౧. సిక్ఖాదుబ్బల్యసుత్తం

౬౩. ‘‘పఞ్చిమాని, భిక్ఖవే, సిక్ఖాదుబ్బల్యాని. కతమాని పఞ్చ? పాణాతిపాతో, అదిన్నాదానం, కామేసుమిచ్ఛాచారో, ముసావాదో, సురామేరయమజ్జపమాదట్ఠానం – ఇమాని ఖో, భిక్ఖవే, పఞ్చ సిక్ఖాదుబ్బల్యాని.

‘‘ఇమేసం ఖో, భిక్ఖవే, పఞ్చన్నం సిక్ఖాదుబ్బల్యానం పహానాయ చత్తారో సతిపట్ఠానా భావేతబ్బా. కతమే చత్తారో? ఇధ, భిక్ఖవే, భిక్ఖు కాయే కాయానుపస్సీ విహరతి ఆతాపీ సమ్పజానో సతిమా వినేయ్య లోకే అభిజ్ఝాదోమనస్సం; వేదనాసు…పే… చిత్తే…పే… ధమ్మేసు ధమ్మానుపస్సీ విహరతి ఆతాపీ సమ్పజానో సతిమా వినేయ్య లోకే అభిజ్ఝాదోమనస్సం. ఇమేసం ఖో, భిక్ఖవే, పఞ్చన్నం సిక్ఖాదుబ్బల్యానం పహానాయ ఇమే చత్తారో సతిపట్ఠానా భావేతబ్బా’’తి. పఠమం.