౯. పటిసారణీయసుత్తం

౮౯. [చూళవ. ౩౯ థోకం విసదిసం] ‘‘అట్ఠహి, భిక్ఖవే, ధమ్మేహి సమన్నాగతస్స భిక్ఖునో ఆకఙ్ఖమానో సఙ్ఘో పటిసారణీయకమ్మం కరేయ్య. కతమేహి అట్ఠహి? గిహీనం అలాభాయ పరిసక్కతి, గిహీనం అనత్థాయ పరిసక్కతి, గిహీ అక్కోసతి పరిభాసతి, గిహీ గిహీహి భేదేతి, బుద్ధస్స అవణ్ణం భాసతి, ధమ్మస్స అవణ్ణం భాసతి, సఙ్ఘస్స అవణ్ణం భాసతి, ధమ్మికఞ్చ గిహిపటిస్సవం న సచ్చాపేతి. ఇమేహి ఖో, భిక్ఖవే, అట్ఠహి ధమ్మేహి సమన్నాగతస్స భిక్ఖునో ఆకఙ్ఖమానో సఙ్ఘో పటిసారణీయం కమ్మం కరేయ్య.

‘‘అట్ఠహి, భిక్ఖవే, ధమ్మేహి సమన్నాగతస్స భిక్ఖునో ఆకఙ్ఖమానో సఙ్ఘో పటిసారణీయకమ్మం పటిప్పస్సమ్భేయ్య. కతమేహి అట్ఠహి? న గిహీనం అలాభాయ పరిసక్కతి, న గిహీనం అనత్థాయ పరిసక్కతి, న గిహీ అక్కోసతి పరిభాసతి, న గిహీ గిహీహి భేదేతి, బుద్ధస్స వణ్ణం భాసతి, ధమ్మస్స వణ్ణం భాసతి, సఙ్ఘస్స వణ్ణం భాసతి, ధమ్మికఞ్చ గిహిపటిస్సవం సచ్చాపేతి. ఇమేహి ఖో, భిక్ఖవే, అట్ఠహి ధమ్మేహి సమన్నాగతస్స భిక్ఖునో ఆకఙ్ఖమానో సఙ్ఘో పటిసారణీయకమ్మం పటిప్పస్సమ్భేయ్యా’’తి. నవమం.