౨. ఉపోసథక్ఖన్ధక

పుచ్ఛా – చాతుద్దసే చ ఆవుసో పన్నరసే చ పక్ఖస్స చ అట్ఠమియా సన్నిపతిత్వా ధమ్మం భాసితుం భగవతా కత్థ అనుఞ్ఞాతం, కిస్మిం వత్థుస్మిం అనుఞ్ఞాతం.

విస్సజ్జనా – రాజగహే భన్తే సమ్బహులే భిక్ఖూ ఆరబ్భ అనుఞ్ఞాతా, సమ్బహులా భన్తే భిక్ఖూ చాతుద్దేస పన్నరసే అట్ఠమియా చ పక్ఖస్స సన్నిపతిత్వా తుణ్హీ నిసీదింసు, తస్మిం భన్తే వత్థుస్మిం అనుఞ్ఞాతా.

అనుజానామి భిక్ఖవే చాతుద్దసే పన్నరసే అట్ఠమియా చ పక్ఖస్స సన్నిపతితుం.

నను నామ సన్నిపతితేహి ధమ్మో భాసితబ్బో.

పుచ్ఛా – కదా ఆవుసో భిక్ఖూనం పాతిమోక్ఖుద్దేసో భగవతా అనుఞ్ఞాతో.

విస్సజ్జనా – యదా భన్తే భగవతో రహోగతస్స పటిసల్లీనస్స ఏవం చేతసో పరివితక్కో ఉదపాది ‘‘యంనూనాహం యాని మయా భిక్ఖూనం పఞ్ఞత్తాని సిక్ఖాపదాని, తాని నేసం పాతిమోక్ఖుద్దేసం అనుజానేయ్యం, సో నేసం భవిస్సతి ఉపోసథకమ్మ’’న్తి తదా భన్తే భగవతా భిక్ఖూనం పాతిమోక్ఖుద్దేసో అనుఞ్ఞాతో.

పుచ్ఛా – సీమం ఆవుసో సమ్మనితుం భగవతా కత్థ అనుఞ్ఞాతం, కిస్మిఞ్చ వత్థుస్మిం అనుఞ్ఞాతం.

విస్సజ్జనా – రాజగహే భన్తే అనుఞ్ఞాతం, రాజగహే భన్తే భగవతి విహరతి భిక్ఖూనం ఏతదహోసి ‘‘భగవతా పఞ్ఞత్తం ఏత్తావతా సామగ్గీ, యావతా ఏకావాసోతి కిత్తావతానుఖో ఏకావాసో హోతీ’’తి, తస్మిం భన్తే వత్థుస్మిం అనుఞ్ఞాతం.

పుచ్ఛా – కతి ఆవుసో ఉపోసథా దివసవసేన చ కారకపుగ్గలవసేన చ కాతబ్బాకారవసేన చ.

విస్సజ్జనా – దివసవసేన భన్తే తయో ఉపోసథా, పుగ్గలవసేన చ భన్తే తయో ఉపోసథా, కాతబ్బాకారవసేన చ భన్తే తయో ఉపోసథా.

పుచ్ఛా – కతి ఆవుసో ఉపోసథకమ్మాని తేసు చ కీదిసం ఉపోసథకమ్మం భగవతా అనుఞ్ఞాతం, కీదిసం అననుఞ్ఞాతం.

విస్సజ్జనా – చత్తారిమాని భన్తే ఉపోసథకమ్మాని, అధమ్మేన వగ్గం ఉపోసథకమ్మం, అధమ్మేన సమగ్గం ఉపోసథకమ్మం, ధమ్మేన వగ్గం ఉపోసథకమ్మం, ధమ్మేన సమగ్గం ఉపోసథకమ్మం. తత్ర భన్తే యదిదం అధమ్మేన వగ్గం ఉపోసథకమ్మం, అధమ్మేన సమగ్గం ఉపోసథకమ్మం ధమ్మేన వగ్గం ఉపోసథకమ్మం, ఏవరూపం భన్తే ఉపోసథకమ్మం అననుఞ్ఞాతం, తత్ర భన్తే యదిదం ధమ్మేన సమగ్గం ఉపోసథకమ్మం, ఏవరూపం భన్తే ఉపోసథకమ్మం అనుఞ్ఞాతం.

పుచ్ఛా – ఉపోసథం పుచ్ఛిస్సం, సనిదానం సనిద్దేసం. సముక్కట్ఠపదానం ఆవుసో కతి ఆపత్తియో.

విస్సజ్జనా – ఉపోసథం విస్సజ్జిస్సం, సనిదానం సనిద్దేసం. సముక్కట్ఠపదానం భన్తే తిస్సో ఆపత్తియో.