౧౦. కోసమ్బకక్ఖన్ధక

పుచ్ఛా – భేదగరుకేహి భిక్ఖవే భిక్ఖూహి న సో భిక్ఖు ఆపత్తియా అదస్సనే ఉక్ఖిపితబ్బోతి చ, భేదగరుకేన భిక్ఖవే భిక్ఖునా పరేసమ్పి సద్ధాయ ఆపత్తిదేసేతబ్బాతి చ ఆవుసో అయం సామగ్గిరసఓవాదో భగవతా కత్థ దిన్నో, కం ఆరబ్భ కిస్మిం వత్థుస్మిం దిన్నో.

విస్సజ్జనా – కోసమ్బియం భన్తే సమ్బహులే భిక్ఖూ ఆరబ్భ దిన్నో, భగవతి భన్తే కోసమ్బియం విహరతి అఞ్ఞతరో భిక్ఖు ఆపత్తిం ఆపన్నో అహోసి, సో తస్సా ఆపత్తియా ఆపత్తి దిట్ఠి అహోసి, అఞ్ఞే భిక్ఖూ తస్సా ఆపత్తియా అనాపత్తి దిట్ఠినో అహేసుం. సో అపరేన సమయేన తస్సా ఆపత్తియా అనాపత్తిదిట్ఠి అహోసి, అఞ్ఞే భిక్ఖూ తస్సా ఆపత్తియా ఆపత్తిదిట్ఠినో అహేసుం. అథ ఖో తే భన్తే భిక్ఖూ సామగ్గిం లభిత్వా తం భిక్ఖుం ఆపత్తియా అదస్సనే ఉక్ఖిపింసు, తస్మిం భన్తే వత్థుస్మిం దిన్నో.

పుచ్ఛా – సఙ్ఘభేదస్స ఆవుసో మూలభూతే భిక్ఖుమ్హి ఉక్ఖిత్తకే ఓసారితే తస్స వత్థుస్స వూపసమాయ సఙ్ఘసామగ్గిఞ్చ కాతుం సామగ్గీ ఉపోసథఞ్చ కాతుం భగవతా కత్థ అనుఞ్ఞాతం, కం ఆరబ్భ కిస్మిం వత్థుస్మిం అనుఞ్ఞాతం.

విస్సజ్జనా – సావత్థియం భన్తే తేయేవ ఉక్ఖిత్తకానువత్తకే భిక్ఖూ ఆరబ్భ అనుఞ్ఞాతం, తే భన్తే ఉక్ఖిత్తకానువత్తకా భిక్ఖూ తం ఉక్ఖిత్తకం భిక్ఖుం ఓసారేత్వా యేన ఉక్ఖేపకా భిక్ఖూ తేనుపసఙ్కమింసు ఉపసఙ్కమిత్వా తే ఉక్ఖేపకే భిక్ఖూ ఏకదవోచుం ‘‘యస్మిం ఆవుసో వత్థుస్మిం అహోసి సఙ్ఘస్స భణ్డనం కలహో విగ్గహో వివాదో సఙ్ఘభేదో సఙ్ఘరాజి సఙ్ఘవవత్థానం సఙ్ఘనానాకరణం, సో ఏసో భిక్ఖుం ఆపన్నో చ ఉక్ఖిత్తో చ పస్సి చ ఓసారితో చ, హన్ద మయం ఆవుసో తస్స వత్థుస్స వూపసమాయ సఙ్ఘసామగ్గిం కరోమా’’తి, తస్మిం భన్తే వత్థుస్మిం అనుఞ్ఞాతం.

పుచ్ఛా – కోసమ్బకం పుచ్ఛిస్సం, సనిదానం సనిద్దేసం. సముక్కట్ఠపదానం ఆవుసో కతి ఆపత్తియో.

విస్సజ్జనా – కోసమ్బకం విస్సజ్జిస్సం, సనిదానం సనిద్దేసం. సముక్కట్ఠపదానం భన్తే ఏకా ఆపత్తి.