౬. అరఞ్ఞాదివగ్గ

౬౦౫. పబ్బతో గిరి సేలో’ద్ది, నగా’చల, సిలుచ్చయా;

సిఖరీ భూధరోథ బ్భ, పాసాణా’స్మో’పలో సిలా.

౬౦౬. గిజ్ఝకూటో చ వేభారో, వేపుల్లో’సిగిలీ నగా;

విఞ్ఝో పణ్డవ వఙ్కాదీ, పుబ్బసేలో తు చో’దయో;

మన్దరో పరసేలో’త్థో, హిమవా తు హిమాచలో.

౬౦౭. గన్ధమాదన కేలాస, చిత్తకూట సుదస్సనా;

కాలకూటో తికూటా’స్స, పత్థో తు సాను నిత్థియం.

౬౦౮. కూటో వా సిఖరం సిఙ్గం, పపాతో తు తటో భవే;

నితమ్బో కటకో నిత్థీ, నిజ్ఝరో పసవో’మ్బునో.

౬౦౯. దరీ’త్థీ కన్దరో ద్వీసు, లేణం తు గబ్భరం గుహా;

సిలాపోక్ఖరణీ సోణ్డీ, కుఞ్జం నికుఞ్జ మిత్థి న.

౬౧౦. ఉద్ధ మధిచ్చకా సేల, స్సాసన్నా భూమ్యు పచ్చకా;

పాదో తు’పన్తసేలో థ,

ధాతు’త్తో గేరికాదికో.

ఇతి సేలవగ్గో.

౬౧౧. మిగిన్దో కేసరీ సీహో, తరచ్ఛో తు మిగాదనో;

బ్యగ్ఘో తు పుణ్డరీకో థ, సద్దూలో దీపినీ’రితో.

౬౧౨. అచ్ఛో ఇక్కో చ ఇస్సో తు,

కాళసీహో ఇసో ప్యథ;

రోహిసో రోహితో చాథ,

గోకణ్ణో గణి కణ్టకా.

౬౧౩. ఖగ్గ ఖగ్గవిసాణా తు, పలాసాదో చ గణ్డకో;

బ్యగ్ఘాదికే వాళమిగో, సాపదో థ ప్లవఙ్గమో.

౬౧౪. మక్కటో వానరో సాఖా, మిగో కపి వలీముఖో;

పలవఙ్గో, కణ్హతుణ్డో,

గోనఙ్గులో [గోనఙ్గలో (టీ.)] తి సో మతో.

౬౧౫. సిఙ్గాలో [సిగాలో (సీ.)] జమ్బుకో కోత్థు, భేరవో చ సివా ప్యథ;

బిళారో బబ్బు మఞ్జారో, కోకో తు చ వకో భవే.

౬౧౬. మహింసో [మహిసో (సీ.)] చ లులాయో థ,

గవజో గవయో సమా;

సల్లో తు సల్లకో థా’స్స,

లోమమ్హి సలలం సలం.

౬౧౭. హరిణో మిగ సారఙ్గా, మగో అజినయోని చ;

సూకరో తు వరోహో థ,

పేలకో చ ససో భవే.

౬౧౮. ఏణేయ్యో ఏణీమిగో చ, పమ్పటకో తు పమ్పకో;

వాతమిగో తు చలనీ, మూసికో త్వా’ఖు ఉన్దురో.

౬౧౯. చమరో పసదో చేవ, కురుఙ్గో మిగమాతుకా;

రురు రఙ్కు చ నీకో చ, సరభాదీ మిగన్తరా.

౬౨౦. పియకో చమూరు కదలీ, మిగాదీ చమ్మయోనయో;

మిగా తు పసవో సీహా, దయో సబ్బచతుప్పదా.

౬౨౧. లూతా తు లూతికా ఉణ్ణ, నాభి మక్కటకో సియా;

విచ్ఛికో త్వా’ళి కథితో, సరబూ ఘరగోళికా.

౬౨౨. గోధా కుణ్డో ప్యథో కణ్ణ, జలూకా సతపద్యథ;

కలన్దకో కాళకా థ, నకులో మఙ్గుసో భవే.

౬౨౩. కకణ్టకో చ సరటో, కీటో తు పుళవో కిమి;

పాణకో చాప్యథో ఉచ్చా,

లిఙ్గో లోమసపాణకో.

౬౨౪. విహఙ్గో విహగో పక్ఖీ, విహఙ్గమ ఖగ’ణ్డజా;

సకుణో చ సకున్తో వి, పతఙ్గో సకుణీ ద్విజో.

౬౨౫. వక్కఙ్గో పత్తయానో చ, పతన్తో నీళజో భవే;

తబ్భేదా వట్టకా జీవ, ఞ్జీవో చకోర తిత్తిరా.

