౬. పుఞ్ఞకిరియవత్థుసుత్తం

౩౬. ‘‘తీణిమాని, భిక్ఖవే, పుఞ్ఞకిరియవత్థూని. కతమాని తీణి? దానమయం పుఞ్ఞకిరియవత్థు [పుఞ్ఞకిరియవత్థుం (సీ. పీ.) ఏవముపరిపి], సీలమయం పుఞ్ఞకిరియవత్థు, భావనామయం పుఞ్ఞకిరియవత్థు. ఇధ, భిక్ఖవే, ఏకచ్చస్స దానమయం పుఞ్ఞకిరియవత్థు పరిత్తం కతం హోతి, సీలమయం పుఞ్ఞకిరియవత్థు పరిత్తం కతం హోతి, భావనామయం పుఞ్ఞకిరియవత్థుం [పుఞ్ఞకిరియవత్థు (స్యా.)] నాభిసమ్భోతి. సో కాయస్స భేదా పరం మరణా మనుస్సదోభగ్యం ఉపపజ్జతి.

‘‘ఇధ పన, భిక్ఖవే, ఏకచ్చస్స దానమయం పుఞ్ఞకిరియవత్థు మత్తసో కతం హోతి, సీలమయం పుఞ్ఞకిరియవత్థు మత్తసో కతం హోతి, భావనామయం పుఞ్ఞకిరియవత్థుం నాభిసమ్భోతి. సో కాయస్స భేదా పరం మరణా మనుస్ససోభగ్యం ఉపపజ్జతి.

‘‘ఇధ పన, భిక్ఖవే, ఏకచ్చస్స దానమయం పుఞ్ఞకిరియవత్థు అధిమత్తం కతం హోతి, సీలమయం పుఞ్ఞకిరియవత్థు అధిమత్తం కతం హోతి, భావనామయం పుఞ్ఞకిరియవత్థుం నాభిసమ్భోతి. సో కాయస్స భేదా పరం మరణా చాతుమహారాజికానం దేవానం సహబ్యతం ఉపపజ్జతి. తత్ర, భిక్ఖవే, చత్తారో మహారాజానో దానమయం పుఞ్ఞకిరియవత్థుం అతిరేకం కరిత్వా, సీలమయం పుఞ్ఞకిరియవత్థుం అతిరేకం కరిత్వా, చాతుమహారాజికే దేవే దసహి ఠానేహి అధిగణ్హన్తి – దిబ్బేన ఆయునా, దిబ్బేన వణ్ణేన, దిబ్బేన సుఖేన, దిబ్బేన యసేన, దిబ్బేన ఆధిపతేయ్యేన, దిబ్బేహి రూపేహి, దిబ్బేహి సద్దేహి, దిబ్బేహి గన్ధేహి, దిబ్బేహి రసేహి, దిబ్బేహి ఫోట్ఠబ్బేహి.

‘‘ఇధ పన, భిక్ఖవే, ఏకచ్చస్స దానమయం పుఞ్ఞకిరియవత్థు అధిమత్తం కతం హోతి, సీలమయం పుఞ్ఞకిరియవత్థు అధిమత్తం కతం హోతి, భావనామయం పుఞ్ఞకిరియవత్థుం నాభిసమ్భోతి. సో కాయస్స భేదా పరం మరణా తావతింసానం దేవానం సహబ్యతం ఉపపజ్జతి. తత్ర, భిక్ఖవే, సక్కో దేవానమిన్దో దానమయం పుఞ్ఞకిరియవత్థుం అతిరేకం కరిత్వా సీలమయం పుఞ్ఞకిరియవత్థుం అతిరేకం కరిత్వా తావతింసే దేవే దసహి ఠానేహి అధిగణ్హాతి – దిబ్బేన ఆయునా…పే… దిబ్బేహి ఫోట్ఠబ్బేహి.

