౫,౧౭౩. గమ యమి+సా+స దిసానం వా చ్ఛఙ

ఏతేసం వా చ్ఛఙ హోతిన్త+మాన+త్యాదీసు. సో సగ్గం గచ్ఛతి గమేతి, గచ్ఛన్తి ఇచ్చాది. కమ్మే-గచ్ఛీయతి గమీయతి ఇచ్చాది. యమ=ఉపరమే, పరోక్ఖాఅనజ్జతనరూపాని సబ్బత్థ పయోగ+మనుగమ్మ యోజేతబ్బాని. నిపుబ్బో, నియచ్ఛతి నియమతి, నియచ్ఛన్తి నియమన్తి. సంపుబ్బో, ‘‘యే సంస్సా’’తి ఞ్ఞత్తం, సఞ్ఞమతి, సఞ్ఞమన్తి. కమ్మే-నియచ్ఛీయతి నియమీయతి నియమ్మతి, సఞ్ఞమీయతి వా. తథా నియచ్ఛిస్సతి, సఞ్ఞమిస్సతి. నియచ్ఛి, సంయమి. నియచ్ఛిస్స, సంయమిస్స. నియచ్ఛేయ్య, సంయమేయ్య. నియచ్ఛతు, సఞ్ఞమతు. ఇస+సింస=ఇచ్ఛాయం, సో సగ్గం ఇచ్ఛతి, ఇచ్ఛన్తి ఇచ్చాది. ‘‘లహుస్సుపన్తస్సా’’తి వుద్ధిమ్హి ఏసతి, ఏసన్తి ఇచ్చాది. కమ్మే-ఇచ్ఛీయతి, ‘‘వా క్వచీ’’తి వుద్ధిమ్హి ఏసీయతి. పుబ్బరూపే ఇస్సతి ఇస్సతే ఇచ్చాది. ఇచ్ఛిస్సతి ఏసిస్సతి ఇచ్చాది. ఇచ్ఛి ఏసి. ఇచ్ఛిస్స ఏసిస్స. ఇచ్ఛేయ్య ఏసేయ్య. ఇచ్ఛతు ఏసతు ఇచ్చాది. ఆస=ఉపవేసనే, సో ఆసనే అచ్ఛతి ఇచ్చాది. ‘‘బ్యఞ్జనే దీఘరస్సా’’తి రస్సో, ఉపపుబ్బో, తథా ఉపాసతి. అచ్ఛిస్సతి ఉపాసిస్సతి. అచ్ఛి ఉపాసి. అచ్ఛిస్స ఉపాసిస్స. అచ్ఛేయ్య ఉపాసేయ్య. అచ్ఛతు ఉపాసతు ఇచ్చాది. దిస=పేక్ఖనే, దిచ్ఛతి దిచ్ఛన్తి ఇచ్చాది సబ్బం పురిమసమం. లభ=లాభే, ఇతో పరం విసేసట్ఠానమేవవక్ఖామ, సబ్బవారో వుత్తానుసారేన గహేతబ్బో. లభతి, లభన్తి ఇచ్చాది. కమ్మే-క్యస్స పుబ్బరూపాదిమ్హి కతే లబ్భతి ఇచ్చాది.