౬౨౬. సాళికా కరవీకో చ, రవిహంసో కుకుత్థకో;

కారణ్డవో చ పిలవో [బిలవో (టీ.)], పోక్ఖరసాతకా’దయో.

౬౨౭. పతత్తం పేఖుణం పత్తం, పక్ఖో పిఞ్ఛం ఛదో గరు;

అణ్డం తు పక్ఖిబీజే థ, నీళో నిత్థీ కులావకం.

౬౨౮. సుపణ్ణమాతా వినతా, మిథునం థీపుమద్వయం;

యుగం తు యుగలం ద్వన్దం, యమకం యమలం యమం.

౬౨౯. సమూహో గణ సఙ్ఘాతా, సముదాయో చ సఞ్చయో;

సన్దోహో నివహో ఓఘో, విసరో నికరో చయో.

౬౩౦. కాయో ఖన్ధో సముదయో, ఘటా సమితి సంహతి;

రాసి పుఞ్జో సమవాయో, పూగో జాతం కదమ్బకం.

౬౩౧. బ్యూహో వితాన గుమ్బా చ, కలాపో జాల మణ్డలం;

సమానానం గణో వగ్గో,

సఙ్ఘో సత్థో తు జన్తునం.

౬౩౨. సజాతికానం తు కులం, నికాయో తు సధమ్మినం;

యూథో నిత్థీ సజాతియ, తిరచ్ఛానానముచ్చతే.

౬౩౩. సుపణ్ణో వేనతేయ్యో చ, గరుళో విహగాధిపో;

పరపుట్ఠో పరభతో, కుణాలో కోకిలో పికో.

౬౩౪. మోరో మయూరో వరహీ, నీలగీవ సిఖణ్డినో;

కలాపీ చ సిఖీ కేకీ, చూళా తు చ సిఖా భవే.

౬౩౫. సిఖణ్డో వరహఞ్చేవ, కలాపో పిఞ్ఛ మప్యథ;

చన్దకో మేచకో చాథ, ఛప్పదో చ మధుబ్బతో.

౬౩౬. మధులీహో మధుకరో, మధుపో భమరో అలి;

పారావతో కపోతో చ, కకుటో చ పారేవతో.

౬౩౭. గిజ్ఝో గద్ధోథ కులలో, సేనో బ్యగ్ఘీనసో ప్యథ;

తబ్భేదా సకుణగ్ఘి’త్థీ, ఆటో దబ్బిముఖద్విజో.

౬౩౮. ఉహుఙ్కారో ఉలూకో చ, కోసియో వాయసారి చ;

కాకో త్వ’రిట్ఠో ధఙ్కో చ, బలిపుట్ఠో చ వాయసో.

౬౩౯. కాకోలో వనకాకో థ,

లాపో లటుకికా ప్యథ;

వారణో హత్థిలిఙ్గో చ, హత్థిసోణ్డవిహఙ్గమో.

౬౪౦. ఉక్కుసో కురరో కోల,ట్ఠిపక్ఖిమ్హి చ కుక్కుహో;

సువో తు కీరో చ సుకో, తమ్బచూళో తు కుక్కుటో.

౬౪౧. వనకుక్కుటో చ నిజ్జివ్హో, అథ కోఞ్చా చ కున్తనీ;

చక్కవాకో తు చక్కవ్హో, సారఙ్గోతు చ చాతకో.

౬౪౨. తులియో పక్ఖిబిళాలో,

సతపత్తో తు సారసో;

బకో తు సుక్కకాకోథ,

బలాకా విసకణ్ఠికా.

౬౪౩. లోహపిట్ఠో తథా కఙ్కో, ఖఞ్జరీటో తు ఖఞ్జనో;

కలవిఙ్కో తు చాటకో, దిన్దిభో తు కికీ భవే.

౬౪౪. కాదమ్బో కాళహంసోథ, సకున్తో భాసపక్ఖిని;

ధూమ్యాటో తు కలిఙ్గోథ,

దాత్యూహో కాళకణ్ఠకో.

౬౪౫. ఖుద్దాదీ మక్ఖికాభేదా, డంసో పిఙ్గలమక్ఖికా;

ఆసాటికా మక్ఖికాణ్డం, పతఙ్గో సలభో భవే.

౬౪౬. సూచిముఖో చ మకసో, చీరీ తు ఝల్లికా [ఝిల్లికా (క.)] థ చ;

జతుకా జినపత్తా థ, హంసో సేతచ్ఛదో భవే.

౬౪౭. తే రాజహంసా రత్తేహి, పాదతుణ్డేహి భాసితా;

మల్లికా’ఖ్యా ధతరట్ఠా, మలీనేహ్య’సితేహి చ.

౬౪౮. తిరచ్ఛో తు తిరచ్ఛానో, తిరచ్ఛానగతో సియాతి.

ఇతి అరఞ్ఞాదివగ్గో.