౨. పురవగ్గ

౧౯౮. పురం నగర మిత్థీ వా, ఠానీయం పుటభేదనం;

థియం తు రాజధానీ [రాజఠానీ (టీ.)] చ, ఖన్ధావారో భవే థ చ.

౧౯౯. సాఖానగర మఞ్ఞత్ర, యం తం మూలపురా పురం;

బారాణసీ చ సావత్థి, వేసాలీ మిథిలా, ళవీ.

౨౦౦. కోసమ్బు, జ్జేనియో తక్క, సిలా చమ్పా చ సాగలం;

సుసుమారగిరం [సంసుమార (టీకా)] రాజ, గహం కపిలవత్థు చ.

౨౦౧. సాకేత, మిన్దపత్థఞ్చో, క్కట్ఠా పాటలిపుత్తకం;

జేతుత్తరఞ్చ సఙ్కస్సం, కుసినారాదయో పురీ.

౨౦౨. రచ్ఛా చ విసిఖా వుత్తా, రథికా వీథి చాప్యథ;

బ్యూహో రచ్ఛా అనిబ్బిద్ధా, నిబ్బిద్ధా తు పథద్ధి చ.

౨౦౩. చతుక్కం చచ్చరే మగ్గ, సన్ధి సిఙ్ఘాటకం భవే;

పాకారో వరణో చాథ, ఉదాపో [ఉద్దాప, ఉద్దాప] ఉపకారికా.

౨౦౪. కుట్టం తు భిత్తి నారీ థ, గోపురం ద్వారకోట్ఠకో;

ఏసికా ఇన్దఖీలో చ, అట్టో త్వట్టాలకో భవే.

౨౦౫. తోరణం తు బహిద్వారం, పరిఖాతు చ దీఘికా;

మన్దిరం సదనా, గారం, నికాయో నిలయా, లయో.

౨౦౬. ఆవాసో భవనం వేస్మం, నికేతనం నివేసనం;

ఘరం గహఞ్చా, వసథో, సరణఞ్చ పతిస్సయో.

౨౦౭. ఓకం సాలా ఖయో వాసో, థియం కుటి వసత్య’పి;

గేహఞ్చా, నిత్థి సదుమం, చేతియా, యతనాని తు.

౨౦౮. పాసాదో చేవ యూపో థ, ముణ్డచ్ఛదో చ హమ్మియం;

యూపోతు గజకుమ్భమ్హి, హత్థినఖో పతిట్ఠితో.

౨౦౯. సుపణ్ణవఙ్కచ్ఛదన, మడ్ఢయోగో సియా థ చ;

ఏకకూటయుతో మాళో,

పాసాదో చతురస్సకో.

౨౧౦. సభాయఞ్చ సభా చాథ, మణ్డపం వా జనాలయో;

అథో ఆసనసాలాయం, పటిక్కమన మీరితం.

౨౧౧. జినస్స వాసభవన, మిత్థీ గన్ధకుటి ప్యథ;

థియం రసవతీ పాక, ట్ఠానఞ్చేవ మహానసం.

౨౧౨. ఆవేసనం సిప్పసాలా, సోణ్డా తు పానమన్దిరం;

వచ్చట్ఠానం వచ్చకుటి, మునీనం ఠాన మస్సమో.

౨౧౩. పణ్యవిక్కయసాలా కు, ఆపణో పణ్యవీథికా;

ఉదోసితో భణ్డసాలా, చఙ్కమనం తు చఙ్కమో.

౨౧౪. జన్తాఘరం త్వగ్గిసాలా, పపా పానీయసాలికా;

గబ్భో ఓవరకో వాసా, గారం తు సయనిగ్గహం.

౨౧౫. ఇత్థాగారం తు ఓరోధో, సుద్ధన్తో’ న్తేపురమ్పి చ;

అసబ్బవిసయట్ఠానం, రఞ్ఞం కచ్ఛన్తరం మతం.

౨౧౬. సోపానో వా’రోహణఞ్చ,

నిస్సేణీ సా, ధిరోహిణీ;

వాతపానం గవక్ఖో చ, జాలఞ్చ సీహపఞ్జరం.

౨౧౭. ఆలోకసన్ధి వుత్తో థ, లఙ్గీ’త్థీ పలిఘో భవే;

కపిసీసో, గ్గలత్థమ్భో, నిబ్బం తు ఛద్దకోటియం.

౨౧౮. ఛదనం పటలం ఛద్ద, మజిరం చచ్చరో, ఙ్గణం;

పఘానో పఘనా, లిన్దో, పముఖం ద్వారబన్ధనం.

౨౧౯. పిట్ఠసఙ్ఘాటకం ద్వార, బాహా కూటం తు కణ్ణికా;

ద్వారఞ్చ పటిహారో థ, ఉమ్మారో దేహనీ, త్థియం.

౨౨౦. ఏళకో ఇన్దఖీలో థ, థమ్భో థూణో పుమిత్థియం;

పాటికా, డ్ఢేన్దుపాసాణే, గిఞ్జకా తు చ ఇట్ఠకా.

౨౨౧. వలభిచ్ఛాదిదారుమ్హి, వఙ్కే గోపానసీ, త్థియం;

కపోతపాలికాయం తు, విటఙ్కో నిత్థియం భవే.

౨౨౨. కుఞ్చికావివరం తాళ, చ్ఛిగ్గలో ప్యథ కుఞ్చికా;

తాళో’వాపురణం చాథ, వేదికా వేది కథ్యతే.

౨౨౩. సఙ్ఘాతో పక్ఖపాసో చ, మన్దిరఙ్గా తులా అపి;

థియం సమ్ముజ్జనీ చేవ, సమ్మజ్జనీ చ సోధనీ.

౨౨౪. సఙ్కటీరం తు సఙ్కార, ట్ఠానం సఙ్కారకూటకం;

అథో కచవరో, క్లాపో, సఙ్కారో చ కసమ్బుపి.

౨౨౫. ఘరాదిభూమి తం వత్థు, గామో సంవసథో థ సో;

పాకటో నిగమో భోగ, మచ్చాదిభ్యో ధి తూదితో [‘అధిభూ’తి ఈరితో కథితో (టీ.)].

౨౨౬. సీమా చ మరియాదా థ,

ఘోసో గోపాలగామకోతి.

పురవగ్గో నిట్ఠితో.