౪౮. హిస్స+తో లోపో

అతో పరస్స హిస్స వా లోపో హోతి. త్వం సుఖీ భవ భవాహి, హిమ్హి దీఘో. ‘‘ఏయ్యాథా’’దినా వ్హోక, తుమ్హే సుఖితా భవథవ్హో భవథ. అహం సుఖీ భవామి, మయం సుఖినో భవామ. పరచ్ఛక్కే-తథా భవతం, భవన్తం. భవస్సు, భవవ్హో. భవే భవామసే. కమ్మే-తయా అనుభూయతు, అనుభూయన్తు ఇచ్చాది. భావే-భూయతు, భూయతం.

ఆణత్తియం-దేవదత్తో దాని ఓదనం పచతు, పచన్తు ఇచ్చాది. కమ్మే-తేన ఓదనో పచ్చతు ఇచ్చాది. తథా సో గామం గచ్ఛతు ఇచ్చాది. ‘‘ఊ లస్సే’’తి లస్సే+కారే గమేతు, గమేన్తు ఇచ్చాది. ఘమ్మాదేసే ఘమ్మతు, ఘమ్మన్తు ఇచ్చాది. కమ్మే-గచ్ఛీయతు ఇచ్చాది. తథా గమీయతు ఇచ్చాది.

విధిమ్హి-లస్స లోపే లుత్తే వుద్ధి, ఇధ పబ్బతో హోతు.

నిమన్తనే-అధివాసేథ తుమ్హే భన్తే భగవా భోజనం, వసతిస్స ‘‘చురాదితో ణీ’’తి ణిమ్హి ‘‘అస్సా ణానుబన్ధే’’తి ఆ, ‘‘యువణ్ణాన+మేఓ పచ్చయే’’తి ఏ చ హోతి. ఇధ నిస్సీదతు భవం, సదస్స ‘‘జర+సదాన+మీమ వా’’తి ఈమ, మనుబన్ధత్తా అన్తసరతో ఈమ.

అజ్ఝేసనే-దేసేతు భన్తే భగవా ధమ్మం, ఏత్థ చురాదిత్తా పురిమసమం.

అనుమతియం-పుచ్ఛ వాసవ మం పఞ్హం, పవిసతు భవం. ఏత్థ పుచ్ఛతో హిస్స లోపో. ఏవం నిసీద.

పత్థనా=యాచనా, తత్ర-దద=దానే, దదాహి మే గామవరాని పఞ్చ, దాతో లస్స ఏకారే చ ఏకం మే నయనం దేహి.

పత్తకాలే-సమ్పత్తో తే కాలో కటకరణే, కటం కరోతు భవం. ఏత్థ ‘‘తనాదిత్వో’’తి ఓ.

త్వాదీ ఏయ్యాదయో వత్త-మానా సమ్పతి,+నాగతే;

భవిస్సతి, పరోక్ఖాది-చత్తారో+తీతకాలికా.