ఠఖాదనీయం భగవతా కత్థ అనుఞ్ఞాతం, కం ఆరబ్భ కిస్మిం వత్థుస్మిం అనుఞ్ఞాతం.

విస్సజ్జనా – కుసినారాయం భన్తే సమ్బహులే భిక్ఖూ ఆరబ్భ అనుఞ్ఞాతం, సమ్బహులా భన్తే భిక్ఖూ కుక్కుచ్చాయన్తా డాకఞ్చ పిట్ఠఖాదనీయఞ్చ న పటిగ్గహేసుం, తస్మిం భన్తే వత్థుస్మిం అనుఞ్ఞాతం.

పుచ్ఛా – అకప్పియం ఆవుసో సమాదపేన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – ఆతుమాయం భన్తే అఞ్ఞతరం వుడ్ఢపబ్బజితం ఆరబ్భ పఞ్ఞత్తం, అఞ్ఞతరో భన్తే వుడ్ఢపబ్బజితో అకప్పియే సమాదపేతి, తస్మిం భన్తే వత్థుస్మిం పఞ్ఞత్తం.

పుచ్ఛా – సఙ్ఘికాని వా ఆవుసో పుగ్గలికాని వా బీజాని పుగ్గలికాయ వా సఙ్ఘికాయ వా భూమియా రోపితాని భాగం దత్వా పరిభుఞ్జితుం భగవతా కత్థ అనుఞ్ఞాతం, కిస్మిం వత్థుస్మిం అనుఞ్ఞాతం.

విస్సజ్జనా – సావత్థియం భన్తే అనుఞ్ఞాతం, సావత్థియం భన్తే భగవతి విహరతి సఙ్ఘికానిపి బీజాని పుగ్గలికాయ భూమియా రోపియింసు, పుగ్గలికానిపి బీజాని సఙ్ఘికాయ భూమియా రోపియింసు, తస్మిం భన్తే వత్థుస్మిం అనుఞ్ఞాతం.

పుచ్ఛా – వినయమహాపదేససఙ్ఖాతాని ఆవుసో చత్తారి కప్పియాకప్పియఅనులోమాని భగవతా కత్థ పఞ్ఞత్తాని, కం ఆరబ్భ కిస్మిం వత్థుస్మిం పఞ్ఞత్తాని.

విస్సజ్జనా – సావత్థియం భన్తే సమ్బహులే భిక్ఖూ ఆరబ్భ పఞ్ఞత్తాని, సమ్బహులానం భన్తే భిక్ఖూనం కిస్మిఞ్చి కిస్మిఞ్చిఠానే కుక్కుచ్చం ఉప్పజ్జి, తస్మిం భన్తే వత్థుస్మిం పఞ్ఞత్తాని.

పుచ్ఛా – యావకాలికాదీహి సంసట్ఠానం ఆవుసో యామకాలికాదీనం పరిభోగకాలమరియాదం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – సావత్థియం భన్తే సమ్బహులే భిక్ఖూ ఆరబ్భ పఞ్ఞత్తం, సమ్బహులానం భన్తే భిక్ఖూనం ఏతదహోసి ‘‘కప్పతి నుఖో యావకాలికేన యామకాలికం సత్తాహకాలికం యావజీవికం, న నుఖో కప్పతి. కప్పతినుఖో యామకాలికేన సత్తాహకాలికం యావజీవికం, న నుఖో కప్పతి. కప్పతి నుఖో సత్తాహకాలికేన యావజీవికం, న నుఖో కప్పతీ’’తి. తస్మిం భన్తే వత్థుస్మిం పఞ్ఞత్తం.

పుచ్ఛా – భేసజ్జకం పుచ్ఛిస్సం, సనిదానం సనిద్దేసం. సముక్కట్ఠపదానం ఆవుసో కతి ఆపత్తియో.

విస్సజ్జనా – భేసజ్జకం విస్సజ్జిస్సం సనిదానం సనిద్దేసం. సముక్కట్ఠపదానం భన్తే తిస్సో ఆపత్తియో.