‘‘ఇధ పన, భిక్ఖవే, ఏకచ్చస్స దానమయం పుఞ్ఞకిరియవత్థు అధిమత్తం కతం హోతి, సీలమయం పుఞ్ఞకిరియవత్థు అధిమత్తం కతం హోతి, భావనామయం పుఞ్ఞకిరియవత్థుం నాభిసమ్భోతి. సో కాయస్స భేదా పరం మరణా యామానం దేవానం సహబ్యతం ఉపపజ్జతి. తత్ర, భిక్ఖవే, సుయామో దేవపుత్తో దానమయం పుఞ్ఞకిరియవత్థుం అతిరేకం కరిత్వా, సీలమయం పుఞ్ఞకిరియవత్థుం అతిరేకం కరిత్వా, యామే దేవే దసహి ఠానేహి అధిగణ్హాతి – దిబ్బేన ఆయునా…పే… దిబ్బేహి ఫోట్ఠబ్బేహి.

‘‘ఇధ పన, భిక్ఖవే, ఏకచ్చస్స దానమయం పుఞ్ఞకిరియవత్థు అధిమత్తం కతం హోతి, సీలమయం పుఞ్ఞకిరియవత్థు అధిమత్తం కతం హోతి, భావనామయం పుఞ్ఞకిరియవత్థుం నాభిసమ్భోతి. సో కాయస్స భేదా పరం మరణా తుసితానం దేవానం సహబ్యతం ఉపపజ్జతి. తత్ర, భిక్ఖవే, సన్తుసితో దేవపుత్తో దానమయం పుఞ్ఞకిరియవత్థుం అతిరేకం కరిత్వా, సీలమయం పుఞ్ఞకిరియవత్థుం అతిరేకం కరిత్వా, తుసితే దేవే దసహి ఠానేహి అధిగణ్హాతి – దిబ్బేన ఆయునా…పే… దిబ్బేహి ఫోట్ఠబ్బేహి.

‘‘ఇధ పన, భిక్ఖవే, ఏకచ్చస్స దానమయం పుఞ్ఞకిరియవత్థు అధిమత్తం కతం హోతి, సీలమయం పుఞ్ఞకిరియవత్థు అధిమత్తం కతం హోతి, భావనామయం పుఞ్ఞకిరియవత్థుం నాభిసమ్భోతి. సో కాయస్స భేదా పరం మరణా నిమ్మానరతీనం దేవానం సహబ్యతం ఉపపజ్జతి. తత్ర, భిక్ఖవే, సునిమ్మితో దేవపుత్తో దానమయం పుఞ్ఞకిరియవత్థుం అతిరేకం కరిత్వా, సీలమయం పుఞ్ఞకిరియవత్థుం అతిరేకం కరిత్వా, నిమ్మానరతీదేవే దసహి ఠానేహి అధిగణ్హాతి – దిబ్బేన ఆయునా…పే… దిబ్బేహి ఫోట్ఠబ్బేహి.

‘‘ఇధ పన, భిక్ఖవే, ఏకచ్చస్స దానమయం పుఞ్ఞకిరియవత్థు అధిమత్తం కతం హోతి, సీలమయం పుఞ్ఞకిరియవత్థు అధిమత్తం కతం హోతి, భావనామయం పుఞ్ఞకిరియవత్థుం నాభిసమ్భోతి. సో కాయస్స భేదా పరం మరణా పరనిమ్మితవసవత్తీనం దేవానం సహబ్యతం ఉపపజ్జతి. తత్ర, భిక్ఖవే, వసవత్తీ దేవపుత్తో దానమయం పుఞ్ఞకిరియవత్థుం అతిరేకం కరిత్వా, సీలమయం పుఞ్ఞకిరియవత్థుం అతిరేకం కరిత్వా, పరనిమ్మితవసవత్తీదేవే దసహి ఠానేహి అధిగణ్హాతి – దిబ్బేన ఆయునా, దిబ్బేన వణ్ణేన, దిబ్బేన సుఖేన, దిబ్బేన యసేన, దిబ్బేన ఆధిపతేయ్యేన, దిబ్బేహి రూపేహి, దిబ్బేహి సద్దేహి, దిబ్బేహి గన్ధేహి, దిబ్బేహి రసేహి, దిబ్బేహి ఫోట్ఠబ్బేహి. ఇమాని ఖో, భిక్ఖవే, తీణి పుఞ్ఞకిరియవత్థూనీ’’తి. ఛట్ఠం.